住屋問題解決得了嗎？

你想不是佢所想

靠害無須燒炮仗

諸君勿責無義氣

賣條彩票博頭獎

現在一班窮街坊望上公屋望到頸都長、但有一群人聯手摧毀阿頭定下來嘅加速公屋和居屋（兩屋）興建計劃。城中違例劏房林立、而居於此等劏房嘅蟻民有數以十萬計之多、但政棍和專業抗議集團依然鍥而不舍的反對阿頭徵收土地、又不准佢打郊野公園嘅主意、總之這個不得、那個亦不得就是。看來陰謀論流傳、有人立心要在社會上製造民怨並非吹水。事實擺在眼前、有人大量囤積土地、而公家則寸地難求。此情此景、分明係公家與既得利益集團嘅一場鬥爭、而敗方顯然就是公家。那群阻礙公家覓地起樓嘅人是站在那一邊的、大概唔使問阿貴啦！係嘛？！

有跡象顯示、本城之所以出現樓荒並唔係阿公唔想解決問題、而係有心無力。坦白講、就算搵個超人來揸拂結果都係一樣。記得首位阿頭所倡議嘅八萬五建屋計劃尚未推出、乜乜餘孽就在內部起革命、反對派在外部發動街頭抗議、亂制派負責打小報告、直至阿爺駕臨豪江喝令阿頭腳痛躀低為止。第二位阿頭就學乖了、一上任即廢八萬五、繼而煞停一屋、再按緩另一屋、結果在人家閉翳佢富貴嘅情況下、平安過度到收工。第三位阿頭滿以為可以收地建屋、卻被政棍和專業抗議集團指為盲搶地、結果建屋不達標唔在講、更不堪就係衰過做女嗰陣時吖嘛！現在社會上又有人爆響口、要求參選阿頭嘅候選人承諾優先解決兩屋問題。咪話在下又潑凍水、呢個要求同緣木求魚冇分別。在利益角度上睇、既得利益者一定反對大量興建兩屋。在政治角度上睇、反對派絕不容許阿頭以解決兩屋問題為手段去搏取民心所向。由於反對興建兩屋嘅最大阻力是來自直選尊貴及其盟友、窮街坊唔止做咗冤大頭、而且仲係自己搬石頭揼自己隻腳。所以嘛、窮街坊無謂再埋怨上唔到樓、皆因一切都是閣下不帶眼識人、以致業由自作架咋！其實、想上樓亦唔係冇機會嘅、只要花「十蚊」賣條六合彩、博中他媽的一次頭獎、到時唔止可以上樓、仲連窮根都一齊搣甩埋𠻹架！知冇？