由去國立講起

書館教來導冇方

儒生論盡夾瘋狂

不聞造詣交功課

小違大反監生劏

呢嗱、早幾日前有報導指出、娛樂部發出嘅“戲橋”將國立島北劇團頭兩個字「國立」搣咗、縮寫成島北劇團、並遭受到華文大教館門生會和反對派喉舌連番口誅筆伐。然而娛樂部部長流水華卻表現得成隻鵪𪂹咁款、求其含含糊糊噏幾句當作回應、然後調頭便走。然而陀地派打起講獨個旗幟大搖大擺、卻從來未受到干涉都唔在講、近日還陸陸續續起字頭、並聲稱派員參加九月垃圾會凳仔擂台爭霸大賽。相比之下、厚此薄彼立見一番、難怪講府作風備受質疑咯！

其實、自從大歸之後開始、娛樂部在處理入城表演嘅寶島民間團體之時、除非睇漏眼、否則一定會將“國立”二字刪除。換句話講、這措施已經係行之已久、只係在今時今日政治大對抗嘅時勢裡面、才會被人挖出來大造文章。可笑嘅就係、娛樂部長流水華桶水裝得唔夠滿、被人一拋即窒還不止、還要眼巴巴看着件事被人不斷放大、並引發起紫城與寶島兩地之間嘅矛盾。唔知由幾時開始、講府衙門裡面嘅大老爺們每當碰上敏感性政治議題時、就變得慌失失兼口窒窒。其實只要係有例可援、就應該大大聲講出來至係吖嘛！使乜搞到閃閃縮縮咁款？

依我睇、講獨之所以不斷坐大、是講府憂柔寡斷嘅結果。可不是嗎、三合會咁惡都不敢開間鋪頭打正個招牌做買賣、如今講獨集團居然開館掛招牌、仲話明派人參加九月擂台大賽。咁搞法、分明係剃講府眼眉。難怪講馬辦副總管都要開聲話“嚴重違法、絕不可容”啦！假如有人仍然不知死活、繼續衝擊社會安寧嘅話、就會有人跳出來以維護大眾利益為題、在社會上喚起支持設立廿三兜、到時誰跳出來螳臂擋車、誰就被視為與大眾為敵。呢啲咪就係陸雲霆睇相、無衰攞嚟衰囉！知冇？！