擇錯時辰打錯齋

慳儉掟銀子

掟到周身瘀

事幹有可疑

快查因乜事

呢嗱、官場俗語有講、不懂推則閃避卸、遲早會賴鑊杰嘢吖嘛！人家書生鍾意玩早登極樂、鍾意攞自己條命仔出來教飛、咁咪由得佢哋囉！點不知咱家書齋部主管唔慳儉好做唔做、居然走去揦屎上身、從公家大帳房支取五百萬兩銀子、分派給全城書齋每家五千兩、作為搞那個甚麼「命仔教育講座」嘅津貼。結果唔止不獲多謝、仲連累紫府被人罵孤寒兼小器、呢鋪都可謂懵都面埋咯！

開講有話、唔怕貨比貨、最怕唔識貨吖嘛！在剛出爐嘅「肆正報告」顯示、紫府將會從公家大帳房提取十億兩銀子出來、作為新綢絲之路緣途一帶嘅獎學金之用。唔慳儉部長又在呢個時候話、要從公家帳房提取五百萬兩銀子出來幫助街坊子弟、點不知就被人罵餐飽嘅。唔慳儉部長就埋怨派銀都要被人罵、條氣認真唔順喎！唉、拎錢出來幫人當然唔會被人罵。之但係、今次唔慳儉錯就錯在、擇錯時辰打錯齋、唔被人鬧至怪啦！大家都有眼睇、城督一出手就掟十億兩銀子出來幫外地人、而慳儉大大聲話幫本地人、但拿出來嘅銀兩竟然係城督嘅二百份之一。試問兩條數擺埋一齊、又點會話唔睇到班街坊眼都冤埋呢？雖則話、呢兩件事嘅性質係完全不相同、但亦難禁人家腦子裡浮現一幅“幡杆燈籠、照遠唔照近”嘅景象出來。在下實在懷疑、究竟紫府有冇認真地去探索過、何解大中小書生輕生事件忽然頻密起來？究竟純粹係制度上出咗問題、抑或係整個社會嘅氣氛構成令書生難以負荷嘅壓力所至？所謂病向淺中醫、並唔係話求其掟幾百萬兩銀子出來就可以當作功德圓滿嘅。作為負責任嘅政府、理應立即尋根究底找出原委來、然後對症下藥才對吖嘛！