搬起石頭揼自己雙腳

豎起黃旗包喊打

今回旨在碰瀉茶

挑打但憑一字勇

滾紅滾綠再開花

自從「和尚打傘」一役之後傘兵聲名大噪、並且要派人競逐驅異會席位。講起嚟、傘兵封街鎖路七十九天、成功令阿爺明白點解有咁多人跑上街頭喊打喊殺、並促成他老人家在未來五年預算案當中增加對本城民生方面嘅著墨、呢班傘兵大哥都可謂功不可沒啦！既然傘兵對社會有咁大貢獻、那就當然要食住上、派人殺入驅異會撈番幾個肥缺來玩吓啦！點不知社會上居然有人潑冷水、仲譏笑傘兵今次摸錯門口、注定係煲燶藥嘥心機喎！

呢嗱、所謂空穴來風事必有因吖嘛、輿論潑冷水當然有其道理。須知到驅異會係一個實實在在為地區社群辦實事嘅地方、性質跟垃圾會這個專演馬騮戲嘅場地係完全唔一樣。因此當選者都是經過長年慮月努力耕耘才能獲得街坊認同、並唔係話打傘打起咗個朵就能夠贏得街坊愛戴。事實上、傘兵只是一群打衝鋒剛勁有餘嘅年輕人、但在服務社群方面卻是無業績可查、實在難以跟那些長期在地區上為街坊服務而打拼嘅參選者相提並論。現在嘅問題係、何以有人明知到傘兵絕不可能單憑一個勇字就能殺入驅異會、但仍然要浪費金錢和時間去煮呢煲冇米粥呢？坊間有一種講法指、傘兵主要嘅任務就是狙擊某些特定嘅政黨。意思即係話、傘兵不一定要贏取席位、只要能夠分薄目標人物嘅選票、並將之拖垮就算任務完成。究竟傘兵為何而做、為誰而做、則無從稽考。難怪江湖上傳聞指、當日有群老狐狸滿以為可以利用一群血氣方剛嘅後生仔替佢哋打崗山、殊不知反過來被人家擺咗上祭壇至係。從今次傘兵參選部署看來、又確實係有幾分似衝着某政黨而來。難怪坊間盛傳、班政棍係搬起石頭揼自己雙腳喇、老友！