講獨有錢途

你嘈我又嘈

講獨有錢途

垃圾將大選

能勝便撈粗

開講都有話、政壇最高心法就係自欺欺人吖嘛！在舊年之前、只要花些少銀両向註冊部登記、就可以成立一個政黨。但係自從去年「和尚打傘」一役之後、就連註冊費都慳番、只要你安個名堂出來透過飛時卜宣傳、聲稱係講獨團體嘅話、自然有人捐錢畀過你。如果你能夠把握蟻民怨憤作出一些投機性嘅動作、就會有人捧你做講獨英雄、到時就不愁冇贊助人支持你參加垃圾會擂台大賽架喇！凡是成功勝出者皆獲得一份四年合同、期間每月可獲十萬両銀薪酬之外、還可以按月領取各類津貼合共不少於十二萬両。兩條數加起來超過廿二萬両、扣除助手薪水和辦事處經營費用之後、每月有大約十七八萬両任你點開數都得架！咁你話嘞、咁筍嘅工去邊度搵呢？

對於那些未夠秤打擂台嘅少年書生來說、是可以先搞個學雞名堂出來吸金、當大財到手之後便隨即夾帶跳糟。總言之、糟跳得越多、金吸得越多、跳多幾跳就會變成小富翁架喇！若能趁機多搞幾劑杰嘢出來玩轉個社會、個人就會成為新生代嘅偶像。如果獲得這一代嘅擁躉支持、對於將來奪取垃圾會凳仔嘅機會就更有把握。如果想冧莊嘅話、就要在垃圾會內有所創作。因為觀眾已經厭倦那些拉布、流會、嗌交、爆粗、掟嘢等小把戲。因此今後有必要多搞些類似「初一大龍鳳」咁上下水平嘅製作出來、才能夠勾起憤世痴俗一代人嘅共鳴。時常聽到晚場班馬夫講、香江代有邪牌出。意思即係話、讀書不成都冇有怕、女嘅曉脫、男嘅夠劣、咁就不愁冇銀使架喇！無論男女都好、只須透過「怒火街頭」活動打響個朵、就可以替自己鋪出一條通往垃圾會掘金之路。有數得計架、今日大書生在職場聞人屁兼受人氣都係搵得雞碎咁多銀、而讀書不成嘅人只要能在垃圾內佔得一張凳仔嘅話、就能夠在豐衣足食之餘、仲有大把閒錢等着佢去使。試問點解仲要勤修苦讀咁戇居？