痴瘋過大洋

小丑出差過大洋

跑到花家會奶娘

憑膝要飯家常事

周全禮待屁燒香

當撈侵尚未正式登上花家一哥寶座、奧黑馬嘅契小弟「世界第十名猛人兼思想家」痴瘋便急不及待、立即飛往彼邦扒低翳契哥。痴瘋帶給當撈侵嘅上契禮物就是「指控紅家會騎劫紫荊城法治、破壞自由市場和金融中心地位」和「要求當撈侵維持本城嘅人權、司法、以及法治」喎！按情形看來、痴瘋是要趴低以自己身體作為當撈侵踩過界干預紫荊城事務嘅橋梁。究竟這隻曱甴仔憑啥數據去指控、紫荊城的自由市場和金融地位被紅家會破壞？假如情況屬實的話、何解金融界和商界嘅大老人皆沉默、而須要由這個一竅不通嘅蛋散來當代言人？其實答案很簡單、那就是無中生有。君不見痴瘋嘅指控、跟花大叔在「男海」使出的一招「以維護航行安全為藉口、繼而派遣大軍在天朝家門口撩是鬥非」同樣是無中生有的嗎？難怪榕樹頭大主教陳倭軍都話、此子「更形」入格、唔做「看更」委實太浪費啦！

呢嗱、好端端嘅紫荊城被一群政棍搞到成隻焫雞咁款、坊間怨氣飆升唔在講、更慘不忍睹嘅就係整個社會變成兩極化吖嘛！總言之、反派越踩過界、大人就越係要釋法。在不經不覺之間、大人已經五度釋法。大眾心裡明白、長此下去絕不是辨法、所以廿三兜很快便要重新被擺上台。上次紫荊人未曾嘗過「亂」嘅滋味、加上亂制派有人臨陣倒戈、以致廿三兜大熱倒灶。之但係、經過戰中嘅七十九日嘅封街鎖路、鳩烏嘅反拖篋連串行動、大年初二嘅奴火街頭等事件、以及今次誓願當兒戲事件之後、令到很多人對民主有新嘅睇法。很多人都認為民主不一定須要與暴力掛鉤、更加冇必要以井水去犯河水的。假如愛好民主嘅一方做得稍為溫和一點、亦不會給與大人釋法嘅機會。坦白講、世界上沒有任何一個政權能夠坐視、任由某些人勾結外國勢力進行顛覆性活動而不加以設防、更加沒有任何國家是不設國民教育的。所謂萬事有商量、任何事都可以唔啱講到啱、即使經過大血拼之後雙方亦必須要坐下來傾、才可以講掂條數。既然係咁、點解動輒就要玩到咁大？如果明白「仇者快、親者痛」係點解嘅話、答安即不言而喻矣！