洗腦話戰中

洗腦無分敵我親

你情我願加一分

天書壓下氹氹轉

大石難擋幼嫩群

自從阿爺將那部教你點樣三拳合一嘅心法（拔皮書）拋出江湖之後、城中立即激起新一輪洗腦熱話。教館部主管唔得掂下令全城教館必須指導小學員背誦拔皮書、而教頭協會則認定此書旨在洗腦、容易令小學員人走火入魔、是絕對背誦不得的。之不過在幾年前曾經領頭反對二阿爺（即當今紅家爺爺）提出行企、撕法、勒法三拳合一嘅長角猿（當時大撞公會坐館爺、今日的戒律部主管）解釋拔皮書是一部能令背誦者學得一套絕世心法、而三拳合一就能將武功融會貫通、只要熟習心法和三拳即成自講奇才。呢嗱、雖然同一宗事件、但當人在不同崗位就會有不同演繹、因此對政治人物所講嘅嘢不宜太認真呀！知冇？

講到洗腦呢家嘢、咱家紫荊城都可謂是兵家必爭之地。除了紅家爺爺之外、從老遠花家跑來的山姆大叔也在本城廣布洗腦部隊、並將自己的那套花家心法向紫荊人硬銷、恨不將所有紫荊人都變成花家信徒。自從本城大歸之後、前事頭婆衣履沙拔支笛已經冇乜人再聽了、往日嘅知音人亦紛紛轉投花家食漢堡包去矣！雖則話紅家已經是紫荊城嘅大莊家、可惜歷屆揸拂代理人班子多是二打六之流、雖然日日講人自講、講到連飲奶力都出埋、可惜冇幾多人會聽佢哋支笛、因此山姆大叔承墟而入、不獨只操縱着一個龐大反對組織、而且影響力已經滲入紅家陣營。咁你話嘞、阿爺又點會話唔驚青、又點會話唔拋塊大石下來迮扁呢班河蟹呢？吓、呵爺反口？唓、加陣咁嘅時勢、仲有邊個能夠一句到尼架？

如果有人認為阿爺在本城洗腦方面不敵山姆大叔嘅話、那就大錯特錯了！請睇清楚今日戰中搞成點嘅模樣吧！當日來勢洶洶有如洪水淹至、今日四分五列形同一盤散沙。坦白講、相信很多人都希望紫荊城能夠有真正民主選舉、之但係到咗今時今日仍然搞不清楚、到底真民聯憑啥去保證戰中一定是和平的。真民聯只強調在戰中期間只會坐定定、任拉、任鎖、任抬、絕不反抗、但並無清楚交代之後又將如何。戰中這問題在社會上經過這麼長的一段時間醞釀、普羅大眾對此事大概已心中有數、根本無須要等到投票表態、聲勢理應早已震撼天廳轟動地府、即使阿爺隻巨靈之掌再大也難按得住。日前有人形容今次「電腦攻頭」有四十萬人參加聲勢簡直係勢如破竹、但比起03年那次五十多萬人在大暑天時親身跑上街頭「倒懵」實際上是有所不及。相信人們之所以冷淡並唔係怕咗阿爺、更唔係唔想爭取真民選、而係唔想花時間去煲冇米粥居多。