2014年6月14日星期六

曾大媽的控訴

阿仔唔生性
存心專呃秤
有難冇人扶
前因今報應

日前在鵝頸橋見到曾大媽起勢咁翳兩耳婆替佢打小人、而兩耳婆卻一味左推右搪係都唔肯。在下覺得甚是有趣、於是走前去問兩耳婆點解有生意都唔做、但她反問我到底知唔知到曾大媽搵佢做乜?我梗係知搵佢打小人啦、只係唔知點解佢有生意都唔做啫、於是喊佢講出原委。點知兩耳婆尚未開口、曾大媽就搶先話、係搵兩耳婆替佢個寶貝仔啱曾打小人、但係兩耳婆唔肯做佢生意喎!

作為母親嘅曾大媽、眼見自己個仔惹上一身蘇州屎搵人幫拖是不難理解。但係兩耳婆身為鵝頸橋金牌打手、竟然破壞行規有生意上門都唔做就難免令惹人質疑。當曾大媽離開之後、兩耳婆細細聲對我講、其實那裡的打手行家無人肯接曾大媽單生意做、原因係個個人唔敢搵陰功錢。佢話啱曾當紫荊城揸拂人嘅時候累街坊、老走之後又累大眾、簡直衰到冇朋友、聞說咖啡部就快會請佢嘆冷氣咖啡、正是人人拍掌叫好、如果幫佢打小人即係打咖啡大老爺、呢啲咁嘅錢實在賺不得喎!

黃昏歸家途中見到曾大媽獨個兒坐在公園的椅子上發呆、於是埋去與她聊聊。她說人揸拂、佢個仔又揸拂、點解人家撈到肚滿腸肥都冇事、而啱仔退休之後還不斷有人在他背後蜚短流長、唔通啱仔天生犯小人?曾大媽仲話、大家同樣係揸拂人、點解人家梳打埠揸拂人可以自己立例讓自己享有「老奉犯事權」、而啱仔就要被人欺負?曾大媽質疑、啱仔為班大粒佬做咗咁多嘢、冇功都有勞啦、現在有難喇、但係班人個個瞓捩頸、究竟仲有冇義氣架?唉、原來曾大媽係知啲唔知啲嘅盲頭污蠅、人家梳打埠街坊早排群策群力將那條「老奉犯例權」議按推倒咗好耐、現在邊個都唔可以老奉架喇!呢啲咪就係邪不能勝正囉!

俗語有講“有咁耐風流、有咁耐折隨”吖嘛、既然啱曾出得來行就預咗要還架喇!只係曾大媽這位慈母太過愛子心切啫!

16 則留言:

  1. 難為天下父母心!明天,祝為人父母親生活快樂!身體健康!

    回覆刪除
  2. 佢而家都一樣好風流快活,而且我相信他一定會冇事,因他手上有大把別人的把柄......

    回覆刪除
  3. 佢真係衰收尾,竟在仕途生涯留下污點為句號!

    回覆刪除
  4. 域Sir ,每次想起光纖之父高錕,我都會肅然起敬,人家幾十樣專利權,家財都捐出,有風骨,相反想起貪曾,同依家周身蟻的前政務司都十分反感,據說許生自視甚高,若果你唔識馬,歌劇,紅酒佢跟本唔會同你傾計,我識馬同紅酒,不過就算佢肯同我傾,我都唔會同佢傾,因我鄙視佢同貪曾。

    回覆刪除
    回覆
    1. 呢個世界之所以還有希望、就是還有像光纖爸爸那麼樣的好人和好事!

      刪除
  5. 如果出得嚟行,預咗要還嘅話,咁就無人夠胆出嚟行喇!官場之中,通常會官官相惠,但貪曾勢估唔,時移勢逆,依家啲人咁無人情味!重以鬥跨鬥臭佢為目標!

    回覆刪除
    回覆
    1. 在下也相信某人是抱着這種心理、否則又那裡敢咁過份?

      刪除
  6. 幾衰 , 做阿媽嘅都話喺好仔 , 是否好?莫如他心中有數 , 真的對得住天地良心嗎?

    回覆刪除
    回覆
    1. 當今世界實在有太多人不講良心架喇!

      刪除
  7. 曾、許、湯三人都係前朝訓練出來,估計佢地係有樣學樣,去到咁高級就冇王管,可以隻手遮天,為所慾為,點知今時唔同往日,人地可以,佢地一學就撞晒大板。

    回覆刪除
    回覆
    1. 有人好學唔學、偏去學朝中嘅贓官。

      刪除
  8. "貪"字最終會變成"貧"字。古代齊國的晏子為高官, 但他克己安份, 在家每餐都「吃不重肉」。

    回覆刪除