紫城就快變雞城

紫城變雞城

打爛個醋埕

老雞唔認錯

嫩雞博同情

繼小學雞、大學雞、見工雞之後、城中又出現運動雞和抽水雞兩個新品種。話說某日紫奧總三名高層（包括：主席、領隊、書記）帶領一名運動員、一名教練、以及運動員阿媽等人前去灰熊國參加冰奧雷台大賽。點知運動員在分組賽只得第五名（實際成續是三十六名參賽者、由尾數上第六名）被淘汰出局。更估唔到嘅就係運動員居然公開爆大鑊、矛頭直指紫奧總。

據運動員指出、他曾向紫奧總要求派一個軍醫隨行但遭拒絕、仲話連跌打酒都要向家鄉隊借才有得用。其中一名高層（領隊）聞言之後條氣登時唔順、於是急急跳出來澄清、指紫奧總規定只得一名運動員上陣通常是不會派軍醫隨隊、並指責運動員冇品、輸咗搵啲嘢嚟賴博同情。誰知此話一出便惹來城中媒體狂插、當中有媒體質疑、點解紫奧總寧願安排三個無謂人同行也不派一名軍醫隨團、當中是否有人要攞威而齖齖齰齰、連軍醫個位都霸佔埋？

呢嗱、做得領隊嘅都唔會係血氣方剛架啦、既然運動員有咁嘅投訴理應好好的去反省一下、點解會跟個後生仔鬥嘴架？咁冇風度唔被人入佢嘅位才怪啦！然而運動員明知自己有傷患、又明知冇軍醫同行、但依然要上雷台跟人家搏小命已經不智、而自己又唔帶定一些備用藥物、難道自己真係一啲責任都冇？事實上一個毫無大賽經驗嘅初哥上陣撈得個尾六回來已經算係咁架喇、況且這是你情我願嘅事又何必賴地硬？

其實以上發生嘅只屬小事一宗、總之有過則改、無過嘉勉就是、何況當事人也不願再糾纏下去？但件事偏偏演變成無限上綱吵個不休、搞到幾名高層人皆十足十是抽水雞、而參賽者則變成運動雞咁款、試問咁又何必呢？呢嗱、咪被我估中、原罪就係三隻抽水雞都是靠隻左爪搵食之故、否則又點會一語牽起翻天浪？