紫荊的悲哀

昔日人稱購物城

今朝趕客最無情

官家飽食無能事

民間怨恨算不清

縱觀天下、恐怕除了紫荊城之外、世上再沒有幾個城市會有人上街驅趕遊客。日前一群高舉米字獅龍幡和反蝗蟲標語人士在遊客區趕客。他們對着家鄉遊客大唱黎明不要…喔…對不起、應該是唱財神不要來才對。其實遊客是來消費的、理應受到歡迎才對、何以竟然遭受到如此粗暴對待？呢嗱、這件事講出來一匹布咁長、簡單的講就是這些家鄉財神的確能令到生意人受益、但令到基層大眾利益受損。究竟這是遊客的錯、抑或是紫府一手造成的呢？

近十五年來、紫荊城嘅樓價和租金已續漸攀上世界最高水位、而一般打工仔嘅薪水平依然停留在十五年前水平、兼逢家鄉貨幣再三升值所造成的通漲壓力、基層生活質素不住下降、加上自由行水貨客湧入城中搶購奶粉、藥品、日用品、而再進一步拉高通漲、對於一般基層來說等同變相減薪。由於生活壓力愈來愈迫人、社會上的怨氣亦相繼日益嚴重。其實城中早已呈現出仇官和仇富嘅現象、但紫府官爺們卻視若無睹、以致情況不住惡化。如此這般、社會上就出現一些激進團體、他們將怒氣發泄到那些被喻為蝗蟲嘅家鄉遊客身上去。

查實紫府曾經提出過在邊區撥地興建大型購物城專攻自由行市場、但被人質疑個“波蓆”係專益自己友而受到阻滯。就在此時家鄉府衙便使出一招自由行加碼、結果鬧得城中媽聲四起。呢嗱、就係咁擾攘一輪之嘛、社會上又有人趁機喊紫府在邊城興建購物區、好好的將自由行水客攔截在第一道防線之外、以防止他們到處搶貴晒啲嘢、而真正遊客就可以在城中購買高檔物品加速本地經濟繁榮。這些話十分動聽、但問題是點解自由行班友仔會咁聽話安室於購物城之內、而不是去跟本地師奶搶貨呢？假若如某尊貴所講購物城是以大平賣吸引水貨客嘅話、難免令人質疑點解有咁筍嘅嘢都唔益街坊先呢？唉、總之一句阿喱吉帝就是。