死雞撐飯蓋

當年此陣猛而剛

今人望見心驚慌

贏輸得失唯爾是

緣盡不再為卿狂

剛過去嘅星期日人陣發動我要（真補丸）大遊行、並邀得戰氏三兄弟、雙鶴、反盟等星級人馬助陣。本來預計會有五萬人參與、殊不知到正式開始遊行時、任人陣點講都係只得一萬三千人左右、而巡捕房紀錄卻只有六千人左右。換言之條數點計都不足預期嘅三成、直情係歷年新低、咁就梗係大失預算啦！係嘛？點知事後人陣居然話人數少不得如接受「待住仙」、而戰中廷大教頭亦揚言指、不相信打傘革命嘅力量一夜消失、少咗人參加嘅原因係市民暫時休息。嗱、嗱、嗱、教頭即係教頭、明明被人打到連牙都甩埋、居然還可以理直氣壯的對人講、只係剝掉了幾隻蛀牙而矣！

坦白講、大教頭講得啱、打傘革命嘅力量確實唔會在一夜之間消失、但其熱度係絕對會在衝動過後冷卻。少咗人參與並不等同接受「待住仙」嘅講法也許是對的、但有好多人不願來支持人陣更是鐵一般事實。但凡在政治舞台打滾的人都知到、今日嘅擁躉絕對有可能成為明天的柴台客。人之所以當着神前講鬼話、若不是唔知衰咗喺邊度、就係刻意為自己找一個下台階。政治向來都是現實和殘酷、輸咗就係輸咗、點會輪到你不服軟？在紫荊城輸咗個勢還可以保住個人、若在家鄉輸咗分分鐘連人都輸埋出去。試問又點能夠像大教頭咁風騷响度發噏風？紫荊城經過七十九日蹂躪之後、市民已經體會到暴力只會帶來傷害、係解決唔到問題嘅。經過那場政治洗禮之後、紫荊人對政治嘅睇法更加成熟、從前那股盲目跟風嘅狂熱已經漸漸冷卻下來。今次人陣號召力下降不就是個證明嗎？