縱容走私後患無窮

勢態已凶不認凶

走私全賴有諸公

官商語調同一轍

夾道狂吼當認同

呢嗱、紫荊府衙將走私行為視作為水貨活動、令到紫荊蟻民喊苦連天、以致本土主義抬頭、並直接衝擊到來辦貨嘅表叔表嬸。事頭黨首領方大叔居然話老表向往紫荊人生活、才會跑來辦貨。不知到各位聽後有何感覺、但在下就覺得那是狗屁不通的謬論。以其說老表向往本城生活、不如直接講他們是為着圖利而來更為貼切。否則人家又點會冒着被人攔途辱罵嘅風險、都要跑來辦貨呢？

講到老表寧願挨罵都要跑來辦貨、確實絕不為過的。未知各位可否記起、日前有位判官大人在判案時公開說「身為國人不肯食用國產奶粉、而要到來購外國貨、簡直係國恥」呢？在下驚覺原來不獨在民間有道聽途說嘅應聲盲流、原來在衙門之中亦是大不乏人。官老爺大概只知到老表瘋狂搶購奶粉、而忽略其根本原因、否則就不會說以上嘅話。其實家鄉奶粉早已信譽破產乃是人所共知嘅事、即使係你、恐怕亦不會拿自己兒女嘅小命來試毒。係嘛？但是在家鄉嘅外國進口奶粉價格相當昂貴、並不是人人都負擔得起。之但係、紫荊城嘅進口奶粉售價僅是家鄉同類奶粉嘅售價四份之一、再加上人仔匯價比講紙高而顯得平上加平、老表唔衝入來買貨才怪啦！

坦白講、無論在紫荊府衙內、在人民公社內、抑或是在政圈內、機乎無人不知到、目前很多紫荊人受聘於家鄉老闆當水貨客的、亦很清楚這類所謂水貨客不獨只帶“正牌”貨返家鄉、而且亦帶“山寨”貨品進入本城。這種行為對紫荊蟻民來講、無疑是雙重打擊。然而在官、商、政、三方好傾好講之下、城中走私活動越見興旺。由於水貨客不斷搶高物價、所以各大商號人人賺到肥頭耷耳、個個顯得笑逐顏開。難為那群平白被拖難生計嘅基層蟻民、人人挨到金睛火眼、個個嬲到七竅生煙。但係紫府死雞撐蓋、懶理民間反應、硬指水貨活動並無增加。難道官老爺認為早前「書生打傘」之所以失敗告終是理所當然、而無須理會當中民心所向嘅變化。並不是在下危言聳聽、現在本土主義團體衝擊老表嘅行為漸漸獲得大眾認同、如果紫府繼續掉以輕心嘅話、肯定計錯數。當事情鬧到「黃氣」騰騰震天廳嘅時後才識驚、恐怕為時已晚。