2015年4月17日星期五

反對購買水龍炮



你願打時我願捱
我來點火你拉柴
今日搞成一鑊泡
它朝飯碗也輸埋

呢嗱、紫荊城之所以經常無事生非絕不是偶然、而係姣婆遇着姿粉客至會發生咁多事。紫府今期從善如流、跟隨「各製標準」向巡捕房提供幾尊水龍炮、專門用來對付暴徒、而飯仔就立即在公社以拉布方式提出反對。就係咁匹布就被拉到鬼打都冇咁長、真係唔知點收科。其實「勾尾」所有大國嘅巡捕房都擁有水龍炮架啦、點解開口埋口都係「各製標準」嘅飯仔尊貴、今期竟然要背道而馳呢、吓?

坦白講、即使巡捕房唔買水龍炮亦唔見得無水炮用。因為佢哋可以徵用火燭館嘅水龍炮車去驅散人群。在六七年大暴動期間、殖民地巡捕房亦曾經徵用其它部門車輛、作為防暴工具。因此為着安全計起見、飯仔唔應該只局限於禁止巡捕房擁有水龍炮、而係要其它部門、包括火燭館和衛生館等部門都不得擁有水龍炮、以及銷毀巡捕房現行所有防暴設施、並解除捕快身上所有武力裝備、才夠徹底保護滋事者安全。到時輪到班暴徒揸住碌棍追住班「差冷」嚟打、咁就夠晒荒唐、荒謬、荒誕啦!係嘛?

有人話、今次紫府高調購買水龍炮、不外乎係氹飯仔入屎坑、仲話類似好嘢日後陸續有來喎!喂喂、唔知點解、呢番話聽落硬係有啲耳熟嘅感覺喎!你話今日嘅公社布局似唔似在「和尚打傘」期間嘅兄弟幫幫兄弟那場大龍鳳咁、越幫越忙、越幫越亂、越幫越難收科、越幫越神憎鬼厭、結果幫到飯仔人人局住唱pop song、個個被迫扮pop gay呢?在今時今日這個真假難辨嘅大千世界裡面無奇不有、莫講話嗰班精甩辮嘅政棍計錯數、即使大羅神仙一樣會睇漏眼吖嘛!假如飯仔以為今日惹得嘅一身蘇州屎、可以在日後慢慢洗番乾淨都未遲嘅話、肯定計錯數。依我睇、咁搞法只有替「黑柑五仁棗」墊屍底嘅分兒、間接令到飯仔下屆在公社所佔嘅席位不足三份之一、以致整個公社淪為倦仔一言堂。咁你話嘞、呢班友仔算唔算係陸雲霆睇相、兼且累街坊呢、吓、吓?

16 則留言:

  1. 如果我係思歪,我會堂而皇之請那班亂噏24嘅代議士收皮(炒魷魚)。點解?就係因為咁大個人講啲嘢完全不合邏輯,簡直係小學雞,既然連國際普通知識都不懂,咁樣便可以簡單直接送佢地去再陪訓,因未夠班又點可以為市民請命呀……

    回覆刪除
    回覆
    1. 真係好難講、紫荊城就係有人賣賤、有人買賤、因此稱之為泛賤、無得醫架喇!

      刪除
  2. 飯仔來來去去都係得嗰招,俾D新意啦,咁攪法,真係好難唔收皮喎。
    我諗下次可能有好多掛著獨立唔埋堆嘅人走出來。

    回覆刪除
    回覆
    1. 飯仔今次明知到會犯眾憎都企硬、睇落唔係係拋浪頭、反而似將會有一場大亂即致多啲。若加埋山姆大叔反撲「亞頭行」計算在內、呢個睇法絕對是有可能。一次大亂全城皆輸、所以飯仔才敢去盡矣!

      刪除
  3. 回覆
    1. 唉、唔係我悲觀、我睇唔止抽水、呢趟可能出血矣!

      刪除
  4. 再唔諗D新橋
    用完又用
    就快好似阿事咁摺埋

    回覆刪除
    回覆
    1. 如果爆發大亂就真係大家都摺埋矣!

      刪除
  5. 域Sir,當年64就因為大6防暴警察裝備不足兼落後,冇催涙彈,橡膠子彈和水龍炮,所以焗住用重型裝備坦克車。
    反對買水龍炮好還是買坦克車好?

    回覆刪除
    回覆
    1. 我相信飯仔之所以反對買水龍炮只係逢事必反嘅例行公事、佢哋正在組織係嘅事更令人擔憂。

      刪除
  6. 老豆用藤條打仔打極都唔聽話, 改用水喉通打係咪有效D呢?

    回覆刪除
    回覆
    1. 水炮對付一般示威者是有效的、但對於那些決心採取暴力嘅人嚟講係中正下懷。

      刪除
  7. 大家擺吓姿態,搵啲野拗吓,議員同高官嘅日子先至容易過。總之政府買乜野對付班示威者都係唔啱架喇!除咗水炮之外,示威場面好混亂,就算有其他意外發生都唔出奇!我覺得既然佢哋拋得個身出嚟示威,就應該預咗《壯烈犧牲》!如果驚嘅話,咪留番喺屋企囉!

    回覆刪除
    回覆
    1. 如果係咁就冇問題喇!不過要再睇落去才有答案。

      刪除