激烈抗爭尚無理據

你爭我又爭

如假又似真

但求贏一次

惡向膽邊生

愛字堆擺街站收集支持紫改簽名、並獲得廣大市民簽名支持就見得多、但近年來卻從未見過以民主掛帥嘅民字堆擺設街站收集民意。由其是上次民字堆大旗手「穩陣」領導的一次唱反調大遊行嘅參加人數創下歷史新低。今日紫荊城嘅大氣候看似是、支持一家獨大嘅組織居然成功的打起民意牌來、而那高舉民主旗幟嘅組織反而漠視民意、以致連道德高地都失掉。心水清嘅人一眼看得出、這一切都是由一柄兩傘開始。由於戰狼三伯為着氹人落水便花了兩年時間宣傳「罵不還口、打不還手、任拉任鎖」嘅戰中政策、但戰中一開始人們見到的卻是「罵不停口、打不停手、任意任性」。當人們目睹諾言原來是謊言嘅時候就猛然醒悟過來、結果戰中就落得慘淡收場。

明日話今天

舢板充炮艇

蠢才愛標青

今日你釘人

它朝人照釘

呢嗱、近日紫府有紫府動員到坊間爭取街坊支持「食住先」、而飯仔有飯仔派人出來唱反調。那個剛剛被山姆大叔捧上世界第十名風頭躉嘅十頭蜂則聲稱、假如紫府膽敢繼續上街迷惑街坊嘅話、佢就會拖馬見鑊炒鑊喎！有人話、在「食住先」嘅框架之下、飯仔不單只無緣問鼎金紫荊揸拂人寶座、甚至連生存空間都大打折扣、咁搞法、唔爆紫府大鑊至奇。計我話、呢個世界上叻仔通常都係求財、只有蠢仔才會求氣。試問、拋個身出來刀鋒上打滾唔係為銀、唔通真係為興趣咩？最少有我一個唔信囉！咪話我市儈、我相信每條政棍都有個價、一百萬買不來的、一億就可以、再唔得咪再加囉、反正大莊家唔志在、且看有幾多人真係能夠降拒銀両嘅魔力吧！

飯仔唔入叠

是假還是真

內裡有乾坤

兩邊唔靠岸

有銀冇命分

由「篩補丸」特約主辦嘅金紫荊擂台大賽終極方案已經宣布、並將會按照原定計劃在八三一場館上演。依照篩選程序看來、飯仔要登記為參賽選手並不難、而難就難在登上擂台出戰這部份。據說選手必須先獲得超過半數提委提名才有資格上台比賽、然而七成以上嘅提委均是親紅集團和倦仔人馬、這即是說假如飯仔代表要上台出戰、就須要在最後階段嘅不記名投票這一關裡面、獲得親紅集團或倦仔暗中出手幫助才有機會。嗱、咁你話嘞、飯仔又點會答應去做呢啲咁蝕底嘅事呢？睇嚟、呢單嘢都係凍過水居多架喇！

硬砍無益

平時不出手

招出冇情留

誰人敢莽動

劍過血封喉

不知各位街坊有否注意到、若不是奧黑馬硬着要搞那個甚麼「亞洲再橫行」嘅話、架仔就唔會咁斗膽買起釣島、阿爺亦唔會將該區水域列入常態化巡邏範圍之內、更加不會在東海劃出「防凶識別區」。若不是安南仔試圖在西沙水域越踩越過界、阿爺亦不會拖個鑽油台到該嚇他一餐飽嘅。若不是賓仔妄想在黃岩島起飛腳、阿爺就唔會奪回該島、更唔會在該島上建設成軍事基地。若不是架仔、安南仔、爪哇仔、馬拉仔、賓仔等人聽奧黑馬支笛陸續在東南二海進行填島活動在先、阿爺亦唔會一口氣拿下六個島礁於後、更不會展開填島行動和興建具有飛機場嘅軍事基地了！換言之、山姆大叔搞嘅「亞太再橫行」不單只啥利益也拿不到、而且返被阿爺打蛇隨棍上乘機在該區擴展和鞏固軍事力量。

反紅反上腦

寧做井底蛙

不願看繁華

閉門稱獨秀

實力靠棚牙

俗語有話、做人切忌固步自封、應該多啲走出嚟到處看看這個世界、才能夠充實自已吖嘛！由其是當今紅家會那套「抓銀神功」打遍天下無敵手、其經歷和經驗都具有參考和學習價值。因此紫荊大武館副館長日前透露、他們準備在七年後強制所有學徒都必須到紅土大地及其它地方進行一次交流、但凡對此有異意者大可以選擇離開大武館另投其它門派。殊不知此語一出、又關個腦事喇！有人急不及待指責大武館係要送學徒入內地洗腦。那唯恐天下不亂嘅大武館「舊冷會」發言人更加一口咬定、大武館此刻公報計劃、是企圖打壓正在學習「降紅十八掌」嘅大學徒、並聲稱一定會跟大武館周旋到底嘅喎！

反對購買水龍炮

你願打時我願捱

我來點火你拉柴

今日搞成一鑊泡

它朝飯碗也輸埋

呢嗱、紫荊城之所以經常無事生非絕不是偶然、而係姣婆遇着姿粉客至會發生咁多事。紫府今期從善如流、跟隨「各製標準」向巡捕房提供幾尊水龍炮、專門用來對付暴徒、而飯仔就立即在公社以拉布方式提出反對。就係咁匹布就被拉到鬼打都冇咁長、真係唔知點收科。其實「勾尾」所有大國嘅巡捕房都擁有水龍炮架啦、點解開口埋口都係「各製標準」嘅飯仔尊貴、今期竟然要背道而馳呢、吓？

七日一行

一日七變七日一

得不着也着不得

毒箭飛來飛箭毒

桔前神對神前桔

呢嗱、由於有人不斷在紫荊分舵地頭搗亂、並對到來辨貨嘅散戶作出惡性挑釁行為、城中便響起將一咭通行改為一咭一行、或是一咭十行、甚致取消張咭唔使行、總之就是各為其主各講各話啦！點知紅家會總舵一句「回應坊眾要求」就下令限制冧鎮散戶每週只准入城逛一次、呢鋪都可謂陸雲霆睇相、唔衰攞嚟衰、真係喊都無謂。由於總舵今次作出嘅安排是具相當殺傷力、令到那些在冧鎮和紫城兩地開設連鎖式紫貨店嘅土豪和老表有如床板夾支筆、有痛到叫不得咯。有人質疑總舵在下決定之前連招呼也不打一聲、難道不怕有人聯手搞垮檔「自助餐」作為報復嗎？據說總舵從來沒有擔心過。

自助餐 vs 第二戰

阿飯死口話唔嫁

老總惟有玩齖齰
兩家大纜絞唔埋
留待街坊草其馬

近日江湖傳聞指總公司已經認定「自助餐」計劃夭折比順利登場更加有利可圖。因此決定企硬兼半步不讓、任由飯仔將檔整個計劃搞垮、到時總公司就要讓飯仔在來屆嘅話事堂VIP擂台大賽之前先行飽嘗斷糧、斷水、以及人氣盡失嘅滋味、然後再在擂台上打落水狗。只要倦仔在擂台大賽之中奪得VIP席位超過總數三份之二嘅話、到時無論是「廿三味」抑或是「國民咬肉」等項目自然可以順利推出市場、而飯仔想反對亦有心無力矣！

擺國箍法上台？

有路行不得

神仙亦氣咳

乖仔打銅鑼

老子賺一筆

紫府將「廿三味」束之高閣多年、都可謂漚到發晒霉咁滯、不過今次可能有代替盤上市了！由於「亞頭行」嘅成立對山姆大叔嘅霸主地位構成嚴重威脅、並且觸動其敏感神經。為着要令「亞頭行」盡快夭折、山姆大叔已準備好向阿爺發動全方位攻擊、搏老人家差錯腳掉進他的陷阱裡面去。山姆大叔除了在阿爺家門外四圍點火之外、還要在寶島和紫荊城兩地舞火龍、總之係都要搞到阿爺家裡家外到處火光四起至為之過癮。正當阿爺感到頭痕之際、點知火雞幫無端端幫咗老人家一個大忙。該幫忽然派人跑到前事頭婆老家、以紫獨幫之名注冊為合法社團、並開始公開徵收捐款和準備大展拳腳。阿爺見機不可失、便趁勢吹風要將「國箍法」擺上台。

如此民主

我唔食你休想食

未開波先行躀直

得把口萬事不靈

死都要與民為敵

自從阿爺收回紫荊大食堂揸拂權之後、紫荊人嘅飲食習慣就起了巨大變化。雖然總舵答應過紫荊人餐照開、酒照飲、一切照舊玩足五十年、但條件就是要進食由阿爺指定嘅套餐。事隔十多年之後、阿爺發現紫荊人在飲食要求有所提升、於是計劃在2017推出自助餐、由紫荊人從中挑選自己喜愛嘅食物。正當人人對自助餐有所期盼之際、那群日日喊要食自助餐嘅老飯忽然撲出來反對、而且仲要以少制多搞散檔攤、即係話佢哋唔食、你哋亦唔準食。

點止趕客咁簡單

趕客連場鬧爆天

遊人七竅盡生煙

生鏽功夫藏利器

博你疏忽泥裡纏

城中反對趕客嘅聲音只着重於經濟損失、其它的則一切欠奉。不過榕樹頭唱家班歌王田大就有不同聲音。他說內地人對於同胞在紫荊城受辱很惱怒、並吹起一陣不歡迎紫荊人浪潮。因比他認為紫荊人到內地旅遊、最好認自己係五羊城居民、否則有排你受。聽聞最近有些曾經到訪黃甫區嘅街坊歸來後講、當地有些人抱着以牙還牙嘅心態、對紫荊人嘅態度都幾惡劣吓嘅喎！