步向愁城

官家食到嘔

民間勒褲頭

閣中無能士

誰解遠近憂

古有官府開倉派米、今時紫府開庫派銀。唯不同者就是古時派米為賑災、為救黎民於水火、而今日派銀是官爺為求耳根清靜、少挨兩句責罵。過去幾年來馬府飽食之餘便從手指罅漏幾個錢出來派街坊、氹得人人鬼咁開心。然而紫城官紳食到嘔、民間則怨聲載道、紫府才效法馬埠向城中百姓派銀兩、及後改為以實報實消補貼方式代替派現金。雖然政府坐擁兩萬億外匯儲備和七千億財政儲備、而且今年庫房又是豬籠入水、但大賬房主管二撇曾卻高唱狼來了、順手大幅度削減補貼。坦白講、如果紫府能夠改善社會上嘅貧富懸殊、削減補貼是正確的。可惜問題依然嚴重、民怨越積越深、而二撇曾卻不理三七廿一手起刀落、將補貼斬去一大截。如此這般、中產就變成籮底橙矣！

呢嗱、大眾心知肚明派不派銀都會有人罵的。既然係咁、何不索性連豆零都慳番？根本上無必要一面畀錢人使、一面被人罵到狗血淋頭咁委屈。事實上很難想像得到、假如政府不替公屋住戶交一個月房租、或不免收業主兩季差餉、就會有人窮到連飯都冇得開。紫府每年都開出一大疊天花亂墜嘅期票、但結果年年如是得個講字、甚至乎唔講就當冇咗。今次改善民生做不來、又要削減補貼、再跑個傻強出來說甚麼“全世界財政預算案都冇派銀架啦”這類具挑釁性嘅風涼話、到底想搞邊科？

呢嗱、江湖上以訛傳訛不要亂信、但今次二撇曾親口公開承認工作上觀點與督爺確實是傳在着分歧。換言之就是督爺有督爺自言自語、而財爺有財爺自把自為、問責班子名存實亡、難怪官爺講話經常有口徑各異嘅怪現象啦！這亦反映出督爺未能有效的去經營好自己檔攤。試問團隊不齊心、有責而不問、凭啥去做好這份工？難怪朝廷忽然之間免除紫府主辦「20財星會」嘅權責、並將會場遷往京城、交由當地衙門主辦。據說今次事件已經曝露出朝廷對紫荊城嘅信心大打拆扣喎！咁、你又信唔信？