集體蛇王

財來直受最輕鬆

會議堂上稱英雄

免費旅遊夫妻去

一覺醒來便收工

俗語有講吖嘛、風水佬呃你十年八年、而咱家大話堂尊貴如果能連任五屆就可以呃足你二十年。點解會係呃呢？咁就有估講喇！話說日前大話堂那個甚麼蝸居委員會召開會議、本來共有廿五名委員嘅委員人卻只得區區四人出席、缺席嘅廿一人之中共有十六人（包抱亂制、飯民、異能組別等各派人士）是未經請假的、而且遍侵不獲連鬼影都冇隻。事後居然有人利用那些又爛又殘兼幼稚嘅藉口替自己辯解。有人賴住得遠、有人賴塞車、有人賴唔得閒、總之就是盡其撒賴之能事啦！更可悲的是大話尊貴連運用語言偽術來遮醜都顯得低 B 過人、難怪口才一般的總督大老爺也被捧成語言偽術大行家了！

坦白講、今時今日想在職場找得一份較好嘅工實在唔容易。不過紫荊大話堂就有一份月入八萬蚊、有多項津貼、還有（如果你肯接受嘅話）就有大財團向你提供夫妻檔免費娛樂和歐洲旅遊等額外福利。這份工不單只無風險、無壓力、無王管、而且喜歡缺勤就缺勒、喜歡遲到就遲到、要麼拿幾個官來罵一餐消消氣、要麼向督爺掟路姆西毛公仔就可以提早收工、總之想點做就點做就是。試問這份工是否天下最筍的呢？眾所周知、當下紫荊城基層為尋覓一個蝸居而搞到人皆頭昏腦賬、滿以為選班人出來幫下自己、點知呢班大帝居然連開會都懶！紫荊人都可謂搬起石頭砸自己的腳、想唔當冤大頭都幾難矣！

呢嗱、既然這群尊貴食大眾、使大眾、又豈能讓他們寬己嚴人？所以大眾是有權去了解他們是否稱職。因此每當有尊貴遲到早退或偷懶唔返工嘅時候、大話堂秘書處就有責任將其姓名貼在壁報板上示眾、好讓全城選民都知到究竟自已選有冇被騙吖嘛！係冇？