2014年1月3日星期五

督爺最佳人選



你謀我又謀
未知堅定流
一人派一子
勝者占鰲頭

踏入零四年第一日爭取珍寶選以及支技藝甫選嘅團體分別踩上街頭晒冷、看來今年都唔會太平得到那裡去矣!坦白講、打一句、問一句、在下都不相信朝廷會答應飯民口中的所謂珍寶選、然而藝甫選亦有爭議、總之雙方都是九唔搭八各走極端。所謂窮則變、變則通吖嘛、以其浪費口水、倒不如由紫荊大眾來做決定、首先由雙方各自派出一名代表、再由大眾一人一票選個明白、看看大多數紫荊人到底想點好過啦!

縱觀飯民眾多天皇天后總是找不到一個具有督爺潛質的人物、但昔日法壇就有一位隱世巨星喇!吓、甚麼、係唔係齋講良心陳四姑?唔好玩啦、點會係佢呀?在下所指的就是無上法院嘅過氣大判官李青天。講到李青天嘅威水史就多喇!除了鐵面無私兼明辨是非之外、最駕勢嘅就係判人哋釋法無效吖嘛!由於他是大狀出身、以法論法而言、那些人哋代表根本上唔係佢嗰皮。當年人代曾就裝瘋猿一案解釋歸本法、界定他無資格成為本城永久住客。點知當時無上法院的李青天大人就睬佢哋都生虱乸、一於按照補窿法判裝瘋猿勝訴。因此由李青天來當督爺嘅話、講人自講必能落實、到時就無須日日聽西廠嗰支爛鬼笛、總之自己揸拂、想做啥就做啥。咁你話爽唔爽?

話說回頭、亂制派中人有督爺相嘅亦是唔多覺眼、到不如由成蟲大哥出來參選、最低限度都會有大批蟲迷撐起個埸、保證唔會食白果吖嘛!若然成蟲大哥當選嘅話、那就證明紫荊人鐘意被人管、到時莫講話煲廿三味啦、即使那些甚麼國民咬肉、唱紅打黑、大愛航行靠舵地等一系列現在被視為禁忌的東西都變成理所當然、要何時上馬就何時上馬、要點樣玩就點樣玩。更重要的就是誰也不敢再對督爺嘅認受性說三道四、到時爛民變順民、河蟹變和諧、一團和氣。咁唔好咩?

21 則留言:

  1. 但最近成蟲被過氣藝員欄劫英暗示,多年前曾經俾佢強暴過,辜勿論這指控是真是假,阿爺始終對呢啲曾經捲入是非嘅人當凸首存有介心,所以成蟲都係唔掂! 俾我就選鬍鬚佬喇! 如果有巿民示威,即刻俾啲歸靈糕佢哋下下火,順番條氣,咁就乜樹都無,天下太平!

    回覆刪除
  2. 域兄真是高見了!拜服,拜服!

    回覆刪除
    回覆
    1. 秋葉阿姨、見笑了!在下祝妳日日靚女啦!
      刪除

      刪除
  3. 唔係呀,先說修身,成蟲大哥小學程度,冇文化學識,差不多大半個文盲,再說齊家,之前背住老婆偷食,攪出個小蟲女出來,開記者招待會解釋,不准記者發問,變咗有佢講冇人講的笑話,更蠢仲話全世界最大的貪污國家是花旗,連一些政治智慧都冇,如何治港?

    回覆刪除
    回覆
    1. Ng Wai 兄、正因為做督爺只要聽教聽話、無須要有腦根、更忌主意多多、在下才看上成蟲大哥之嘛!以上嘅嘢唔係我老作架、喺康民叔從前用來形容糠糖嘅!

      刪除
  4. 這個位。。就是選了出來。。。不好做,。。好難做好呢!!

    回覆刪除
    回覆
    1. 一定唔好做、因為聽邊個話都會被人罵的。

      刪除
  5. 「繩虫」不學無術, 埋堆黑社會, 始亂終棄留孽種, 四處舉起V手勢扮大哥做親民大使。佢做特首? 信佢一成, 雙目失明。佢做特首我馬上移民「不寒」, 跟「肥仔恩」好過。
    依家人人爭做突手, 正如毛主席話齋:「小小寰球,有幾個蒼蠅碰壁。嗡嗡叫,幾聲淒厲,幾聲抽泣。」其實有好多其他人選, 最衰有D已經作古。例如九龍城皇帝「憎做豺」、打小人專家「品姨」。配合番毛主席嘅心願:「一萬年太久,只爭朝夕。四海翻騰雲水怒,五洲震盪風雷激。要掃除一切害人蟲,全無敵。」
    其實特首不過係個橡皮圖章, 只係個招牌。不如捧隻人見人愛嘅尖東忌廉哥出嚟, 包全香港俾佢七百萬個Like。

    回覆刪除
    回覆
    1. 阿懵智大才疏、和曾好食懶飛、阿狼有心無力、加上城中官、商、政三路人馬各懷鬼胎、最弊傢伙嘅就喺有啲人云亦云嘅人連自己做緊咩都唔知、以致滿城烏煙瘴氣、神仙難救矣!

      刪除
  6. 既然阿懵、和曾、阿狼都得,有邊個會唔得?長毛都冇問題,仲有大戲睇。

    回覆刪除
    回覆
    1. 事實上得與唔得似乎還不是由大眾來決定的。

      刪除
  7. 其實唔好再搵甚麼特首,話明係特區,就由得佢特別啲,由中央派錢養起所有香港人,咁就冇人會嘈啦!
    其實呢個辦法可行架,嗰時唔使請班高官,慳番啲人工都有剩啦,咁咪幾好!
    當然有工梗係要做工,只不過有中央包底,到時班權貴同商家佬就唔使咁囂張!

    回覆刪除
    回覆
    1. 在下相信、到了由上面派人落來管嘅時候、就是黃土地上漫天戰火之時矣!

      刪除
  8. 老實講, 我係愛國愛港架, 之不過我講明唔去角逐, 因為未表態去馬已經被起底監聽, 好多唔記得有無做過或者真係無做過都變咗好似做過, 咁着數嘅嘢都唔好預我咯.

    回覆刪除
    回覆
    1. 哈哈、說得好呀、這大概叫作色即是空、空即是色吖嘛....

      刪除