奇幻的往事

既離奇
又古怪
死人再翻生
醒來便表態
話說城門人擠擁
還陽兩日返陰界
.
有一次到同學家中與uncle閒談時、他對我講起在年青時在某電台當記者、曾遇見過的一件匪夷所思的事。事情大約發生在60年代初期、有一天他接到消息指有個阿婆死而復生、於是立即趕到現場進行採訪。到場後見到那位曾被醫生判定死亡的阿婆正在躺在病床上、而且病房門外早已經聚集了一群記。由於uncle是電台記者、所以容許進內訪問。阿婆的家人說、當收到醫院通知時實在難以相信此事是真的、因為阿婆斷氣時有家人也在她身邊的。但是uncle望見阿婆精神很好不似有病、於是要求直接訪問阿婆：



uncle：阿婆、妳覺得好嗎、有冇唔舒服？

阿婆：我冇唔舒服。

uncle：妳知唔知到自己發生過咩事呀？

阿婆：知！我去到一個城門度囉！

uncle：咁妳驚唔驚呀？

阿婆：唔驚。

uncle：阿婆、妳知唔知嗰度咩地方呀？

阿婆：嗰度好黑仲好多人排隊、好迫架！

uncle：嗰啲人排隊做咩呀？

阿婆：佢哋排隊入城囉。

uncle：咁妳又做緊咩嘢呀？

阿婆：排隊囉！

uncle：妳知唔知自己點解要排隊呀？

阿婆：人哋排我咪跟住囉！

uncle：咁妳有冇入城呀？

阿婆：冇呀！有個官差話我知太迫人喇、要過多兩日先至輪到我喎！

uncle：官差？係唔係差人、着咩衫架？

阿婆：唔係差人、佢好似做戲嗰啲咁架！

uncle：咁妳後來點呢？

阿婆：我咪响哩度囉！


由於醫護人員認為阿婆須要休息、訪問到這裡便結速了！uncle臨離開前給阿婆家人留了一個電話號碼方便聯絡。更奇怪的事就在兩天後發生了！阿婆家人打電話給uncle、說阿婆終於離開了！當時這段訪問聲帶播出街是十分震撼的、相信年長一輩的人可能還有點印象的。這件事在我的心中也留下極之深刻的印象。因為阿婆曾經說要再過兩天才輪到她、結果兩天後她真的走了！到底是阿婆發夢、抑或事有湊巧、還是確有其事、就不得而知矣！