插針樓的啟示

你謀我又謀

為地打崩頭

官商無義氣

眾生變人球

唔記得由幾時開始、紫荊城流行反對浪潮、但凡由府衙提出的都要反、係又反、唔係又反、總之就反個不亦樂乎就是。例如明明人人喊督爺多建公租屋和公賣屋、點知督爺話手頭上嘅土地唔係用來益街坊、而係留待用作祝賀租界邊疆人民添丁之喜嘅。唯一方法就係向交野公園和鬧市之中嘅窿窿罅罅打主意喎！之但係當政府一開聲、四方八面的抗議之聲就響起來。究竟問題出在那裡呢？

其實租界的地是不少的、問題是被人捷足先登囤積起來。一直以來政府眼巴巴的看着人家囤積土地越來越多、而己自就發地瘟也不想想辨法。地產霸權之所以能夠稱之為霸權、原因是透過收購丁權和囤積地皮、從而影響樓價、再由樓價去影響租金吖嘛！坦白講、今日之所以搞成咁、罪魁禍首就是前朝奉行割地賀添丁政笨嘅殖民地政府。早在六十年代殖民政府為了發展租界、就大慷他人之慨、實行以你生仔、我封地嘅形式去祝賀疆民添丁。正如租界王八叔話齋、淨有地有個屁用咩、有錢至食得飽吖嘛！因此當疆民收到封地之後、便拿去向地產霸權交易矣！

既然有銀就通、那就容易辦。阿域就有ABC三條橋、不過在下計算過A橋and B橋都唔啱督爺使、咁就免費送條C橋過佢嘆吓啦！呢嗱、既然政府有地割冇地起樓、那就索性大開庫房盡慷紫荊人納稅之慨、以賠款代替割地。這樣做既可以令到疆民重新成為特督嘅忠實支持者、又可保證唔會差錯腳誤闖黑色飯局、更重要的就是可以將地產霸權嘅利爪拔除、然後由自己取而代之、意思係唔再做扯線公仔而做扯線人。當人們都有求於督爺嘅時候就會變得又謙卑又聽話、更加不會再有人暗中放水出街沖擊他的房屋和其它政策。當職業抗議集團嚴重缺水既時候就會陰乾而倒閉、集體上街嘅活動勢必成明日黃花、到時阿爺定必龍顏大悅、那麼督爺到咗約滿退位之時就無用擔憂冇錢途啦！係冇？今時今日紫荊城的百般煩亂皆由土地而生、惟有掌握土地主導權才能維持穩定。不過搞呢家嘢定必牽連議事堂內外所有利益集團、問題是督爺敢唔敢去碰而矣！