世界爛仔

三煞圍攻君未知

五行逆倒變乞兒

人到頹時膽自喪

取之無道確當誅

花家這個世界頂級社團自從由喪普當上大佬之後、一下子就由世界判官化身為世界爛仔。喪普一味恃着拳頭打爆石就四處踢索、順者不昌、逆者即亡、果然係毫無義氣一心食夾棍嘅超級惡霸。

在早排之嘛、喪普借頭借路在斷估冇辛苦情況下、拉攏忽裂顛一姐霉菜姍和發難西大佬馬黑蟲聯手向聚利瓦狂掟炸彈、炸到阿殺得個地頭機乎冚包散晒咁滯。有人話、如果阿殺得像肥恩一樣擁有核武就唔會被人打喎！但實情係、肥恩有個叫紅家嘅大隻佬鄰居長期睇住、老番才不敢妄動。中東雖然有灰態京派人過去睇住、但畢竟係「遠水救近火」無濟於事、所以挨打係必然的。之但係、喪普今次卻遇上了閘王呢個大剋星了！當喪普喊着要向五億入口紅貨徵收懲罰性關稅時、閘王立即跟上了！當喪普再喊追加十億時、閘王也跟了！喪普見閘王定夾自然當堂扯火、於是下令禁止花家生產商向燶興通訊公司提供軸心晶片、企圖整死這家每年在花家銷售超過一千四百多萬部手機嘅龍資公司。正當喪普想話乘勝狙擊娜惠電訊公司時、該公司忽然宣報將會在明年下半年推出全球第一部嘅 5G 手機、並聲明手機芯片百份百係紅家製造。

俗語都有講啦、世事無絕對吖嘛！無論娜惠公布嘅消息堅定流都好、總之呢一巴都可謂摑得喪普滿天星斗咯！喪普一心諗住再加一萬億紅貨關稅、閘王就就再無反擊之力。因為花家進入紅家嘅貨品沒有紅家進入花家的多。注於紅家為何還不拋售花責或使人元貶值、可能係選擇停止購買花家石油。呢招除咗可以抵銷撤喪普所追加嘅一萬億紅貨關稅之外、最妙就係呢拳打出去、絕不會像狂拋花責般的「傷敵七分、傷己三分」吖嘛！