2018年3月31日星期六

喪普使用奸商計?



黑仔當年唔知埞
踏入南海充硬淨
喪普表面裝獠牙
露出生蟲扶手柄

2016年當賓仔前大佬亞基奴取得海牙偽法庭判賓仔南海主將獲勝後、花家前大佬奧黑馬下令、派出兩個航母戰鬥群跑到南海也文也武、一心想嚇窒紅家。殊不知、閘王有準備、召集了東北二海監隊會合南海監隊、亦準備數百架新形戰機和無人機、以配擁有航母殺手 DF21 導彈嘅二炮(今天的火箭軍)部隊、準備跟花軍在南海大打一場。當花軍太平洋總司令(架花混血兒)揩利斯聞到𤓓味時、便大驚失色、急速召回南海嘅兩大航母戰鬥群。從此揩利斯就視紅家為死敵了!

2018年3月30日星期五

好耍得



阿姐發財又發德
有人有脈有姿質
偏偏遇上霉酸氣
嚇壞佳人更受屈

呢嗱、除咗勝利容易沖昏頭腦之外、原來人坐得越高頭腦亦會越昏架!我哋嘅打得姐本着畀面老朋在嘅心情出席白鴿會嘅壽晨派對、並少少哋拎三萬両出來買枝白鴿標之嘛!點不知、咁都被人解讀成一姐當眾聚賭。更弊家伙就係、唔知邊個咁大整蠱、在佢𠸎白鴿會朋友合影嘅照片上寫上「大禾鞋」三隻大字、搞到城中嘅大喇吧、小喇吧吹到鬼殺咁嘈。起初打得姐都懶得理啲咁嘅噪音嘅。之但係、佢越係唔出聲、嗰啲大小喇吧就吹得越係大聲。於是佢咪話畀大家聽、照片上嘅字句係同事多手加上去嘅囉!嗱、我係相信打得姐架!信係有兜㕲嘴在未得打得姐同意之前就擅自擺佢上神台架!呢壇嘢令到打得姐形象受損、仲弄污糟中廠個招牌、簡直係罪大惡極、若不即炒焉能以儆效尤?唔知炒咗未呢、吓?!

2018年3月29日星期四

非法 合法 枉法



非法成合法
有龍大家刮
食完舐舐脷
添食嘴唔抹

罪惡城果然係遍地黃金、問題係你曉唔曉得、有冇本事、夠唔夠膽去執之嘛!嗱、我哋嘅管治單位趕絕籠床、就係為咗避免受到呢類不人道嘅居住環境拖累、而破壞東方之豬嘅美譽。如今總算做到拆籠床蓋劏房、在幫助劏房業主提高收入之餘、亦成功為基層低端群組提供太空倉式睡房、千層糕式床位、以及一腳踢式蚊形套房任君選擇。有咗這類世界第一「貴」嘅新形住所、足以證明我哋罪惡城係冇窮人嘅。所以嘛 … … 雖然居住質素不變、劏房業主就變成富翁了!對於劏民來說、唔同嘅就係、當年做籠民還有能力吃好些、吃飽些、而今日升呢做咗劏民之後就要睇餸食飯喇!你知唔知到、點解近年煙民人數不斷下降?原因咪就係在於一個「慳」字囉!

2018年3月28日星期三

2%風險都死人



心術不正夾搵丁
醫療格局兜巴升
當家大姐圍威喂
良知賣出八九成

繼早前一名公家醫院聘用嘅(特約)外科醫生在手術期間忽然掉低已被開刀嘅病人留在手術室、而自己就返回私家醫院做另外一個手術、數小時之後才回到公家醫院繼續先前手術嘅驚人聽聞畸屎之後、現在又輪到一項被外科醫生介定為只有 2% 風險嘅手術搞出人命嘅個案來。據醫院解釋、手術是成功的、只係病人在手術後出現併發症而死亡。在下唔懂得醫理、但據死者家屬講、當醫生從手術室走出來時表示手術很麻煩極之難做、似乎在暗示病人可能會蒙主寵召。冇錯、任何手術都有風險、而病人亦在事簽署認知風險確認書嘅。之但係、只有2%風險嘅手術都搞出人命、又確實係不可思議嘅。

2018年3月27日星期二

誰說本城無毒?



五毒同盟共一窩
呢班正係大泡和
一旦坐埋奢大奅
呃財騙食夾囉唆

呢嗱、舊年已經話咗、過完農歷年黃營裡面班毒友又會搞嘢。因為去年底江湖上己經流傳、花家大佬喪普將會在今年會對紅家發難、城中嘅反派必定會如往常一樣有所配合。前幾日、過氣白鴨幫坐館瞓街姐、戰中搞手之一嘅妖蜓、被打柴嘅支那情侶、以及各家大教館嘅毒生會頭目、趁花家向紅家發動首期貿易戰之際、便齊齊前往台島與綠營嘅反紅咎覺青年團一起參加五毒(臧毒、疆毒、蒙毒、台毒、港毒)論壇。其間、妖蜓現出真身、並且口沫橫飛的指出、反紅和反一家獨大很快就會成功、還要老屈罪惡城街坊正在考慮應用「銀紙自決」來到決定是否「毒臘建國」、企圖騙取老番嘅NO泵水組織更多銀両。

2018年3月26日星期一

知衰就改啦



唔怕派得奀
記堅要平均
租金平民化
自可免紛爭

人係咁嘅、齊齊閉翳相安無事、錢分唔勻肯家出事。自從阿茂宣布派銀之後、登時變作萬人插。雖然阿茂再三變陣以謀補鑊、但依然逃不出萬人插嘅命運。坦白講、阿茂派銀要一年後才能兌現、擺明唔係急街坊所忽、而係選擇性買人怕、唔被人鬧爆才怪。人係有貪念嘅、家陣現兜兜四千両喎、而且仲係街外錢嚟、梗係人人都想分一份啦!現在眼光光睇住人家個個有得份、獨係自己就食白果、除咗跌錢懶執嘅富人之外、剩下來嘅人當然嘈到拆天。古語有云、不患寡而患不均。凡係着數呢家嘢、一係就斗零都唔派、一係就派得勻循啲、而且要快。咪過像呢趟咁、置人性存貪念之不理、連中廠基本面子都被丟埋、咁笨策吖嘛!

2018年3月24日星期六

貿戰開打




喪普盲舂似撞鬼
白頭老二待上位
花家親朋揗揗震
閘王企硬要發圍

花家老大喪普銷定六百億花元紅家進口商品提高關稅、並威脅紅家必須在今年之內減少花家一千億逆差。意思係話、無論紅家有沒有須要都好、總之一定要加大購買花家要賣給紅家嘅貨品、但不包括紅家想賺買嘅高科技產品在內。換言之、就是迫紅家白送他一千億花元。難怪今次連閘王都扯火、並透過半官方喉舌蠻求社以「花家膽敢切紅家一片肉、紅家就打掉花家一隻牙」去回應喪普回應啦!嗱、喪普明目張膽違反「細貿」規則而對紅家發動如此霸道嘅貿易戰、究竟其目的為何呢?如果純係為縮短貿易逆差、大概可以坐低慢慢傾、無須要撕破跟紅家簽訂嘅建交協約、准許花軍戰船靠泊台島港口、以及准許花軍方頭領跟台島軍方頭領互相交往。因為咁做隨時會引發街坊軍以武力收回台島的。

2018年3月23日星期五

善惡一線差



越聽越覺無厘頭
口水浸瓜大水牛
蚊蟲曱甴皆謀動
簷前滴水也倒流

嗱、一姐白在鴨幫畀面派對豪擇三萬両銀點唱費、居然一石擊起千重浪。近日榕樹頭說書人東方不敗指出、中廠一姐跟總舵主對着幹。這指控實屬非同小可、一姐假假哋都係罪惡城第一號人物、手中掌控着本城富貴與閉翳嘅命脈、如果話佢作風打例蹆還好、但指佢跟總舵主對着朝乃係以下犯上嘅死罪嚟、係唔講得笑架!之但係、一姐三名副手實在太過唔爭氣、否則亦唔會招惹咁多莫明其妙嘅指控。首先、戒律堂一姐剛上任就踩中地雷、揗雞起嚟將所有護花踐紅嘅一干人等全部放走。其次就係財務一哥派錢都派到神憎鬼厭、比前任嘅廢柴大長櫃更加廢柴。第三係內務大總管呢頭話誓要打柴四子將落咗袋嘅銀両嘔番晒出來、嗰頭又教追數組在收數不成之後點樣撇賬喎!嗱、呢班大泡和做出來嘅嘢全都是示弱於人前、咁想話唔惹人惡批至奇啦!係嘛?!

2018年3月22日星期四

呷醋



罵我公然大細超
有口難辯懶得聊
這回志在威一次
內裡乾坤你未知

日前中廠一姐林亞井帶埋內務總管張電鐘、財務總管矛波陳、戒律總管脆弱蓮、以及蚊責班一眾頭領前往白鴨幫、出席該幫嘅畀面派對。期間老鴨明話李被安排上台獻唱、而一姐亦識做、馬上大解慳囊捐出三萬両銀以示支持。殊不知在翌日、身痕幫首領葉亞柳(掃把姐)、以及問卷聯首領旺角健兩人異口同聲、齊齊指責一姐做法等同賣票、做壞規舉喎!旺角健質疑一姐日後點至能夠做到一視同人。另一方面、葉亞柳亦質疑、如果佢派愛將開地榕上台獻歌又唔知值幾多両喎!嗱、講來講去都係埋怨一姐局部性色盲、眼中只有黃色而無藍色、才覺得冇飛屎之嘛!

2018年3月21日星期三

禍的根源



禍的根源在不公
香城錯在製貧窮
但求賺得三餐食
顧得租來兩袋空

無論你鍾唔鍾意聽、事實係唔會為閣下嘅意志而改變。當下罪惡城街坊面對着嘅係資源分配過於偏則而造成不公、以致貧者越貧、富者越富、仇官仇富已成氣候。吓、話我老作?嗱、三四年前發生嘅「戰中」和「汪暴」案件尚未審完架!知冇?仲有呀、你哋真係唔記得「鳩烏」同埋「港毒」係點樣發生嘅咩?你話啦、點解我哋嘅社會咁多事幹嘅呢?如果話、嗰啲㷫合合嘅街坊唔係針對「正苦」和「副蠔」唔通真係針對「共餐黨」咩?家陣在職貧窮越來越嚴重、租金和樓價都成為世界冠軍、但「正苦」寧願花數以十億計嘅銀両去供養假難民、對本地貧民卻分毫吝嗇。如果你係搵朝唔得晚嘅街坊、你又會點諗?

2018年3月20日星期二

堅離地


瞓身打拼幾十年
青春換得世間錢
既是身染銅腥臭
開言離地見不鮮

大老闆講話一向穩穩陣陣、通常都會留三分餘地嘅。之但係、當大老闆無職一身輕嘅時候、就顯得有點輕飄飄了!在某個公開場合、大老闆奉勸一位(聲稱其女友咬定冇樓就唔嫁)大學生仁兄嗱嗱聲飛咗條女。呢嗱、講話咁風涼、唔似係大老闆平時嘅作風。唔知咁算唔算係、人到無求講話寸呢、吓?!講真、女朋友話未賣到樓唔好結婚住、並不等同以後都唔肯嫁。事實上、男女雙方仍然在求學期間、一點經濟基礎都冇、正所謂連劏房都租唔起吖嘛!如果大學生仁兄依從大老闆建議飛起個女友、就真係戇居都唔戇居喇!其實、對於一個大學生來講、筆業後賺錢賣樓、是一種推動自己住上爬嘅動力。飛起女友、實際上係一種愚蠢不堪嘅消極做法。喂喂、大老闆、你有冇老點後生仔架?

2018年3月19日星期一

反智


今天打倒昨天我
如此反智唔多妥
兩營互片皆霎戇
搞來搞去都係錯

所謂「有政治、無道義」又有新例證喇!同一件事、同兩幫人、在不同時間居然可以事非顛倒和角色互轉、彷彿之前所發生過嘅事從來沒有發生過咁款。在未來開支預算報告出街前、藍營尊貴及藍媒一唱一和、要求公家開庫派真銀、以示還富於民。然而、黃營及黃媒卻齊聲反對、並指派銀只會浪費金錢和稍弱公家建設社會嘅能力。好嘞、到咗垃圾填氹擂台大賽打完之後、勝出嘅黃營代表即公開叫喊公家派真銀、而藍營及其傳媒則齊齊指責黃營喊派真銀是窒礙公家建設未來。喂、阿哥、阿姐、究竟你哋兩班友搞乜嘢架?點解會在同一件事之上出現角色互轉咁反智嘅?你哋令街坊威覺好混亂喎!

2018年3月18日星期日

不是貿易戰


喪普自大夾揗雞
怕見蛟龍在發威
公然發難施打壓
奈何冇力化厄危

花家大佬喪普憑空指責紅家補貼出口鋼材而威脅花族工人飯碗、並針對入口鋼材徵收懲罰性關稅。在下本來有點奇怪、喪普為何要拿鋼鐵入口量最少嘅紅家來做箭靶。直至前幾日才知到其真正目的是甚麼。正當受到牽連嘅花家盟友人人面黑、個個嬲爆嘅時候、喪普忽然宣聲盟友可以透過雙邊談判而獲得豁免加稅。江湖傳聞指、喪普嘅目的有二。一、迫使盟友跟他單對單講數。二、迫使盟友跟花家合作、齊齊對紅家產品增加關稅。唔使問阿貴都知到喪普是為了要壓抑經家經濟發展和破壞一水一路計劃。問題係、以紅家今天如日中天嘅情況而言、喪普這種街邊爛仔嘅屎橋仲行唔行得通?

2018年3月17日星期六

你老闆退休了



深謀細度似水青
治事必須步步營
不疾而求出手快
順天行事免張聲

江湖上盛傳、近年與總舵主不大咬絃嘅力牆號大老闆 Singer Li 終於宣布退休、並將大權交與長公子 Big House Li 。據說在豬狼鬥一役之中、大老闆拒絕總舵特使榴槤東提出支持阿狼嘅建議、並堅守撐鋼閘文支持嘅阿豬嘅承諾、而跟總舵鬧得很不愉快。從那時開始、大老闆便開始將大圈物業陸續出售、連罪惡城嘅大型物業也賣出去、甚至將自己嘅大本營遷註刪地也移到外地去、最後還索性將自己也「過底」給楓葉家、從此跟紅家劃清界線。據說、大老闆之所以做得咁徹底、就是要他與總舵所有嘅恩恩怨怨全都攬晒上身、好讓他的後人在無「恩怨包袱」嘅情況下獲得更多發展空間。大老闆寫下「算過度過、層次分明、穩中求快、順天行事」四句名言、贈予長公子作為座右銘。

2018年3月16日星期五

忌吉王又病發



傻堅向來多忌吉
判爺見佢氣都咳
大影細國收容佢
咪在香城做阿七

俗語有話、教而不善應該打。嗱、如果打手板都仲係教唔聽、就必須施與重罰、務求滋事者能夠感覺到乜嘢叫做痛才行。絕對唔應該好似今日嘅六判爺咁、高高舉起、輕輕放下、任由嗰啲傻人拿六判爺來消遣吖嘛!吓、我講緊邊個?唓、之唔係綽號「長島忌吉王」傻堅囉!嗰條友被「法喚處」拒之門外、又被六判爺罰佢交「糖費」仍然係冇有識死、繼續將六判堂當作係佢嘅遊樂場。傻堅今次又要針對銀建聯代表鄭亞信嘅當選而要求翻案。理由係鄭亞信所代表嘅幫會「銀子建港」跟「銀子建國」同屬毒派組織。嗱、你話嘞、傻堅呢壇嘢係咪專心要拿六判爺來消遣?

2018年3月15日星期四

豬嘜



狀棍暗搞鬼
豬嘜二仔底
兩者成一對
神仙冇眼睇

所謂「天作孽、猶可恕、自作業、不可逭」吖嘛!上次負責看守「填氹擂台大賽」門口嘅閹雞委員會(閹委會)䁯眼瞓、唔覺意又放咗幾個毒派代表入閘打擂台而鬧到滿城風雨。殊不知、今次班閹委忽然瞓捩頸而重蹈覆轍並觸犯眾怒。藍思企圖以「弱軒非法入閘」為理由向六判堂申請翻案、並希望藉此打掉弱軒嘅尊貴資格。另一邊廂嘅長島蝠瞎王傻堅亦以「銀子建港與銀子建國兩者同屬毒派」而要求翻案、藉此打掉銀子建港代表扔舜嘅尊貴資格。現在又輪到被拒絕入閘嘅兜庭以閹委大細超為理由、要求六判爺宣布填氹大賽無效。由此可見、篩委會辦事唔清唔楚、搞到全城亂七八糟、毫無準則可言。難怪社會上對篩委會惡評如潮啦!

2018年3月14日星期三

遲早都爆鑊



好言相勸懶得聽
橫批直打最靈擎
當堂踢爆污糟事
咪洗銅銀夾大聲

俗語都有話、久久唔出聲就會冇人驚。本城既然已經回到神州懷裡、理當安份守己為自己為神州作貢獻至係吖嘛!殊不知有班人妄想將罪惡城當作為反紅基地。從那時起、罪惡城嘅政治氣氛就變得越來越緊繃、還令到社會分裂成為兩極。雖然江湖上一直流傳、謀些幫派勾結白番在城中搞鬼。但普羅街坊似乎並不太在意、甚至不以為然。然而、一旦見到紅家大員對中廠有所提點時、就有人跳出來指責紅家干預罪城事務。相反、那些如過氣嘅前朝嘅罪城揸拂人、外族長老會長老、偽民間組織等人或機構、無論是在千里之外向本城發功、抑或係直接闖入本城指手劃腳嘅時候、卻無一人敢跳出來表一聲示反對。這大概這就是罪惡城「門口狗」特式了!

2018年3月13日星期二

敗在樣子帥



不怕生壞命
無懼改錯名
只是人樣帥
街坊瞓捩頸

呢嗱、所謂一沉百踩、真係一啲都冇錯。人稱「樣子帥」嘅重閹哥呢頭打輸擂台、嗰頭就被人鬧到狗血淋頭。罪惡城人情薄過紙確實可見一斑咯!請看看另一邊廂打贏擂台嘅飯殼哥幾咁風騷。佢雙腳剛踏出比賽場門口就有大紅花轎等緊佢。啲啲咑咑咁打道回府認真威風。有些自稱黃思擁躉嘅人士透過大氣電波罵重閹哥高舉「被打柴」個招牌參加打擂台已經係不智、在比賽之前唔記得戴番個面具遮蓋自己個帥樣更加係大錯特錯。黃思人士仲話、重閹哥一向靠個猙獰面具嚇怕對手吖嘛!殊不知佢居然聽信豬八萬獻計以自己副帥樣去面對敵人、使得本來畏懼他三分嘅對手領信井越戰越勇、並在最後一刻鐘將他擊倒、簡值係累街坊喎!喂喂、黃思哥哥、閣下咁講法、豈不是天生靚仔都係罪過嚟?唔怪得罪惡城被叫作罪惡城啦!

2018年3月12日星期一

賽後評



場面未算牛
總算有睇頭
槍打出頭鳥
順流勝逆流

三點一一補打大賽已經曲終人散、結果是、黃藍兩營各取兩席打成平手。經過一場唔算太熱烈嘅格鬧之後、講島賽果、毒派代表耦弱犬打贏藍營代表親家佩。西狗賽果、藍營代表淨領信打贏毒派夭重閹。伸東賽果、黃營代表飯殼打贏藍營代表戥假錶。宮能組賽果、藍營代表射米泉打贏黃營代表侍馬民。今次雖然是打成二比二平手告場、在骨子裡黃營已經輪掉兩席、所以形成藍營在垃圾會增加多兩個議席、而黃營卻減少咗兩席。因此在分組點票方面而言、已經係形勢不妙。

2018年3月11日星期日

阿蟲介紹


你說我差不是差
老董當年患眼花
諸家搭路黃家過
入了此門是我家

前財務大總管(綽號偷步財神)蟲蟲哥話、全民派錢乃係民粹式要求、還暗示提出派錢嘅政客係蠢才嚟。喂喂、蟲蟲哥、你老哥夠係大把銀両兼豐衣足食、還不是要趕在你寫嘅未來報告生效之前偷步買平轎、搞到被人鬧爆落荒而逃嗎?現在有人睇唔過眼、多年來民脂民膏盡入庫房、而揸拂當局卻無所作為、開出嘅支票冇張能夠兌現、所以為街坊爭取派現金來舒緩一吓腹中鬱悶囉!咁有乜嘢唔妥呀?你憑乜嘢去指責人家蠢才?咁就唔怪得閣下一手拿公家銀両、一手捐錢畀反對公家不遺餘力嘅幫派啦!看來閣一早就視其他人係蠢貨都未定喇!唉、中廠多年來都唔知養咗不少像蟲蟲哥這類身在藍營心在黃嘅人物、唔怪揸拂班子得一直都係渾渾噩噩咁過啦!

2018年3月10日星期六

新帝國主義



抐起肚兜來告狀
博你唔知佢亂講
幸得歷史能作證
有條瞀里餵毒糖

在二月一日花家大總管剃勒森在一場演講之中、警告拉釘尾洲家族不要過度依賴與紅家的經濟聯系、因為拉尾不須要新帝國主義。剃勒森指紅家利用經濟侵略全球、跟紅家合作會令到各個家族過度依賴紅家而失去主權、只有花家才是拉尾嘅最佳拍檔。嗱、現在就讓街坊們睇睇、究竟花大叔係點樣嘅一個最佳拍檔嚟啦!

2018年3月9日星期五

放生放上引



世上向來多騙子
何必專挖舊陣史
得知真相又如何
頂喉頂肺冇藥醫

再過兩日就是第一期「補飛」擂台開打嘅大日子、而擂台篩選委員會(篩委會)係有責任阻擋毒派人士混上擂台的。之但係、在參賽者名單上卻出現(曾經公開焚燒歸本法)耦弱犬的名字。藍族當然唔高興、並要求篩委會取消耦弱犬嘅參賽資格。嗱、呢趟我又要撐一撐毒派喇!我唔知到藍族投訴人係眼大睇過龍、抑或係有其它原因而睇唔到名單上除咗耦弱犬之外、還有剛被打柴嘅夭重閹也被列入參賽者名單之中。既然連與台毒結拜嘅夭重閹都可以名正言順上台參打、點解耦弱犬就唔可以?喂、篩委哥、究竟你哋有幾多套標準架、吓?!

2018年3月8日星期四

唔提話事



何謂真真何謂𧥺
各人視聽各繽紛
諸君咪話唔通氣
聽我講來像嚿雲

當記者追問打得姐、對於紅家會二當家木子哥並冇像往屆一樣在其未來計劃報告內提及「由你話事」一詞時有何睇法時、佢只係話有啲嘢大家心照就可以、無須經常掛在嘴邊喎!嗱、呢啲咪就係前朝精英應對圓滑嘅精彩之處嚟囉!不過咁、無論幾圓滑嘅人都難免會有條脷打纈嘅時候。例如上次大炒車之後、打得姐公開以 “很多謝總舵關心、罪惡城揸拂堂有足夠能力做好所有善後工作” 去回應總舵主傳來嘅慰問。本來一句平常嘅回應、係唔應該有問題嘅。之但係、如果話中出現咗劃蛇添足嘅情況、又或者有異於慣常表達方式嘅話、就很容易令人有所聯想。

2018年3月7日星期三

貧富傳說



蟻民心聲官爺聽
聽完之後懶得傾
只見連場假肉搏
雞同鴨講事難成

昨晚在榕樹頭聽班街窮坊傾偈、發現佢哋嘅話題不離挨貴租、醫療服務、安老服務、全民退保等。坦白講、今日嘅社會上最嚴重嘅問題、確實係收入低而租金貴。其次就係、醫寮服務五行欠水並由病人來承受若果。班街坊話、從前尚可以靠積蓄養老、現在就連豆零都冇得剩、所以那應運而生嘅全民退休保障就成為佢哋嘅熱切期望。嗱、罪惡城兩大核心問題一日不改、衍生出來嘅問題必會越來越多。甚至可能會造成某些不合理要求變成合理化、到時想唔亂都幾難。因此公家必須認真去處理好居住問題、和努力開發高端工業增加打工仔向上流機會。現在嘅環境係太過集中於服務業喇、在僧多粥小之下、老闆當然笑騎騎、打工仔就只有挨到謝。假如仇官和仇富更加趨於嚴重、對誰都沒有好處架!知冇?

2018年3月6日星期二

明妥協 暗互撚



你演紅面我演黑
冬前臘鴨撇唔甩
先天注定唔爭氣
不作忠臣做阿七

打得姐呢頭話要促進社會和諧、嗰頭又批准劏房哥炮製嘅惹火未來賬目報告出街而鬧得滿城風雨。江湖流傳、今次事件令到搶得先機向揸拂當局要求派街坊嘅藍營政客、自取其懵。有人話、係打得姐布嘅局、亦有人話那是叛逆台嘅演員三碌木為了離間打得姐跟藍營之間嘅關係、而故意散播出來嘅流料嚟。嗱、打得姐使得一群恨她之入骨嘅響樹派人馬為她抬轎、實在唔簡單。如果我話班友仔係無事獻欣勤、你估會否有人信?就事論事、正在補選在即嘅時候爆單咁嘢出來、難免會令街坊聯想到有人旨在扶黃滅藍。難怪江湖上有咁多人質疑、究竟打得姐是姓藍還是姓黃啦!從種種跡象看來、我覺得傳聞不無道理。假如我係總舵主、我都會派些人在她身邊好好的照顧着她、免得她受到騷擾而擔擱公務。依我睇、在今後幾年內中廠嘅妖氣將會越來越旺盛、就算係張天師下凡都冇符。

2018年3月5日星期一

神仙難救



利是嫌少鬧跳樓
令入聽後猛𢲷
今日衙堂多孽障
再唔改革聽揸兜

呢嗱、勢估唔到有人因為逗少咗利事就要跳樓、仲搞到上埋新聞紙頭版。事緣一名久病一年並在年初五復工嘅豪宅護衛員(食蕉哥)被上司調派去守貨𨋢、搞到佢只能逗得一千元利是。食蕉哥諗起往年逗到萬多元利是錢、而今年所得卻連零頭都比唔上便心有下甘。就咁一氣之下、長期荷包乾硬化和急性發錢寒嘅食蕉哥決定尋死。於是穿起一件寫上抗議字句嘅衣服、跑到顧用他的機構辦公大樓玩無繩笨豬跳。經過一番擾攘之後、食蕉哥才被勸服打消輕生念頭。

2018年3月3日星期六

點解西方忽然翻臉?



你笑我瘋不是瘋
水陸兩門亦打通
老番呈現反紅化
共商狡計制蛟龍

當初阿爺向世界推銷「一水一陸」合作計劃嘅時候、白番覺得阿爺妙想天開。之但係、當阿爺真的提出成立「阿頭行」時、白番家族卻湧躍參加、只有架仔緊隨花大叔拒絕參與。當紅家跟拉丁美洲家族合作發展經濟時、花大叔覺得自己後欄被侵犯。當紅家跟南太平洋群島家族合作時、袋鼠家認定紅家要奪取其主導權。當紅家與東歐十六大家族合作時、得意豬也認為紅家要奪取其主導權。當紅家跟印度洋和喜馬拉亞山家族合作時、摩囉星認為紅家要取代其霸主地位。當紅家跟巴基星、波斯、阿富漢、等家族合作發展時、花大叔認定紅家旨在以該區為起點攻占非洲、然後再入侵東歐。唯獨是當紅家與中亞家族合作發展經濟時、並未受到西方暗抹黑。原因係、該歐是沙鵝勢力範圍吖嘛!

2018年3月2日星期五

搞好「憂」質教育



阿哥吝財拼命慳
全力解救太艱難
只係偶然失預算
反而救活眾生番

雖然庹縮大掌櫃被人狂罵孤寒、但他對個別政策範疇是非常厚待的。例如在教育方面增加24.8%撥款、總數高達1137億元、成為公家撥款最高嘅項目。相對而言、那些甚麼醫療、安老、綜援等撥款就濕碎得多了!大眾都有眼睇、本城嘅教育有幾禁“憂”質架啦!由其是大教館蘊藏着一群爛教頭、而這類家伙將人家仔女教到爛笪笪、仲教唆班學生去破壞社會秩序和安寧。嗱、公家撥出嘅款項係公帑嚟嘅、應該用得其所才對。因此撥款係必須有條件和有選擇性、唔以得現在咁不論好醜亂派一通嘅。眾所周知、慈善團體只係向那些品學兼優嘅貧苦學生頒發助學金、目的係為社會培植人才。之但係、公家卻實行見者得食嘅大鑊飯政策、以致社會上出現一大群粗口爛舌行為粗鄙嘅學雞。難怪街坊鬧爆公家出錢培養惡徒、危害社會安全啦!在下很想知到、當街坊都不信任公家嘅話、結果係對誰有利、對誰有害呢、吓?!

2018年3月1日星期四

庹縮預算



庹到離晒譜
門票換元寶
街坊唔夠運
又見守財奴

早就料到今年嘅財政預算一出即遭鬧爆。縱觀報告內容、大致上係以上次阿𠾍嘅預算報告為藍本稍作加減湊埋一碟便上枱。不過新人士點都會有啲新創意嘅。因此劏房哥建議向每位小學生派發海記公園入場卷一張、但唔派家長嗰份。如果家長諗住唔好嘥咗張飛嘅話、記緊帶多啲銀両去陪仔女齊消費。難怪有人話劏房哥比阿𠾍哥更加算死草啦!依我睇、奇實劏房哥闊佬至奇。眾所周知、佢老人家當年係出租劏房、炒賣物業、囤積地皮嘅大行家嚟、嗰個淨係曉得嘆咖啡和睇法國電影嘅阿棄哥同佢挽鞋就差不多。從前阿𠾍奉命掌管大賬房鎖匙以牽制阿狼、今日劏房哥奉命掌管大賬房鎖匙來牽制打得姐、這叫有禮上往來。嗱、各位街坊、其實大環境一切冇變、為乜要鬼殺咁嘈啫?