別以為玩得精明

以為精甩辮

過海變神仙

原來鬼揞眼

上錯賊公船

呢個世界上做正經事唔公平冇乜嘢大礙、最緊要就係做衰嘢嗰陣一定要公平。否則就必定會爆出個大鑊來。巡捕房夥計冒着坐監之險成功拘捕一班包括衝擊衙門、收取黑金、以及煽動和參與破壞公安嘅疑犯歸案、高等判堂卻率先判決第一名黑金疑犯無罪。繼而輪到無上判堂判決三名煽動和參與攻擊衙門嘅小頭目上訴得值、推翻高等判堂嘅監禁判決、並宣布維持下等判堂作出嘅守行為和做義工原判。剛上任嘅戒律長、以證據不足而宣布撤銷對黑金案一干主角嘅指控。嗱、以上班人收受黑金搞到罪惡城雞毛鴨血、重累到街坊嘅小本生意都唔知到摺埋咗幾多家。雖然黃亂單嘢畸屎搞到咁大壇、但全部涉案人等居然可以陸續甩身。然而、七捕快毆打淋尿賊男（表面輕傷）、以及捕頭棒打傷一名路人（表面輕傷）、呢兩單畸屎跟黃亂比起來簡直係蚊肶同牛肶、但所有當事人都要踎監、而且刑期絕對唔輕。咁你話嘞、呢單嘢大細超成咁、會引發起啲乜嘢後果呢？

江湖盛傳有人講掂數、你幫我一次、我幫你一次、下一次就輪到所有與黃亂有關嘅頭領全部冇事。據說可能會由戒律長出面、以證據不足為理由撤銷起訴。不然的話、就由六判爺以戒律觀點放生所有人。回報條件就係通過一份兩分、通過唱歌法、通過安全法。表面看來三比三打和。唔知到咁算唔算係“傷”贏呢？之但係、三叔公就唔係咁睇。佢老人家強調、輸家分明就係罪惡城街坊。三叔公仲話、恐怕往後再爆發大形群眾運動嘅時候、現場捕快人人則膊、個個諰縮、寧見死人冧樓都好過自己摱鐵枝吖嘛！咁搞法、街坊一定可以感受到乜嘢叫作切膚之痛。更重要嘅係、如果捕快控制不了現場、全城便會陷於無政府狀態。當一切都會被癱瘓嘅時候、城中最大嘅金魚缸必有大量金魚反肚、到時點止係普大眾感到痛？到咗咁嘅時候、街坊軍自然會出手接管全城治安。到時睇吓嗰班收取黑金搞亂檔嘅頭領之中、有冇人敢企出馬路擋坦克車？但三叔公一口咬定、連半個都冇。有死只有那群自少就被教館洗壞咗個腦嘅一群政治盲流。