天下大笑話

少鬼充城皇

世界也瘋狂

政治何其醜

靠害當幫忙

近日江湖上流傳、花大叔藉着提名傷殼三條𡃁（籮半蔥、兜捹匡、戇痴瘋）競逐落錯雨和平獎來醜化紅家嘅國際形象。但榕樹頭講古佬三叔公就認為、其實花大叔係姿勢多於實際。三叔公話、如果三條𡃁都能夠獲得和平獎嘅話、簡直係荒天下之大謬。三叔公形容三條𡃁好事做唔嚟、壞事又冇本事去做、連教靠把口喊人去縣府門口打衝鋒咁簡單嘅事都搞到咧咁𠾍、正式係屎坑關刀嚟。如果呢種人都可以獲頒發和平獎嘅話、被醜化嘅一定唔係紅家、而係落錯雨和平獎主辦機構、以及所有獲獎者。世界上亦只有花大叔呢種咁「禮義廉」嘅人、才會做出呢類咁「禮義廉」嘅事來。

講開又講、原來除咗花大叔鍾意玩「禮義廉」之外、還有米旗家（米家）長老會班長老都係咁鍾意玩呢家嘢嘅。幾日前米家一姐霉菜珊剛剛到紅家作客、佢班𡃁就好似冇王管咁款、話要學花家提名傷殼三𡃁競逐和平獎。講真啦、米花兩家本來就是同族同宗嘅兄弟、有相同癖性一點都唔出奇、但奇就奇在米家呢個大房阿哥吓吓都要被花家呢位離家出走嘅細佬牽着鼻子走。在罪惡城主流街坊眼中、三條𡃁只係任由大撞幫擺布嘅幾隻冇靈魂嘅傀儡嚟。佢哋根本上連自己係政壇小丑都唔知到、仲以為自己係萬人景仰嘅民族英雄嚟。由其是三條𡃁在法律上已經斷正參與暴力集結之罪、只係六判爺不正確引用新指引判案而利益歸於三條𡃁才能夠免去牢獄之災。然而、花米兩家居然提名暴力者去競逐和平獎、咁唔止係侮辱這個獎、而且連自己嘅家格和人格都影衰埋。因此、在下對於白番利用三𡃁來醜化紅家國際形象嘅講法太過一廂情願。嗱、呢個世界上沒有最荒謬、只有更荒謬。既然係咁、罪城街坊還有啥好介意？