2018年2月28日星期三

過橋咪𨃩



和諧進取兩皆空
武林猛人把我哄
欠債多多冇力還
好在阿爺合西中

昨晚在榕樹頭聽三叔公講、打得姐日前擘大雙眼發開口夢。打得姐透過空氣電波放話、佢開拓嘅大和解進展非常順利。打得姐自稱係順得人、反派一個飛電、佢就立即出現。反派叫佢到垃圾會、佢就唔敢去行企會。反派叫佢講東、佢就唔敢講西。一切依足吩咐、一點也不會多、一點也不會少、務求“就”到反派滿意為止。呢嗱、雖然我唔係親耳聽到打得姐講這番話、但由三叔公轉述出嚟、係應該有份量嘅。但問題係、點解身為中廠揸拂人嘅打得姐、居然會將自己形容到成個任人擺布嘅扯線公仔咁款、究竟其目的何在?

2018年2月27日星期二

誰是強者?



是假不是真
表面確難分
事實如明鏡
冷靜見真身

罪惡城之所以叫作罪惡城、原因只有一個。那就是、看似強嘅揸拂堂、實際上不夠強。看似弱嘅反派、實際上並不弱。在街坊心目之中紅家是強勢的、而反派是弱勢的。之但係、當你將近年黃藍兩族受到嘅待遇重新認認真真咁去翻睇一次、就會發現街坊大眾都被忽悠了!當年被黃族舉報偷步賣車嘅前財務大總管阿蟲嘅下場就係引咎辭職、其餘涉及錢銀個案嘅多名藍族人士都是被送入大牢做監躉。然而、被控以吞金亂講罪嘅黃族人士常無明明斷正都可以脫身、其餘一眾黑金疑犯更加係獲得大赦一律放生。獲得花大叔照顧嘅傷殼三條被掟咗入監倉都可以被無上六判爺掹番出嚟、而一眾怒火開年疑犯全部被判以重刑。嗰壇引致七捕快扯火而挨揍嘅罪魁淋尿賤男被判監五周、而有份逳佢嘅七名捕快則被判監禁超過兩年。雖然同屬反派、但在親疏有別之下亦有不同侍遇、想有運行就要趕快去埋花家堆至得喇!

2018年2月26日星期一

冤枉甘心



取締籠床造劏倉
劫貧製富更荒唐
公款盡填無底氹
欲建廉屋欠地方

聽聞話、今日劏房居民已經超過廿一萬。除咗上唔到公屋嘅窮街坊局住做劏民之外、還有一些行政人員和專業人士都係劏民嚟。佢哋之所以做劏民、無非係買唔起全球最貴嘅私營房屋、亦無法應付高企嘅租金而矣!其實劏房租金一啲都唔平、一間八十平方尺嘅劏房月租閒閒哋都要三四千元。但諷刺嘅係、揸拂當局有地賣而冇地興建公屋吖嘛!

2018年2月24日星期六

以核制龍?



老鼠拉龜難埋手
花家大叔嬲到嘔
妄言亂石掟穿頭
嚇鬼唔成自己憂

花大叔閣房拔皮書顯示、將駐守在呀洲嘅航母戰鬥群增加到六個、以抗衡紅家崛起。花大叔自知已經不能再拿北寒來做藉口、於是將面譜除了下來、直認唔妥紅家崛起。但花大叔出盡九牛二虎之力拉攏到南亞仔搞對抗、點知唔夠三個回合就被紅家化解咗。摩囉仔和安南仔只管財來直受態度依舊、硬係有講冇做。花大叔惟有拉攏同鄉兄弟成立「五眼同㒼」為重心、然後再發大來搞。現在花大叔已經顧不得核擴散呢個問題、嘗試將小型核彈頭安裝在巡航導彈之上、以便所有軍艦和戰機都可以攜帶和發射、妄圖以數千枚小型核彈團團圍困紅家、在必要時便炸神州一個稀巴爛。

2018年2月23日星期五

派錢啦



點解平民望派錢
原來真係氣都喘
一姐賣板應知埞
咪個鑿穿阿爺船

早前有人一廂情願話、大掌櫃劏房哥今期會向街坊派錢。嗱、唔知你點睇、但係我就唔多信。經過上次派錢一役、劏房哥一定意識到派錢對其個人無半點好處、但弊端就多到用十隻手指都數唔完。試問佢點會戇居到舂個頭埋場?嗱、無論劏房哥點諗都好、點都改變唔到街坊渴望公家派錢嘅事實。現在嘅問題並唔係劏房哥會唔會派錢、而係公家應唔應該派錢。講到這裡在下實在有點佩服打得姐。當劏房哥公開表示會就是否派錢這個問題諗諗之後、記者就跑去問打得姐是否會派錢、而得到嘅回答就係大掌櫃自有打算。就係咁、個波又交番畀劏房哥了!

2018年2月22日星期四

我撐丐幫



全城不透明
丐幫詐大型
衙門揸正做
犯者以法繩

丐幫數名代表在大年初七早上跑到公家辦公廳門外晒馬、要求揸拂人打得姐從速將過氣揸拂人阿狼押去六判堂受審、並立即將新任戒律長僭建姐炒魷魚。嗱、呢趟在下真係要支持一嘅丐幫至得喇!阿狼嗰單「U.L.」畸屎揼咗咁多年都埋唔到尾、難怪佢嘅對頭人心急如焚吖嘛!正所謂醜婦終須見家翁、有罪冇罰都要來個交代才對。講到僭建姐就更加係駕勢堂。佢一上任就唔理三七廿一、將前任戒律長(以畸屎拉布見稱)拉布哥所發出“由於證據多到倒瀉籮蟹、須要時間整合”嘅聲明推翻、而換上“唔夠料告”四個字、便將涉嫌收黑錢疑犯全部放生。僭建姐做得咁野火、除咗兜頭兜腦咁狂𨂽拉布哥之外、還要當全城街坊冇到。呢位野火成咁嘅烈女、再唔功成身退嘅話、遲早焫到全城火燭架!知冇?

2018年2月21日星期三

盡是假惺惺



耍完邋遢嘴藐藐
老點不怕眼眉調
人前擺出相對罵
關門隱事笑彎腰

初二零晨、我跑到榕樹頭夜店參加夜鬼會搞嘅架忌冷團拜、咁啱又與阿黃和阿藍兩位尊貴同枱。在傾偈期間、我問阿黃點解要提出取消烟火晚會、而唔取消埋花車遊行?阿黃話、花車晚會是飛雞公司出資舉辦、冇得阻止。我再問阿黃、點解會有取消烟花匯演嘅念頭?隔籬嘅阿藍勿然插口話、死咗咁多人、唔係表示一吓哀悼都唔得吖嘛?我記得阿藍都有份喊停烟火晚會、於是順口問佢點解唔留在家中哀悼而要參加團拜。阿藍話、已經哀悼咗、無須日日都哀悼喎!我問佢哋、搞到全城街坊冇烟花睇、累到酒店爆發退房潮而蒙受損失、但佢哋就跟我一齊醉生夢死、究竟對唔對得住班街坊架?那時剛好第一道菜上枱、於是大家齊齊舉杯喊飲勝。我在想、佢哋嘅做法、跟諸葛亮在柴桑吊慰(假惺惺)有何分別?

2018年2月20日星期二

誰在對着幹?



斷正公然放
反噬大炮狼
黃思成主導
老藍打退堂

呢嗱、罪惡城真係變得越來越核凸、而且核凸到你唔信。新任護法僭建姐剛剛放生一群反盟黑金大佬之際、黃思垃圾尊貴就立即反過來咬實前揸拂人阿狼在上任時隱瞞(youL)嗰單利益衝突畸屎死口唔放、並由白鴨幫準坐館三白眼跳出來喝令僭建姐揸正嚟做。嗱、三白眼之所以能夠咁快就成為白鴨幫當紅炸子雞以及獲得皮佬𡅏重用、並唔係單單靠看更李推薦咁簡單、而係有厚黑神功護體。反盟惡晒早就唔係新聞。之但係、如果僭建姐依從三白眼指示、剛剛放生黑金大佬之後、轉過頭就去追殺阿狼嘅話、除非係事前得到阿爺肯首、否則就犯上大細超之嫌、除咗被阿狼跑去評雞會告到佢腳痛之外、仲會令阿爺覺得被人剃眼眉、到時就弊弊都冇咁弊咯!

2018年2月19日星期一

開工大吉




晨雞遠去旺財來
恭喜諸君發大財
長年好運身體壯
家肥屋潤百花開

轉眼又到大年初四、雖然今天仍然是公眾假期、但有很多朋友都要上班去。在下祝願各位惱友記新年勝舊年、身壯力健、福星高照、財星進門。做生意嘅朋友大賺特賺。打工嘅朋友加薪升職、得閒中吓六合彩。BBand BB女人人聰明伶俐。求學嘅同學仔個個學業進步。退休後嘅朋友龍精虎猛、多福多壽。恭喜、恭喜。

2018年2月15日星期四

放生背後



放生原來是誘因
旁人看得似嚿雲
安樂過年添愉快
過年之後要執生

近日報導指出、有個神州學者聲稱、假如傷殼三條𡃁單畸屎在大六發生嘅話、佢哋犯嘅係欺宗滅祖之罪、如果唔係阿爺肯首嘅話、罪惡城嘅六判爺都唔敢放生三條𡃁喎!嗱、我唔知到你哋看完上面嘅報導有何想法、但我覺得呀邊個學者應該被拉去打八十大板羅友才對。因為佢口中嘅“阿爺肯首”即係話畀人知、阿爺係有後着嘅囉!你話嘞、如果佢唔係老屈阿爺、就係爆阿爺大鑊、咁係咪該打?

2018年2月14日星期三

天下大笑話



少鬼充城皇
世界也瘋狂
政治何其醜
靠害當幫忙

近日江湖上流傳、花大叔藉着提名傷殼三條𡃁(籮半蔥、兜捹匡、戇痴瘋)競逐落錯雨和平獎來醜化紅家嘅國際形象。但榕樹頭講古佬三叔公就認為、其實花大叔係姿勢多於實際。三叔公話、如果三條𡃁都能夠獲得和平獎嘅話、簡直係荒天下之大謬。三叔公形容三條𡃁好事做唔嚟、壞事又冇本事去做、連教靠把口喊人去縣府門口打衝鋒咁簡單嘅事都搞到咧咁𠾍、正式係屎坑關刀嚟。如果呢種人都可以獲頒發和平獎嘅話、被醜化嘅一定唔係紅家、而係落錯雨和平獎主辦機構、以及所有獲獎者。世界上亦只有花大叔呢種咁「禮義廉」嘅人、才會做出呢類咁「禮義廉」嘅事來。

2018年2月13日星期二

陳四姑回塘記



犯民共指太可憐
搲實老番隻爛船
懵然亂踢花家狗
看得花人盡眼冤

近日路過鵝頸橋見唔到「義靈異靈壇」嘅壇主陳四姑開檔打小人、原來係跑到花家去唱衰罪惡城、並惹得一眾藍族喉舌口誅筆伐。之但係、細佬我認為陳四姑今次係幫本城街坊出氣嘅、所以唔止冇鬧佢、反而撐硬佢至係。嗱、鬧還鬧、不過在鬧人之前、必須先搞清楚對方究竟做錯咗啲乜嘢先。冇錯、今次陳四姑跑到花大叔屋企確係唱到罪惡城嘅法治和人權衰到冇人有。但我認為佢講得一啲都冇錯。大家不妨睇睇“捕快拉人、六判放生。黑金直受、常無被放生。暴力集結斷正、傷殼三𡃁被放生。戒律長上台、黑金幫被放生。”嗱、就算係盲嗰個都睇到、所有着數盡歸黃族架啦!那麼、你認為陳四姑唱衰嘅係姓紅還是姓花嘅呢?

2018年2月12日星期一

血的教訓



無怨亦無仇
說話講過頭
你罵我失職
我跟你倒流

江湖盛傳、上周末在大煲區公路發生大巴失事(死十九人、傷六十三人)嘅原因可能是司機火遮眼所至。傳聞指有乘客在事後透露、由於司機遲到延誤大巴開出時間而被乘客責罵、以致情緒受到衝擊而火遮眼、結果在高速行駛之下導致失事。

2018年2月10日星期六

民主的真面目


民主令你發空想
搞你唔掂我冇獎
喪戇失衡傻搭夠
長此下去聽遭殃

呢嗱、主權在民呢家嘢係全世界最大嘅騙局嚟。嗱、一人一票選出來嘅抬島揸拂人菜英子登基之後就立即反轉豬肚、拒絕承認前任與紅家協家嘅狗耳共識、繼而扣滅退休公人嘅退休金、以及出賣選民入口花家豬牛肉和架仔嘅輻射海產、以致群眾示威抗議無日無之。菜英子唔止長期用防暴剌勒鐵線圈包圍其官邸、還下令軍方演練如何協助佢逃亡。抬島人大嘆、有了菜英子之後才知到馬鷹狗的好。花家大選結果係、獲得公眾選票較多嘅希揩利敗給獲得選舉人票較多嘅喪普。嗱、嘅然以選舉人票決定勝負、何必還要公眾投票?細查之下才知到、那是花家法規定的。難怪毛伯伯當年直指花家搞嘅係偽民主嚟啦!西崩牙嘅揸軚隆尼亞是該家族最富裕嘅地區、街坊唔想被窮困嘅西家拖累而舉行公投、並獲得九成人支持分家自主。結果民主還是敵不過強權、一眾搞手們通通成為階下囚而告終。甚麼真普選、公投、全部瓜直。嘿嘿 … … 民主喎!

2018年2月9日星期五

最緊要曉賴



甩身憑撒賴
撒賴建和諧
和諧好議價
議價有開埋

前任戒律長“賴”手頭上證據太多來不及整理、故此吞金亂講件案拖足三年都埋唔到尾。之但係、新任戒律長一上任、連張凳都未坐暖就“賴”證據不足、便將單案摺埋咗。高級判堂“賴”傷殼三指犯案當時新戒律指引尚未頒發、所以高級判堂引用此新例將三指收監係錯嘅、故此三指又重獲自由。嗱、真係賴得好、賴得妙、賴得呱呱叫。按照咁嘅發展趨勢看來、黃亂眾搞手直程係定過抬油都得嘞。即使罪城、大概都係被判守行為、極其量被判去做義工。甚至又來一次證據不足當堂放人都有可能。誰敢話呢條路鋪得唔夠靚?簡直係冇得頂拉!係嘛?!

2018年2月8日星期四

別以為玩得精明


以為精甩辮
過海變神仙
原來鬼揞眼
上錯賊公船

呢個世界上做正經事唔公平冇乜嘢大礙、最緊要就係做衰嘢嗰陣一定要公平。否則就必定會爆出個大鑊來。巡捕房夥計冒着坐監之險成功拘捕一班包括衝擊衙門、收取黑金、以及煽動和參與破壞公安嘅疑犯歸案、高等判堂卻率先判決第一名黑金疑犯無罪。繼而輪到無上判堂判決三名煽動和參與攻擊衙門嘅小頭目上訴得值、推翻高等判堂嘅監禁判決、並宣布維持下等判堂作出嘅守行為和做義工原判。剛上任嘅戒律長、以證據不足而宣布撤銷對黑金案一干主角嘅指控。嗱、以上班人收受黑金搞到罪惡城雞毛鴨血、重累到街坊嘅小本生意都唔知到摺埋咗幾多家。雖然黃亂單嘢畸屎搞到咁大壇、但全部涉案人等居然可以陸續甩身。然而、七捕快毆打淋尿賊男(表面輕傷)、以及捕頭棒打傷一名路人(表面輕傷)、呢兩單畸屎跟黃亂比起來簡直係蚊肶同牛肶、但所有當事人都要踎監、而且刑期絕對唔輕。咁你話嘞、呢單嘢大細超成咁、會引發起啲乜嘢後果呢?

2018年2月7日星期三

唔反告就笨


被人老屈去踎監
幸好終堂話我啱
終於洗盡寒酸氣
欲索賠錢要大膽

呢嗱、嗰頭黑金黨全部獲放生、呢頭雙殼三𡃁又獲無上堂放生。按照目前發展嘅軌跡睇嚟、下次應該輪到荔枝櫻、跪地妝、涼茶杰、鐵頭人等一眾黃亂頭領都會獲放生。對於黃思來說、都可謂得回一個清白、唔使再被街坊冤枉係看奸酒狗、確係可喜可賀喇!其實今次嘅判決並不令人感到意外。因為無上堂六判爺辣到麻早前已經放話、指高級堂對此案嘅判決大有問題。當時心水清嘅街坊就料到雙殼三𡃁洗脫距離沉冤及重見天日嘅日子不遠架喇!問題係、唔知身在北驚城嘅阿爺點樣睇今次嘅判決。不過、就算阿爺唔鍾意又點?案到無上堂、一判成鐵案吖嘛!家陣你吹咩?!

2018年2月6日星期二

冇法例就立啦



奇哉又怪也
隻隻劉皇馬
大樹無完枝
連鬼都怕怕

日前戒律長放生黑金黨引起街坊嘩然、當中有人直指那是一次政治交易。嗱、放生是否與政治交易有關就不得而知、但檢控長卻帶出“本城沒有法例規定不准政黨收受捐款”這個驚人訊息來。睇勻全世界都找不出一個國家係容許國內政黨收受外國捐款。因為這類捐款被視為黑金、收受者亦被視為危害國家安全。就拿自認是全球最民主和最自由嘅花國來講、在禁止政黨收受外國獻金方面、比起任何一個國家都來得更加嚴厲。為着確保國家安全、連總統喪普嘅寶貝女二萬卡交上龍裔富人朋友都收到政治警示。唯獨是罪惡城是可以不必顧及國家安全、而任由政黨收受外國送來嘅政治獻金。今次若非由檢控長把口講出嚟、實在難以想象罪惡城原來係沒有法例禁止收取黑金的。

2018年2月5日星期一

落錯雨訛評獎




落錯雨獎乃訿評
專門送給大懵成
無知小子甘為賊
話你唔聽詐大型

江湖盛傳、花大叔提名雙學三犯(兜捹眶、籮半蔥、戇痴瘋)競逐落錯雨訿評獎。嗱、三犯乳臭未乾就被花大叔升上神台、確係痕死隔籬。難怪社會上有咁多人唔抵得佢哋、並質疑三犯有何能耐去競逐落錯雨訛評獎?嗱、各位街坊、你哋千祈唔好去學人呷醋、更加唔好人云亦云至好呀!眾所周知、之前跟紅家對着幹嘅落錯雨訛評獎得主蟻驚生和流料波兩人、都係呢頭獲獎嗰頭近。因此有人稱此獎為死人獎。所以嘛 … … 你哋就唔好痕咁多喇!

2018年2月3日星期六

紅家斷送了多少國土?




屈得拼命屈
聞者莫氣咳
忠誠善其事
逢凶可化吉

嗱、久不久就有人跳出來指責紅家係敗家仔、白白將國土拱手讓人。其中包括:細伯利亞、開心威、半個黑核子島、真保島、銀窿島、撞南、新薑下雨西里地區、檬古、男海諸島等。但事實又係唔係咁嘅呢?不如先行參考一吓以下的資料、然後再由你來作出判斷吧!

2018年2月2日星期五

連審都慳番



你放我一馬
我幫你補罅
今日兩扯平
它朝再議價

俗語話齋、相嗌唔好口、相打唔好手吖嘛!所以喇喎、罪城縣衙實行來一趟大包容、主動向反派遞出橄欖枝、由戒律長來認真究研一吓、看看反盟五祖(掠人李、近身桃、涼茶杰、跪地妝、正盲巫)涉嫌收受西門墨提供嘅金山名產花騎黑柑單畸屎有冇灣轉。結果戒律長憑其個人專業知識判定、呢單畸屎打落去毫無勝算。理由係、經過深入研究過常無獲六判爺當堂釋放嘅理由之後、肯定手頭上嘅證據不足以將反盟五祖入罪。在阿超著褲嘅情況下、局住行使戒肆長職權將此案撤銷、並下令青天衙門不必再查落去。換言之、反盟五祖從今天起可以大覺瞓喇!

2018年2月1日星期四

剃人頭人剃之



挖人瘡疤人挖之
這回知錯已恨遲
街坊贊誠找真相
看誰真正在偏私

有句老話叫「剃人頭者、人亦剃之」是來自明末清初的一位匿名和尚所作的剃頭詩。此詩頗有諷剌世態之味、街坊們不妨讀一讀。詩曰:“聞到頭堪剃,而今盡剃頭。有頭皆要剃,不剃不成頭。剃自由他剃,頭亦是我頭。請看剃頭者,人亦剃其頭。”呢嗱、街坊們、這首打油詩對於罪惡城今日嘅景象來說、是不是夾到𠸊𠸊呢?在豬狼鬥一役之中、不是豬挖狼瘡疤、就是狼挖豬瘡疤。自那時起、本來已經搖搖欲墜嘅和諧猶如雪上加霜、社會迅速變成兩極化。白番見狀趁機以錢傷人、將早已暗中部署好嘅「黃雨遮運動」趁勢炒熱、然後睇準時機推上街頭博狼鷹鎮壓。幸好被阿爺及時喝停、否則大事不妙矣!雖則如此、社會兩極化已經定了形、亙挖瘡疤、亙相抹黑、無中生有等陰計陽謀層出不窮。