2018年1月31日星期三

品格檢查應一視同仁



為官清白乃必須
免得官賊兩埋堆
不容博亂圍威喂
市民代表要跟隨

自從新任戒律長被踢爆僭建之後、品格檢查在江湖上引起熱論。嗱、講起品格檢查呢家嘢、前講英衙門就做得最足、凡衙門顧員在入職前必先通過調查三代這一關。雖然今日搵勻整個罪城衙門都搵唔到一個有刑事紀錄嘅高官、但在啱曾當縣令時、就聘用咗一個政治犯爭七成來當局長。在六七暴亂時、爭七成於校園內向同學派發反講英傳單而被判監禁兩年、並成為罪城衙門首名坐過政治監嘅局長。在殖民地時期、講英衙門嚴禁市民挑戰政管治當局嘅權威、更加不容許任何人以學術自由來作掩護搞反乜反物之事、所以爭七成才會被拘捕和監禁。反觀今日、人們唔止在校園宣獨、甚至跑上街頭打正旗號來宣揚講獨都冇問題。難怪街坊常說、五十年不變只係為奉公守法嘅街坊而設啦!

2018年1月30日星期二

好戲在後頭



有得自有失
難以定凶吉
此間無大將
但有豬頭骨

自缺派打正旗號參加垃圾會補選擂台、想唔賴嘢都幾難。話口未完、自缺妹兜蜓就食正閉門羹。真係唔知點解班人硬係要搞到自己殘缺嘅。嗰個兜蜓遊行時十足扶柩咁款、扶住張比救生網還要大幅嘅「主權在民」布標語咩!吓、點解有份扶柩嘅鹽蟲么又可以入閘?咁係因為人家精甩辮、並唔似得眾痴班友咁黐線、在黨章闡明「我要自缺」吖嘛!就係咁、守閘員咪有藉口踢走兜蜓而留低鹽蟲么囉!不過咁、以鹽蟲么嘅人氣和聲望嚟講、入閘亦只不過係到此一遊、唔見得會有太大嘅驚喜。如果換轉人閘嘅係兜蜓、淨係自缺加講獨嘅票就足夠送佢登堂人室架喇!明未?何況守閘員此舉、已令到反盟班鬼打鬼嘅懵人白打一場兼大傷和氣、種下嘅怨氣更難化解、條數計落唔係除笨有精咩?

2018年1月29日星期一

暗溝裡的廝殺



明刀遇暗槍
當然有死傷
去者勿回頭
黃花晚節香

呢嗱、反盟元老二馬基在篩選賽之中敗給自缺派嘅鹽蟲妖之後便淪落為後備。二馬基過不了自己面子的一關、便黯然宣布退出選舉。反盟亦馬上公布尊重二馬基退出嘅決定。殊不知、忽然有消息傳出、鹽蟲妖將不獲批准入閘。二馬基想來一招回馬槍嘅時候、方發覺原來自己條後路已被反盟封死。嗱、反盟呢招確係快準狠俱備、明知到鹽蟲妖冇機會翻閹仍然擺佢上台將二馬基氣走、然後再擺架忌冷上台參戰。然而、二馬基果然唔衰得而喊劈炮、咁咪中正反盟下懷囉!難怪街坊話、要夾錢買一個大鐵鎚和一塊大鐵砧送給二馬基享用啦!無辦法架、誰叫二馬基從政廿幾年、仍然係一焫即㷫咩?呢趟都可謂老貓燒鬚矣!

2018年1月28日星期日

奇夢



七年一夢有玄機
夢見平生大痛悲
此夢說來真係怪
縱明真相亦稱奇

嗱、鬼古你就聽得多、發夢發出個未來唔知到你又聽過未?在下就簡短的將一位陳皮好友嘅一段難以解釋的經歷講出嚟同大家分享一吓。

2018年1月27日星期六

由老番豬噏講起



看似胡亂發噏風
原來內裡暗藏弓
嘴巴健全塞心眼
老點無力嘆詞窮

在去年嘅男驚大屠殺紀念日、得意豬駐紅家總代表(下稱豬代表)發文教導龍族點樣學會去原諒別人。豬代表以“加害者的懺悔者和受害者的原諒意願”來教導龍的傳人如何學懂寬恕別人。豬代表在文章中質疑、究竟龍族憑啥不先原諒架仔然後再要求道歉?嗱、呢種本末倒置嘅主意大概只有豬才想得出來。難這豬代表忘記當年得意豬家族嘅前老總火耳係點樣向意激烈(右軚人家族統稱)下跪懺悔求原諒嘅?仲有呀、得意豬政府將成座「被屠殺右軚人紀念卑」棟正在拍腍市中心、亦把「防止反右軚人主義」寫入其家法裡面。唔止係咁、當每新一屆得意豬大佬登基之時、都會重復代表其家族向右軚人懺悔和自我反省。嗱、豬代表應該解釋一吓、點解其家族須要認真反省和懺悔求原諒而架仔就唔使、究竟佢食咗架仔幾多茶禮?

2018年1月26日星期五

同你死過(二)



雖無大過有偏差
被人打到斷門牙
今天企硬挨亂棍
明日三倍奉諸家

新任戒律院院長淨如画日前接受電台訪問、並就一站兩份法律問題作出解釋。戒律長指出、罪城公堂有權受理和審核法例有否違反歸本法、而最終判決如何要看挑戰具體內容而定。嘩、咁講法、豈非等同指民大委員會(民委會)嘅決定並非一槌定音、而係要通過罪城公堂審核才算數?咁講法、民委會那面一言九鼎嘅金漆招牌在戒律長眼中豈不是連狗屁都不如?呢個觀點跟黃黨嘅睇法簡直係同出一轍嘅。難怪登時被人質疑、淨如画究竟係咪忽然黃色啦!按照常理而言、身為戒律長理應很清楚民委會嘅決定是地方政府不得挑戰的。何解佢會語出驚人?

2018年1月25日星期四

四萬2.0



性格仕途互掛勾
不同際遇有因由
若能知足常快樂
比長量短永無休

江湖傳聞顯示、當補選委員會可能禁止腰痛炎和兜婷入閘嘅消自出街之後、藍黨有人四出搭路、要求朝廷放上述兩人一碼。嗱、你冇聽錯、確實係藍黨為兩人出頭、而唔係黃黨。不過理由係乜嘢、恕在下唔知到。但葉柳話、腰痛炎和兜婷兩人能否入閘、係由戒律長淨如画來作最終決定的。葉柳強調、目前沒有法例可以阻擋腰痛炎和兜婷人閘、假如腰痛炎不獲批准入閘嘅話、等同剝削其政治權利。葉柳還義正詞嚴指出、罪城人民要嘅係一個有競爭嘅選舉、否則街坊就會唔高興。喂喂葉大姑、係妳講錯、抑或我聽錯、點解冇咗佢哋兩人參加、選舉就會變得冇競爭?嗱、我就想唔明、唔知你又明唔明呢?嗱、如果不知就裏嘅話、分分鐘誤以為葉柳係黃黨發言人嚟𠻹!你話嘞、呢單嘢邪門唔邪門?

2018年1月24日星期三

同你死過



此門不是為君開
你卻無闖進來
天天喊打煩住你
明明縱火賴天災

江湖上流傳、新任戒律院院長淨如画係罪城揸拂人諗井找回來的、原來實情係有點出入嘅。圈中流傳、淨如画早就係紅家會總舵嘅理想戒律院院長人選。由於總舵終於認定前院長死火猿係養唔熟之流、為着確保戒律院運作正常便急「𠹭」候任戒律長趕在黃亂眾頭領被扎棍之前、先到戒律院站穩陣腳以應付難以預料嘅變化。就係咁、在黃黨眼中嘅淨如画是專程來對付佢哋嘅米飯班主。試問洗君之錢嘅黃黨人馬又焉能不盡力去解君之憂呢?所以話啫、黃黨同淨如画死過係正路嚟嘅。

2018年1月23日星期二

妖氣沖天


你說我奸不是奸
搵錢唔使為兩餐
既是相方同做戲
問君何解要為難

路邊社報導、鯊區地保會代表尸畸畸(下稱尸君)話要升呢、所以報名參與城代表填氹擂台大賽。但被人踼爆佢在地保會嘅出席率只有六成多、注於其它兩個專題會議嘅出席率更加低至五成、而且在開會時唔係睇手機就係䁯眼瞓、遲到早退更加係家常便飯、但在參與講獨活動方面則不遣餘力。因此有人質疑尸君是否適合擔當更重責任。嗱、尸君是否能當重任我唔知到、但綽號耷頭神棍嘅陳倭兵大掌教非常肯定尸君有足夠能力升呢的。據陳大掌教講、尸君開會時並非瞓覺而係魂遊四方睇察民情、缺席會議只係為咗要親身去打救萬民。陳大掌教強調、一日都係嗰啲凡夫俗子唔識嘢、而對尸君有所誤解、仲叫你哋千祈唔好信喎!

2018年1月22日星期一

占據教員室



不聽爸爸不聽媽
只管聯群發爛渣
今日學堂搞亂檔
它朝蝕底遍地爬

江潮盛傳、日前枕匯大教館爆發學生會會長率眾凶教頭事件。事緣部份學生在普通話考試之中不及格、號召其他同學占領語言辦公室八個小時、並向女教頭狂「跳老舞」、還要迫使教館取消這項考試和撤換教頭。家陣全世界都學緊普通話以便將來搵食、但係呢班黃毒上腦嘅大學生要自毀前程都唔止、仲想其他同學都冇得學普通話。究竟佢哋憑乜嘢咁霸道?嗱、咱家龍族自古以來都係以尊師重道為做人處世基礎、但今日嘅大學生已經變得目無尊長、粗鄙下流。大教館教職員齊扮鵪𪂹、任由學生來主導。你話嘞、咁樣唔係大教館管理層失職又係乜?有朝一日當呢班學生成為教頭嘅時候、豈不是會教出一群比佢哋更不知所謂嘅怪獸學生出嚟?

2018年1月20日星期六

撳錯制的啟示



優先原來係玩晒
六親唔認起勢𠝹
巡航導彈改成核
地球早晚要打柴

花家老大喪普越玩越喪、一句花家優先就要劏盡全世界、連同聲同氣嘅五眼同盲(大影細家、楓葉家、袋鼠家、柳細蘭家)血緣兄弟一樣……𠝹。喪普又話要將小型核彈頭裝上巡航導彈、從而將花軍嘅核打擊力量普及化。有人質疑、花家嘅核武力量已經係無人能及、點解仲要將核強小型化、難道唔怕會引起全球性連鎖反應嘅咩?據喪普嘅講法就係、世界越來越不太平。然而、係人都睇得出、世界之所以唔太平、就係花家嘅傑作嚟。試問世上那一處嘅家族分裂、係冇花大叔身影嘅呢?喪普亦想到這一點、才會想出改變核武使用政策來加強花家軍事壓倒優勢。難怪有人話、喪普已經鐵起心腸、以強大軍力將地球監生吞喇!嘩、咁霸道嘅、唔通佢真係唔怕骾頸嘅咩、吓?!

2018年1月19日星期五

反盟老點鹽蟲妖



知君無奈何
借艇望割禾
跟前講義氣
背後博你傻

日前見到鹽蟲妖都不知幾咁風騷、仲四維𠸎人講佢係幾咁受到街坊愛戴嘅。原來鹽蟲妖在上次盟主動力舉辦嘅模擬選舉之中以高票數勝出、仲話如果補打擂台委員會膽敢唔畀佢上擂台嘅話、就須要向大眾解釋喎!但細問之下才知到、原來真係有一萬多人參加投票咁大把架!坊間普遍感到疑惑、何解反盟忽然之間搞個篩選出來、究竟所為何事呢?嗱、江湖上早已有小道消息流傳、篩選是專門為自殘四子而設嘅。因為反盟內部那群大小狀師都很清楚、自殘四子根本上是不可能參賽的。因為六判嘅判詞講得很清楚、自殘四子被褫奪嘅係這一屆尊貴資格。假如這批人重返議事堂嘅話、豈不是當公堂判決倒流嘅?不大可能吧!因此心水清嘅街坊、一眼就睇出反盟咁做分明係「假道義、真抽水」收買人心嘅虛招嚟。令人感到詫異嘅係、鹽蟲妖竟然一點都察覺唔到。

2018年1月18日星期四

神話破滅



妖人念魔咒
衰到冇朋友
厚黑繼續來
誰敢當阿茂

當日某黃思大狀對示威者講「不守法並不等如不尊重法律」使得班後生仔人人企硬、個個死𦧲。嗱、四年後嘅今日神話終於破滅。有份參與不依從禁令嘅痴瘋藐視公堂罪成、被判坐花廳三個月。雖然沈號龜被判罰款一萬及守行為一年、而其他人亦被判罰款、但公堂已經好清楚咁話畀街坊知、無論背後動機係乜、不守法就係犯罪行為、代價就係坐監。請各位街坊睇清楚啲、某人為着要擁人家子女去當炮灰、就講出大堆不負責任嘅鬼話來𧨾人落疊。呢種人都可謂係人面獸心咯!

2018年1月17日星期三

冇得比



比來比去嘥心機
人到衰時當受氣
莫說公理不存在
揀人庇護太堪悲

有人將反派垃圾尊貴住宅僭建與戒律院院長大宅僭建互相比較、仲指責反派尊貴有口話人冇口話自己、企圖凸出其賊喊捉賊嘅形象。嗱、在下並唔係撥冷水、我只係認為兩者實在係比無可比嘅。例如官衰咗唔止丟飯碗、甚至會惹來牢獄之災、而尊貴則未必。官嘅衰嘢通天後勢成眾矢之的、而尊貴唔止冇事、仲可以繼續罵官。尊貴噏錯嘢可以則則膊、而官就必須要鞠躬認錯。其實在垃圾尊貴之中都不知有幾多人係僭建族嚟、只係街坊懶得去理而矣!咁你話啦、比鬼比馬咩?

2018年1月16日星期二

不聽老人言


忠言逆耳拒收聽
連隨撞板確靈擎
呢鋪直程兜面摑
自尋死路太不應

呢嗱、風水佬呃你十年八年、阿域講嘢從來冇老點街坊嘅。早幾日我曾在網誌勸藍思唔好罵官、免得畀位人家入而令自己吃虧。點不知、話口未完、有班藍思在公堂門外抗議六判爺判決捕頭執法期間毆打途人罪成、其間有一名女士唔知埞責罵六判爺、事後遭巡捕房拘控。呢啲咪就係在下所講嘅畀位人入囉!抗議咪抗議囉、搞到自己都變埋被告、究竟為乜啫?嗱、你咪𠸎我講公平、公開、公正呀?自問我對於呢啲咁高深嘅學問、只係通咗六窺架咋!吓、點解?之唔係尚有「一窺不通」囉!

2018年1月15日星期一

遍地西瓜皮



有心定冇心
誰可以定音
巧遇勝安排
棉花蓋毒針

縣府將首輪補打擂台戰日期定在明年三月尾。由於日期與聽協堂和人地堂會期撞到正而被非議。之但係、縣府大總管話、那是擂台委員會嘅決定、縣府只係于予尊重。嗱、聽起來、縣府果然係民主過民主。之但係大眾心裡明白、藍思將會有很多重量級人物出席兩會、而無法留低為補打戰押陣、爭勝機會勢必大打折扣。呢嗱、剛剛之嘛、縣府又提出將一站兩份終極議案安排在一月尾提交議事堂表決。然而、又係有咁啱得咁橋撞正新一屆聽協堂首次會期、而新入選聽協代表嘅垃圾尊貴係冇理由第一次會議就缺席嘅、到時一站兩份分分鐘在陰溝裡翻船。好彩、藍思今次終於懵唔晒、嗱嗱聲提出將一站兩份終極議案押後、否則勢必遍地人頭。

2018年1月13日星期六

諜戰



你說我呆不是呆
有來冇往大蠢才
全球索料君為最
話你唔聽我又來

嗱、除咗花家指責紅家竊取其科技資料之外、連袋鼠、得意豬、實島、摩囉等家族都指紅家間諜竊取科研資料、還有龍裔瑞腆籍間諜在神州落網而遭瑞腆反指紅家亂抓人、形勢猶如紅家間諜威脅全球似的。剛剛端屎又指其地頭內嘅企業貪圖龍族見習生好使好用兼不嫌工資低而聘用他們、個那些人卻透過金錢和美色引誘相關科研人員而取得信息。瑞屎人甚至離譜到將應邀到神州參加科技交流研討會嘅學者、講成係被紅家套料嘅對象嚟。但事實明顯係、西方家族對紅家嘅指責只屬口講口賠、從來拿不出真憑實據來見街坊的。講來講去、就是西方家族都被紅家快速崛起嚇急咗、才會作出這類過度敏感嘅反應。

2018年1月12日星期五

又有人唔信鏡


明知屋有鬼
編到鬼屋擠
當死唔使病
頓變舂瘟雞

在下早就講咗架啦、但凡準備加入縣衙嘅人必須要搞清楚自己有冇蘇州屎先吖嘛、點知硬係冇人信鏡嘅。嗱、今次又有個唔信鏡嘅人賴嘢喇!佢咪就係前巡捕房「動力」工程師震波王囉!剛剛有報導指、震波王涉嫌在房津申請表上填寫不正確資料而遭青天衙門檢控。消息顯示當震波答應出任縣府「歌妓局」局長之後、呢單嘢就立即東窗事發。如果我話過你知、假如震波唔係答應埋縣太爺堆嘅話、呃房津呢單嘢係永遠都唔會曝光、你又信唔信?其實當年墨缸單畸屎已經係一面鏡子嚟架啦!點解震波硬係要咁戇居博好彩嘅呢?呢鋪都可謂陸雲霆睇相咯!

2018年1月11日星期四

叫人地做嘢啦



若然要申冤
無須鬧爆天
不怕難上難
獨忌志不堅

近來因為藍思不滿七捕和捕頭被判執法犯罪、而鬧爆六判不公。與六判份屬同門嘅大撞公會便出面、要求縣太爺將那些妄批六判嘅丟民依法處置。就係咁、連那些一直沉默嘅藍思坊眾都跑出來喊將洋判炒魷。縣太爺透過公仔箱警告街坊、妄批六判者隨時會被控藐刑堂之罪。點不知縣太爺連話都未講完、就被坊眾斥責恐嚇街坊。當中有藍思反問、點解黃思三條𡃁被判踎監時大撞公破口大罵判決係政治打壓、又見唔到縣太爺企出嚟止咳、而今日就要反過來打壓藍幫思言論自由?嗱、其實大家咁詏落去、都係詏唔出結果嚟。嗱、罪城係一個法治之區、藍思應該透過人地代表、向人地大會告狀、而唔係吵吵鬧鬧。

2018年1月10日星期三

點止阿爺夠眼光



看是真時真是假
丹心一片冇下爬
既非我來親手造
縱然漂亮有偏差

呢嗱、真係一百歲唔死都有新聞嘅。身為縣府智囊團一份子嘅人、竟然手持紙牌與縣府門前嘅示威者站在一起抗議縣府政策。冇錯、家陣講緊嘅就係行企會成員葉柳。前幾日佢喺行企會開會前與一群抗議縣府削減某醫院經費嘅示威者一齊示威。葉柳身兼行企和垃圾兩會成員、睇察民意並據理力爭係冇錯嘅。但係佢採取嘅表達方法就大有問題。以垃圾會成員身份嚟講、佢應該在議會內提出動議向縣府施加壓力。在行企會成員身份嚟講、佢應該向縣太爺出謀獻計和力陳利弊才對。但係佢好做唔做、偏偏走去參加抗議示威。咁做究竟係咪代表佢在兩會都盡無效、而跑上街頭示威抗議呢?一個乾逗兩份薪水嘅議員居然跳上街頭示威、只能顯示其能力有所不逮而矣!

2018年1月9日星期二

炒洋判?



兩制成亂制
當然係閉翳
表面裝糊塗
實際搏偷雞

近日聽聞街坊談論七千人上街撐捕快事件、其間有人認為將班老外六判炒清光問題就可以解決。嗱、今時今日嘅罪惡城唔係黃晒冷、就係藍晒冷、總之係又晒、唔係又晒、晒到班街坊眼到花埋至係。但問題係、究竟係唔係炒晒班老外而換上本地薑之後問題就得以解決呢?依我睇、絕對唔會。因為本地薑亦係有不同政治立場的。例如黃營指某某六判係藍色嘅、而藍營又指某某六判是黃色嘅、總之判決不利自己一方就必定係顏色六判偏私。但阿邊個終極六判爺話判決考慮嘅係法律及其爭議、𠸎法律政治、經濟、社會議題通通唔係六判嘅憲制職責。

2018年1月8日星期一

官門濕滯



係蟲定係龍
背景各不同
不見為乾淨
露底變成蟲

左一聲作出巨大貢獻、右一聲表現卓越、將那位被街坊視為「推、則、閃、避、卸」五味俱全嘅戒律院院長死火原捧到天上去。那怕坊間蟻民鬧爆死火猿拚𠵿爛尾、人家兩辦總督雙料明卻盛贊原院長勤勞、能幹、並對朝廷作出巨大貢獻。隨着來就輪咱家罪城縣太打得諗井在送別原院長時對稱贊其表現卓越、跟普羅坊眾嘅講法大異奇趣、簡直係完全唔啱嘴型。街坊齊齊指某人賴屎賴尿、但官家卻稱而頒之、呢啲咪係典型嘅官有官講、民有民講、講人自講囉!

2018年1月6日星期六

誰是麻煩製造者



你說我蠻真係蠻
皆因正道太難行
殺人放火撈粗嘢
有錢狂花冇錢還

近日流傳、花家第一夫人霉拉尼亞將一哥府嘅一棵兩百歲玉蘭樹斬除。據講那棵老樹雖然看來老當益壯、實際上早已被蟲蛀到剩得個殼、隨時都有倒遢嘅可能。呢嗱、榕樹頭風水陳話、這棵玉蘭樹物似主人形、跟花家運勢吻合、預料其霸主地位保唔多隱陣喎!從外表睇、花家依然係船堅炮利嘅軍事強權、但口袋裡面袋着嘅不是銀票而係欠單。花家先使未來錢、以致欠下十八萬億巨債、還十世都還不清。如果花大叔唔係佔據着龍頭大佬這個寶座、恐怕花家比沙俄更窮得貼地。當下紅家崛起、人元亦在地球銀號掛牌、大有趁花病擺花命之勢。花家大佬喪普發起爛渣、索性跟全世界賭白頭片。

2018年1月5日星期五

慳番啖氣



有因必有果
誰也逃不過
今天嫁禍人
明日人嫁禍

朱捕頭在臨退隱前惹來牢獄之災、社會上有不同意見!從新聞片斷所見、朱捕頭用棍作打人狀向途人拍打、有冇造成損傷恕我唔識睇。但係當時所見中招者只係回頭望了朱捕頭一眼、而面部卻不見痛苦表情。嗱、如果朱捕頭那一棍用力打落去、當事人就算唔即時𨂐低都會痛到大叫起來、但當事人卻連哼都不哼一聲。由此可見那一棍係姿勢多於實際。無論點講都好、那一棍確實擊中當事人。在法律上已經構成毆打。重要嘅係當時有沒有必要打出那一棍。今次朱捕頭被人入到位、都可謂老貓燒鬚矣!

2018年1月4日星期四

排第七



購物天堂前美譽
今天贏得個慘字
競爭能力頂瓜瓜
在職慘過做乞兒

有報導指出、根據花國調查報告顯示、全球快樂指數最高嘅國家就是獲得92分(以100分為滿分計算)嘅飛祭。我哋嘅罪惡城亦唔執輸撈到個第七、只不過是由隊尾倒數過來嘅尾七而矣!罪惡城獲得嘅快樂分數係29分、與男非和土語其同分。罪惡城在世界上最具競爭力地區龍虎榜上名列前矛、樓價租金更加係非冠即亞、但蟻民卻是不開心的。吓、點解?嗱、當你每日勸力工作、但賺到嘅錢大部份都是用作租金和車費嘅話、你嘅生活成本就會變得很高。由高企嘅樓價和租金帶動之下、百物價格騰升、莫講話儲錢買樓冇可能、甚至連積穀防老都辦唔到。咁、你話嘞、係咪衰過舊時?今日做父母嘅人為着幫助子女解決居住問題、不惜將幾十年來嘅積蓄都拿出來。咁搞法、當老人家再無能力養活自己嘅時候、係咪全都要路去申領綜援?到時發咗達嘅人大概已經遠走高飛、呢檔爛攤子就留下來畀街坊嘆至係。

2018年1月3日星期三

即開即爆


咪過唔信鏡
應驗夾靈擘
無中生有事
確係夠標青

呢嗱、俗語都有講、食豬紅屙黑屎、立即見功吖嘛!縣太爺滿以為開放縣衛東翼空地給示威者使用、就可以討好反派。之但係、有一群暴民以行動來表示不領情。他們帶人去該空地撒嘢、並在混亂之中使得有人受傷。嗱、呢啲咪就係縣太爺嘅「堅離地」又一例證嚟囉!都係成蟲大哥講得啱、乜乜人真係要被人管至得架!更可惡就係、有條瞀里居然本末倒置、指護衛員率先焫㷫那群暴民才爆發衝撞。喂、阿哥、難道你兜廢柴認為護衛員眼光光睇著有人搗亂都唔理才對嗎?事係大法師公會還要誣衊民大常委為一站兩份拍板係不依法和不要法、以為暴民惡行開脫。

2018年1月2日星期二

元旦大遊行



行人如蟻隊
無知落了水
狀人出口術
勝在有追隨

蚊陣在一八年搞嘅首次大遊行參加人數雖然未能達到一萬指標、但亦有六七千人參加、成績總算係咁上下。之但係、今年遊行打出嘅牌頭都係炒冷飯貨色、以及那些不獲街坊廣範支持嘅主張。內容大概是反對一站兩份、反對黃思踎監、反對修改遊戲規則等。再加上遊行隊伍之中出現前朝殖民地幡幟、難怪有街坊直斥蚊陣包屁講獨啦!總言之、今次只能用乏善可陳四個字來形容大遊行。從今次遊行打出嘅牌頭看來、反派已經走到黔驢技窮境界、再也拿不出新反對理由來矣!

2018年1月1日星期一

決勝之年2018



一七過去一八來
既有危機亦有財
正是乾坤將運轉
巨龍飛躣破三災

擾擾攘攘嘅2017已經過去、並迎來了2018年。首先祝各位朋友新年進步、健康愉快!本城議事堂在去年最後關頭通過咗新遊戲規則、相信長期拉布不會再出現。但這並不表示尊貴們可以冷冷靜靜的坐下來、為本城市民福祉而有所建設。相反、可能會有更多古靈精怪嘅事發生。即使係咁、街坊大眾亦只能接受、因為這條路是大家都有份揀的。無論點都好、今年三月尾補選大概可以反映出街坊想要的是一個怎麼樣的議事堂。是好、是劣、一切都要看街坊造化矣!