2017年12月27日星期三

街坊的無奈



賣草唔賣花
𠿬蒸生
見者頭擰擰
聞者掉喇叭

噚日、過氣車房部部長冰涼張話、樓價飆升唔關大圈人嘅事、係啱架!事關罪惡城樓價自八十年代中期便開始飆升。滿以為九七後就會回穩、殊不知原來情況剛剛相反、並在零三年沙士過後更加係一發不可收拾。雖然人們政見不同而且時有執拗、在炒樓方面卻是同聲同氣的。時至今日、本城樓價已經高據世界三甲之列。之但係、有人似乎食極都唔飽、再加上「地從何來」配合之下、連街坊嘅穀種都快要被嗰班友挖清至係。當下縣太爺願意將邊疆土地鬆綁、以換取大戶從手指罅漏多少地出嚟作為蓋搭平價竇之用、呢啲就係叫作妥協嘞。可惜消息並無透露有關詳情、而不得置評而矣!

回想前任知縣阿狼使出一招「寧願齊閉翳、不許霸權獨富貴」跟大戶硬碰硬、將邊疆土地開發權封死、從而令大戶變成蛋家雞見水、有得睇、冇得飲。結果大戶亦以一招「有死齊齊死、不容公家獨歡喜」高價顧用政客和專業抗議集團反對公家收地以作為回敬。就係咁、搞到有地冇屋起、有人喊𨂐。呢啲咪叫作戲無益囉!我並唔係話當今縣太爺暗中跟大戶妥協係啱嘅、但做阿狼二點零就必定衰多幾錢重。何況縣太爺在打擂台拉票期間、除咗獲得大戶支持之外、還跟邊疆幫冰釋前嫌、雖然說不上住屋問題可獲解決、但在削作紓緩方面已經露出曙光。如果話、呢件事係背着朝廷而做、講出來都恐怕冇幾多人會相信。所以話啫、在全世界都一樣、乜乜勾結都係阿超著褲、局住嚟架咋!在雲雲大戶之中、當然有不同想法嘅人包涵在內。例如有人想將手上籌碼兌換真金白銀後即走、有人會繼續留下來搵米路。總言之、世上有大戶、政治遊戲就得繼續玩落去。無論誰勝誰負、對於街坊來說都無分別。因為你和我一樣、只不過係棋盤上任人擺布嘅棋子而矣!


10 則留言:

  1. 祝您和您的家人聖誕愉快,新年健康如意!

    回覆刪除
    回覆
    1. 說書人、祝你新年進步、萬事如意。

      刪除
  2. 以前市民窮可以買間木屋住等上樓,依家想住木屋都冇,唔通真係瞓街?
    所以再係咁落去,我都唔敢想咯!

    回覆刪除
    回覆
    1. 社會不亂無怨氣、冇怨氣政棍就冇嘢搞、到時等陰乾至係。越亂越啱政棍心水。注於以後係點、對政棍冇關係。因為佢哋嘅天堂在番邦吖嘛!

      刪除
    2. 查實好簡單,港府喺深圳附近僻個港人置業區,將買唔到樓的低端巿民遷往深圳,咁咪掂囉。

      刪除
    3. 其實當下已經有唔少人住在深圳而出來返工的。以目前深圳發展方向睇嚟、人家未必同意咁做的。除非靠阿爺泰出壓頂則例外。

      刪除
  3. 我相信人嘅行為都係以自己利益為大前題的,現任縣大老爺都係無殼蝸牛,份退休金都唔買得幾多呎,對佢來講,未來的居住質素真係都幾眼冤架。雖然可以搬去紅毛住,不過佢應該都想喺度留返個竇口嘅。
    我係相信佢會好大力咁去增加竇口嘅供應嘅,至於大戶搵銀咪畀人地搵囉,唔眼紅得咁多架喇。

    回覆刪除
    回覆
    1. 總之一個看重民生嘅政府是衰唔到去邊。相反就衰到無倫。

      刪除
  4. 我的下一代生於不幸的年代。

    回覆刪除
    回覆
    1. 如果能令到自身硬淨就冇有怕架喇!

      刪除