誰寢食難安？

大財在你手

何必喊咁口

小講風涼話

勿惹眾生憂

日前揸拂堂大賬房掌櫃矛波在飛時卜講、見到罪惡城樓價租金高企令他寢食難安。嗱、矛波手握大賬房鎖匙、銀兩由佢支配、而且當下庫房水浸、而佢本人亦係靠疊磚頭起家嘅、真係講出嚟都冇人信。身為財神爺、見到乜乜霸權食到滿肚肥膏、連著襪都彎身不來、理應做番啲嘢出嚟好好咁去平衡一吓至係。嗱、咪同我講覓地艱難。人所共知地是有的、只係被一小撮人囤起來。如果揸拂堂能夠向他們力陳利害、在商言商之下冇理由不作出妥協嘅。上屆狼家班成員盛贊住（違法蓋搭）劏房好、仲講埋一大堆涼薄嘅廢話、以致人皆插之。今屆揸拂團應以此為鑒。當下親紅喉舌機乎日日都稱贊揸拂人林亞井專注民生。之但係、街坊淨係見到有人替佢塗脂抹粉、實際上係見唔到有那一個民生項目獲得顯著改善嘅。

講開又講、在咁多任揸拂人之中、只有老古董真係有心去為街坊解決住屋問題。可惜佢老人家勢孤力弱兼志大才疏、終於遭受到乜乜霸權、揸拂堂前朝精英、偽民、亂制四方勾結而被拉下台。最乞人憎嗰個、當然就係視民望如浮雲嘅啱曾。佢一上任就以調整房屋政策來趕絕班窮街坊而益大財閥、加上雙飛禍城一役使得蟻民對他恨透。最大隻講嘅就係一上任就開出一張不能兌現嘅「新房屋政策」空頭支票、再加上其好鬥性格搞到施政變成撕政而冇得留低。現在輪到出名打得嘅林阿井來當揸拂人、亂制一面倒稱贊佢開局靚、甚至連宿敵響樹派都對佢有贊冇彈。之但係、偽民越反越殘、但功勞方面點樣計都算不上到佢身上去。再講、早前佢曾經講漏嘴、泄露一組“被坊間一致認為其公屋政策不靠譜”嘅數字來、假如唔係佢身邊智囊教佢從速「沙冧」嘅話、恐怕早就陷入管治危機了！所謂大事觀之於微、由這些微細細眼嘅動靜是可以窺探出一個人嘅內心係點諗嘅。有圈內人士耳語、當農歷年過後上頭將會下令揸拂堂以行政手段調低樓價。如果係真嘅話、有人將會惹上大麻煩。試問當一個欠下通街人情債嘅人、焉能食碗面反碗底？嗱、各位街坊、不妨睇睇“人到無求膽自大”今次仲靈唔靈擎啦！