預咗冇還？

明搶暗盜有𣖕挨

公平正直冇屍骸

今日江湖真異相

人格賤賣謂之乖

呢嗱、罪惡城果然夠晒罪惡、明明染到周身屎嘅人、都可以被那塊高懸在公堂之上嘅明鏡照得乾乾淨淨、並且在患上暗病嘅證人不被傳召上堂作供之下、被告人就唔清唔楚咁甩咗身喇！聽聞話、由於陪煮團兩次不能煮出結果來之後就被解散、而件案亦就此作罷。再加上戒律堂宣布不作進一步追殺、那名身有屎嘅人物以後可以安枕無憂矣！早前大種乞兒隱瞞丐幫私吞乞金被放生之後、今次嘆盡海陸空、欲住高層樓嘅啱爵爺亦在光天化日之下、唔清唔楚咁就逍遙法外、仲係無後顧之憂嗰隻。所以話啫「出得嚟行、預咗冇還」先至係啱嘅。

嗱、古語都有話「賽翁失馬、焉知禍褔」吖嘛！如果上天企硬不饒人嘅話、縱然當事人有幾多人出來硬撐、都係走唔甩嘅。江湖上早已流傳、啱爵爺這位前天廷代理人造業委實大多、已經到咗淫亂凡間震怒天廷嘅地步。雖然人力不足以將他繩之於法、但疾惡如仇嘅天廷大帝卻未必肯輕易放過他。聽聞話、天廷已經派遺天兵神將下凡、挖啱爵爺嘅瘡疤。如果傳聞屬實嘅話、睇怕啱爵爺再也難以逃出生天。即使他能逃一時、亦難逃一世。雖知到、逃亡過程那種擔驚受怕嘅滋味、真係會令人攰到想死咁滯架！有啲人更加係會呻到出口𠻹！既然生不如死、所以有人會選擇將自己摺埋。呢啲咪就叫作「天作孽、猶可違、自作孽、不可活」囉！所以話啫、但凡天廷代理人必須潔身自愛、做個好榜樣出來給凡人看、切忌搞到自己神不似神、鬼不似鬼咁款。否則天廷大帝係唔會坐視不管架！知冇？！