兄弟幫又發功了

本來一比一

橫討又惡乞

𢲡手唔成勢

注定聽執骨

當戰中一開始在下就講過、書呆子不帶眼識人必衰收尾。無奈書呆子睬我都傻、反而去效法兄弟幫那群蠱惑仔玩起激進來、結果弄得神憎鬼厭都唔止、仲連個樣都搞衰埋。現在人家兄弟幫總教頭阿癲打完上半場、收埋條尾數嘆世界去也、留底丐幫長老阿乞帶兵打埋下半場。嗱、下半場嘅賽事尚未正式開始、就先有兩人被罰停賽。賽事開始不久、又另有四人被罰出場。連麻木不仁嗰個都感覺得到、呢個陣式與戰中首晚兄弟幫幫兄弟嘅情況有異曲同工之妙。如果明白當中奧妙、就會明白到點解大種乞兒明明斷到正、明明應該去做監躉、但偏偏可以逃出法網、仲連手尾都唔使跟喇！

一言堂剛剛訂立咗一條唱歌法、順手寫埋人歸本法裡面、使得部份垃圾尊貴唔高興。垃圾尊貴惡人亨率先發難、喊在立法之前揸拂人先要向公眾咨詢九十天。另一邊由阿乞帶領嘅兄弟幫人馬跑到西廠大門外吶喊、抗議一言堂將唱歌法強力諸講人身上。嗱、唔知點解、在下總係覺得呢個情況熟口熟面、而且仲感覺到有不祥之兆。原則上、一言堂將關係到每一個聽眾嘅唱歌法寫入歸本法內、無非是要以令人振奮嘅好歌聲來取代令人不安嘅噓聲而矣！之但係、偏偏有群餓狗跳出來爭屎吃、嚇得班街坊人人驚惶、個個失措。聽聞話、兄弟幫接到米飯班主嘅柯打、必須要利用唱歌法在社會上煽風點火、將班街坊焫到人人懊惱、個個𤷪𤺧、若能夠搞到雞犬不寧就最好。因為只有咁做、才能夠確保在嚟緊嘅補選擂台大賽之中有所作為吖嘛！坦白講、有些人本來是靠溫和手段起家、並使得大眾都非常受落和給予技持。之但係、偏偏有人走火入魔玩激進、結果搞到自己個形象不倫不類、仲變成為政壇上嘅跳梁小丑。照咁睇嚟、呢次嘅兄弟幫又要來幫兄弟、而且將會幫出個大忙來。危矣！