姿勢 實際 怎樣計

八十五萬未封頂

此話分明係攞景

口講口賠唔實際

街垃睇到眼矎矎

昨日三叔公於我知、佢聽到龍頭坐館冧姐講“派八十萬個餅仔已經夠晒數嘅意思、並不等同封頂”真係好開心、仲話佢個仔有機會分番個餅仔來食。坦白講、我就唔係咁樂觀。因為冧姐所謂嘅八十萬個餅仔、係加入現行已經被派出去嘅七十六萬個一起計算出來。即係話、未來只會派發四萬個新鮮餅仔應付街坊須求。因此坊間主流意見認為、冧姐由唔識用車票入閘搭火車開始、以至點樣去分餅仔都同樣係咁無知。須然冧姐冇講明、但聰明嘅街坊早就睇得出佢係恐怕公家餅仔太充裕會不利於私營餅仔市場。換句話講、只要窮鬼繼續做“劏民”嘅話、就可以保證餅仔價格繼續企硬。到時餅仔商賺到盤滿砵滿之餘、公家大帳房亦繼續豬籠入水、合晒乜乜勾結邏輯。嗱、阿媽教落、得人恩果千年記、做人切不可忘本嘅。所謂飲水思源、如果由你來當坐館爺、你又能夠點做？

冧姐聲稱、如果反派繼續將一盅兩件議案拖延嘅話、佢就會三扒兩撥、速速跟東talk省先傾妥合作安排、再向一言堂尋求確認合作、並在明年唞暑前完成三讀、而讓速龍食堂能夠按照時間表投人運作。嗱、先由一言堂拍板造成既定事實、再趁反派病攞其命在董事會通過議案都未算毒辣、毒辣嘅係其副作用足可以令反派通通反肚。眾所周知、坊間對於一盅兩件健康食法普遍認同、若反派繼續阻頭阻勢只會更加討街坊厭。假如坊間對反派嘅厭惡感在補選之前仍未淡化嘅話、佢哋嘅人很難藉着補選進身董事會。到時董事會就變變成一方獨大。搞成咁、罪惡城休想太平。因為、即使新議事規則能獲通過、而將拉布規限化、亦無補於事。唔通人家高舉為民拯命個招牌來玩嘢、主持人就夠膽將全部反派都趕出場、然後在清一色亂制派在場情況下強行通過議案？難道不怕反派將此事轉化為號召群眾上街抗議嘅機會咩？難怪有咁多人認為冧姐係旨在假借上大人之手去摑反派之面。摑得應固然好、摑唔應冇相干、點都唔會焫親冧姐嘅。總言之、玩完一屆便重返祖家、在罪惡城嘅歷史裡面、永遠都記載着冧姐曾經係罪惡城首位女性龍頭坐館、足以光宗耀祖架喇！之不過、苦果就留底畀班街坊嘆咁解囉！