殺者救也

禁打爛做冇詐型

欺人自欺夠虔誠

可惜臨尾輸一着

身不自主眼矎矎

一直被喻為、對黃黨造反頭領手下留情嘅紫荊分舵左護法長臂猿、提出嘅退隱伸請被擱置。原因係紅家會總舵下令、要佢先搞掂埋筆蘇州屎、然後至談退隱。正當長臂猿左騰右騰唔知點算好之際、唔知喺邊道鑽咗一條瞀里出嚟向刑堂篤阿猿背脊、話佢在入會儀式之中上少一枝香及扣少兩個頭違反會規、故要求刑堂依例褫奪其左護法身份及再踢佢出會。嗱、唔知到係咪有咁啱得咁橋、當瞀里篤完背脊兩日後、即係創幫紀念日那天、阿猿嘅師弟「黃黨頭目」人妖戴以「反對騰雞管治」為題、號召反民幫眾上街舉行「倒猿」大遊行、沿途高叫踢走長臂猿嘅口號。霎時之間、阿猿仿忽變成豬八戒照鏡、兩邊不是人。呢單嘢發展得畸形成咁、都可謂玩味十足咯！嗱、如果呢一招左右夾功能夠令到長臂猿冇得留底話、佢就真係要還神至係。但問題係、真係得嘅咩？

講起上面單嘢、我又想起N年前榕樹頭講古佬三叔公講過嘅一則真人事蹟。據說、在楓樹國當探員嘅郭強曾經被派去當黑幫臥底、而最精彩就係佢在多唔多區當雙重臥底嘅那一段日子。當時郭強係以華青幫叛徒身份投向鬼影幫。在短短幾月期間、郭強便扎職為鬼影幫掌管多唔多區毒品交易嘅頭目。俗語都有講啦、雞膥咁密都會菢出仔吖嘛！郭強終於發覺鬼影幫派暗中人監視着他。郭強心知不妙、惟有施辣手食華青幫夾棍及炸毀其中一個堂口金星飯店、然後將利益呈獻給鬼影幫幫主以表忠心。雖然郭強穩得住幫主、但幫中頭領卻一致認為郭強靠唔住、堅持意寧願殺錯都不可放錯。就在此時、派郭強去鬼影幫當臥底嘅華青幫幫主忽然發出江湖追殺令、誓要將郭強買起。郭強在無計可施之下、便打算向佢嘅直屬上司提出恢復探員身份嘅要求、但是遍尋不獲。後來郭強才知到他的上司被自殺身亡、亦知到從此翻身無路。當郭強以為自己已經窮途沒路之際、派佢混人鬼影幫嘅華青幫幫主忽然派人去協助他逃離楓樹國。郭強經過幾年時問嘅迂迴逃亡之後才能夠成功重返罪惡城。呢個故事話畀我哋知、做二五仔其實係非常危險、分分鐘去咗搵閻生報到都冇人知到架！郭強唔死得、總算執番身彩矣！