2017年10月30日星期一

姿勢 實際 怎樣計


八十五萬未封頂
此話分明係攞景
口講口賠唔實際
街垃睇到眼矎矎

昨日三叔公於我知、佢聽到龍頭坐館冧姐講“派八十萬個餅仔已經夠晒數嘅意思、並不等同封頂”真係好開心、仲話佢個仔有機會分番個餅仔來食。坦白講、我就唔係咁樂觀。因為冧姐所謂嘅八十萬個餅仔、係加入現行已經被派出去嘅七十六萬個一起計算出來。即係話、未來只會派發四萬個新鮮餅仔應付街坊須求。因此坊間主流意見認為、冧姐由唔識用車票入閘搭火車開始、以至點樣去分餅仔都同樣係咁無知。須然冧姐冇講明、但聰明嘅街坊早就睇得出佢係恐怕公家餅仔太充裕會不利於私營餅仔市場。換句話講、只要窮鬼繼續做“劏民”嘅話、就可以保證餅仔價格繼續企硬。到時餅仔商賺到盤滿砵滿之餘、公家大帳房亦繼續豬籠入水、合晒乜乜勾結邏輯。嗱、阿媽教落、得人恩果千年記、做人切不可忘本嘅。所謂飲水思源、如果由你來當坐館爺、你又能夠點做?

2017年10月28日星期六

以象遏龍?


花星攜手遏大圈
出完口術又出千
口水講乾荷包立
一次蹉跎退十年

近月來、花大叔不斷向摩囉迪拋媚眼、企圖𧨾佢落水去跟紅家搞對抗。嗱、喪普能否如願目前尚未知曉、但自從“動朗踩過界”一役、阿星就被紅家晒出來嘅“架生”嚇到腳軟、使得摩囉迪一直耿恥於懷。因此他花上大筆銀両去購買花家武器、並等待機會再與紅老大一比高低。嗱、咪話我潑冷水、如果能夠用銀両買得尖端武器嘅話、阿星早就成為世界上一流打架強手、而唔係好似現在咁、剩得把聲。反觀、雖然紅家會長期受到西方集團科技封鎖、但在努力創新之下、已經緊隨花餓之後在世界武售市場攀登上第三位。試問仍然依賴購買它家武器嘅阿星焉能相比?由此可見、花大叔是明知阿星不濟都要拖攏他、分明係別有居心的。

2017年10月27日星期五

臥底



臥底又名無間道
總之係冇好人做
不成功者便成仁
半身踩入黃泉路

臥底電影和電視劇經常都有得睇、但在現實環境之中你又見過真正嘅臥底未?昨晚在榕樹頭聽三叔公講咗一個有關於臥底嘅真人事蹟。據說、阿力嘅同門師弟洪尚志是一名品學兼優嘅大學生。當尚志畢業之後便成功投考警務督察。可惜他在學堂受訓期間嚴重違紀而被格扯。被逐出學堂嘅尚志情緒非常之低落、終日沉醉於酒色而且染上毒癖。從此尚志便離開咗爸獨個兒在外面亂闖、睡嘅地方唔係橋底就是巷仔、用嘅錢都是偷偷搶搶得來。如是者過咗一年多、尚志在拜咗一個叫肥乜嘅拆家為大佬、從此就當上跳灰。有一次阿力途經秋園街時跟尚志碰過正着。阿力二話不說、便一手將尚志拉人茶餐嘆茶兼聚舊。當阿力坐低之後、劈頭第一句就問尚志點解搞到咁樣衰。尚志亦毫不隱瞞將他的經歷如實相告。尚志在臨走前還向阿力借咗一百元。嗰餐茶飲得阿力十分唔開心、因為他見到尚志淪落到那個地步而感到非常心噏。

2017年10月25日星期三

監躉本色



此子猶如一堆糞
監牢裡面搞搞震
若然由他擔幡子
死人眼凸眾生昏

戇痴瘋話、後生仔面對權威將會有更多機會踎監。嗱、人踎監戇痴瘋又踎監、人家踎完監通常走夾唔唞、而呢壇嘢卻顯現得踎監踎到成個人“揩晒”咁款覺。唔通真係如戇嬌揚話齋、坐監後嘅人生真係活得咁光彩?難怪陳實滾大煮教都話、戇痴瘋躉型入格、唔做監躉就太浪費咯!之但係、佢話後生仔面對權威就有更多機會踎監、並唔係人人適用嘅。試問、呢個世界上面對權威嘅後生仔何其多、何以偏偏係罪惡城嘅後生仔先至會有更多機會踎監呢?如果話戇痴瘋信口雌黃、對佢似乎有啲唔公道。原因係、只有罪惡城嘅後生仔自幼被教頭將那套“逢宗必反”程色扤滿腦袋、而這群人長大後自然成為一股不聽爸媽、只聽教頭吓政治盲流。在未來日子裡面、黃思教頭將會不斷推出反社會運動、年輕嘅政治盲流無須擔心往後嘅日子活得唔夠光彩了!

2017年10月23日星期一

暗戰



你有金鐘罩
我現透骨爪
招來又招往
那懼惡相交

呢嗱、過咗氣嘅細圈坐館阿狼退出武林之後、粒聲唔出便跑到大圈旗下嘅水陸財路司任職無薪高層、使得應屆坐館冧姐被班爛民窒到面都黃埋。殊不知、就在此時過氣大算盤阿𠾍亦被發現、在未經申報之下在孖葉台開咪做無薪主持。冧姐見狀便喝令佢必須立即申報、不得破壞細圈嘅規舉喎!點不知有人居然借白鴿仔聽灼林把口來做傳聲筒、指着冧姐個鼻哥狂罵佢處理阿狼和阿𠾍兩單畸屎係雙重標準、並說阿𠾍做義工無須申報𠻹。嗱、真係唔知就被佢嚇死、知到就笑死咯!其實收唔收錢並不是問題、問題係申報人份工嘅性質對細圈機密外泄風險有幾高吖嘛!嗱、阿𠾍份工係在廣播台開着個咪口噏噏、以佢嘅前身份來說、講大一句都會天下大亂。你認為佢使唔使申報呢?聽灼林曾經在青天衙門當過差都盲巫成咁、確係灼得佢少咯!

2017年10月21日星期六

扮盲巫


真盲定假盲
志在帶頭掁
若能通任督
理當有運行

曾經有國際調查報告指出、全球最多盲巫嘅地方台島排名第二。吓、唔信?嗱、唔緊要嘅、不如就讓我們看看以下事件先、然後才想一想便有答案架喇!

台島前老二妖獸蓮早前聲稱、紅家會老大在蒙鼓誅日窩基地閱兵乃係對台島文攻武嚇喎!嗱、全世界都認為嗰趟閱兵所晒出嚟嘅武器係針對阿星嘅、基本上與台島沾不上任何關係。若以當時的那批武器而判定係針對台島嘅話、只能證明妖獸蓮是一個毫無軍事常識嘅外行人。橫睇、掂睇、當日在誅日窩量相嘅武器、大部份着重於火箭軍、空軍、電戰部隊、以及各種裝甲部隊和陸軍運兵車、分明是打陸戰嘅準備嚟。然而、攻打台島應該是一場先奪制空權、再以海軍進攻嘅一場戰役、應該以火箭軍、空軍、海軍、空降兵、以及海軍陸戰隊為主的。由此證明、妖獸蓮嘅講話若非盲噏、就係呃人。

2017年10月20日星期五

又要等埋發叔?


人輸陣也輸
神仙冇力醫
反盟唔知埞
恨悔已經遲

尋日、垃圾會又出現流會、即係話納稅人嘅銀両又白花了!件事係咁嘅、由於反盟認為亂制趁住六名反派被“搣甩”就提出修訂議事規則議案是乘人之危所為、所以又使出拖延戰術。期間兩幫人輪流玩失踪和喊點人頭、結果玩出個流會來。嗱、反盟就話到明要等埋發叔架喇!即係話、佢哋要將匹布拉到明年三月補選結果出嚟為止。反盟認為、目前嘅人手係不足以構成反對喎!嗱、亂制今次必定會趁勢爭取修例嘅、反盟想話事就爭氣啲、在嚟緊選戰打敗亂制至係吖嘛!現在發爛渣唔止冇用、仲搞到自己更加乞人憎。因為佢哋嘅小學雞邏輯就係、目前垃圾會通過任何一個議案都可以被視作為不公平、不公正、以及乘人之危。咁搞法、只能被街坊視為霸道和野蠻架咋!知冇?

2017年10月18日星期三

茅廁點燈


以為呃得靚
錯到唔知埞
大眾喊糟糕
終於成詬病

日前、白鴿涂指責揸拂人押後鬆辣招而先提一站兩份、係先政治而後民生。嗱、依我睇、白鴿涂今次被鬼拍後尾枕都未定咯!眾所周知、鬆辣招擺明係益炒家、對民生影響是好是壞已有前車可鑒。然而、一站兩份係一個每日都影響着數以萬計過關人群嘅項目嚟。如果要比較嘅話、鬆辣招跟一站兩份可以用前者蚊髀、而後者牛髀來形容。相信我咁講、唔會有太多人反對嘅、係嘛?!由此可見、罪惡城政棍若非私心太重、就係好反成性、已經去到咗無藥可救嘅地步。實在很難想像出、佢哋連呃飯食嘅伎倆都低劣得咁誇張嘅。正如白姐姐話齋、信佢一成都雙目失明啦!係嘛?!

2017年10月16日星期一

聽死



時機在眼前
欲發勿拖延
無管它朝事
記緊賺快錢

紫荊城磚頭有價、而且越賣越貴、相信唔使幾耐就會追貼黃金價。咁就唔怪得啲人將磚頭當金條咁買啦!正當磚商撈到盤滿砵滿、而庫房又機乎滿瀉之際、坊間蟻民就越來越閉翳咯!嗱、新任縣令就話、搞成咁都算唔清楚是誰之過、但佢話自己並冇鼓勵過年輕人買磚頭嘅。雖然縣令把口係咁講、但佢又將前任縣令用嚟封住「磚頭佬企圖改變農村耕地用途」嘅封印陸逐解除。難怪坊間流傳、新縣令係一個飲水思源嘅人嚟啦!如果傳言係真嘅話、今日啲父母為咗幫仔女買磚頭而將一生積蓄都攞晒出嚟、到咗佢哋無力工作時自己欠水、仔女欲養無力、咁就要集體攞公援架喇!你試想想、到時賺夠錢嘅人已經遠去、縣令亦返祖家安享晚年、縱然有「冬瓜炆豆腐」都只係由紫荊人慢慢品嘗架咋!

2017年10月14日星期六

世界輪流轉


無懼食兼扐
只怕你唔識
今時非往日
點到你招即

話說一名大影細國嘅煲手黨議員在本城機場被拒入境、使得影國外交部呱呱叫要大圈解釋喎!殊不知、大圈外交部派出一名滋陰補腎型嘅女士出嚟、滋滋油油咁回應謂、是否批准外國人入境、係大圈嘅主權、無須要解釋嘅喎!嗱、大圈食住個勢捩手給影國佬來一記兜巴扯面、咪話摑得佢唔爽。須知到今日世界已經變咗、大影細國再唔係舊時嘅甚麼月不上細國、而係欠人周身債嘅孭數細國嚟。早前佢哋嘅事頭婆唔係要紆尊降貴咁走出嚟迎接大圈嗰位冇禮貌嘅財神爺嘅咩?邊個叫影國佬咁鬼唔自量、呢頭𠸎大圈簽完千億大單、嗰頭就去掹靚國佬衫尾、仲答應接手搞到男海來橫行?今次居然仲唔知衰、打響個銅鑼話明要入罪惡城見班反派、妄想趁着大圈召開未來報告大會期間在本城贈㷫、咁咪擺假嚟丟囉!

2017年10月13日星期五

新的開始


新來新入局
望求分豬肉
大纜絞唔埋
遲早一鑊熟

新任揸拂人冧井依照慣例在暑假後、親身到垃圾會講解未本報告和接受質詢。其間有人死抱着陳四姑那句“冇政治、冇民生”嘅庇話當寶典、總之又係冇齙好戲就是。會後在記招其間被問及、何時才重啟政改。冧井回答、要由雙方心情來決定、如果大家心情唔好、提嚟都多餘。嗱、別小覷這一句輕描淡寫嘅回應、呢招其實係連消帶打嘅高級招式嚟。意思即係話、政改能不能夠重啟、並非由她一個人來決定、而係取決於反盟對嘅態度如何、並暗示反盟休想一方面要整她、另一方面又隨心所欲。由此可見、冧井通曉前朝嘅政治應對心法、而目道行比佢嘅師兄啱僧還要高出幾皮。難怪連肥彭都話、對冧井嘅領導能力有信心啦!

2017年10月11日星期三

欲擒先縱vs同流合污



道理說不通
五里夢魂中
如何分對錯
預告褲穿窿

繼日前老哥足球代表隊與罪城代表隊作賽前講獨仔噓國歌之後、昨晚呀周杯外圍賽又有講獨仔噓國歌。早幾日前、大狀幫嘅惡形啍和戇嬌楊先後跳出嚟講、設立國歌法不能防止人們噓國歌嘅喎!喂、阿哥、設立刑事法例也不能阻止罪案發生的、但有咗條法例擺喺度、邊個違反就拉邊個上公堂接受法律制裁吖嘛!咁樣唔係起到遏阻作用咩?呢班光棍就梗係想好似現在咁冇例可告、任由班講獨仔搞到罪城球迷冇國際賽事睇為止啦!罪惡城之所以係罪惡城、真係多得呢班光棍唔少至係。嗱、從另一個角度睇、噓國歌等同提醒紫荊人支持設立國歌法。如果你問我、邊中係中、邊個係奸、我真係答唔出嚟。因為有啲人睇起嚟是好人一個、但偏偏係鬼。然而、有啲人望落去成隻鬼咁款、但原來係人嚟。呢啲情況實在係太難觸摸喇!

2017年10月9日星期一

不歸之路



既成無間道
好醜都要做
遇上前路塞
回首不見路

在很久以前、在阿力拳館嘅學員之中、各行各業嘅人物都有。其中有一個名字叫王小風嘅女門生就是為巡捕房當臥底的。小風在當臥底之前曾經跟阿力商量過。小風話、佢上司認為她很有潛質並推薦她當臥底、並強調對她的士途很有幫助的。但阿力卻持反對意見。理由係、小風出身於一個單親(一個媽媽、兩個弟妹)家庭、既是家中長女、又是經濟支柱、所以唔係咁合適。阿力告訴小風、女性當臥底要承受嘅風險比男更高、代價之大委實難以想象、並極力勸她打消念頭。

2017年10月7日星期六

民主睇真啲


民主假時面目真
為保權位斷六親
殺人如麻不認賬
關門隱事靠把𧥺

俗語有講、路遙知馬力、日久見人心。落錯雨和評獎得主“人稱民主女神”戇山騷肌當上免顛國女皇之後便原形畢露變成暴君。免顛政府所講“在邊區生活近百年嘅百幾萬籮㷫瓦人只屬國際難民”嘅講法確實難以說服全世界。嗱、戇山不獨止冇出手制止軍隊屠殺籮㷫瓦人、反而為軍方辯護、難怪影國牛對大學都要褫奪在20年前頒給她的牛精榮譽市民銜頭啦!不過又好難怪戇山嘅。須知到在大影細國(影國)統治免顛國時、將掹加拉邊區嘅信奉阿啦教嘅籮㷫瓦族難民引入免顛境內、目的是要利用他們去平衡啊呢教信徒嘅勢力、從而增加其統治力度。西方之所以捧戇山上神台、兼且瞓捩頸睇唔到佢垂廉聽政、無非係想利用戇山去反轉免顛軍政府、從而建立一個絕對聽命西方嘅龍國鄰邦。可惜當戇山上台之後卻反轉豬肚、西方唔對佢發爛渣才怪。

2017年10月6日星期五

星星 鐵鎚 鐮刀



掛個羊頭賣三六
拍硬肥佬喧講獨
呢兜瞀里搭沉船
反民遲早一鑊孰

近日江湖上流傳、罪惡城過氣大老閣影國佬將會重返呀太、所以城中嘅港影娛業從業員表現得非常雀躍。早幾日之前、被議事堂炒魷魚嘅常無就帶隊上街遊行、但今次並冇像以往一樣抬棺材、而係高舉一枚黑底金星嘅橫額邊行邊喊打。之但係、常無以這面招牌展示唔妥紅家會是犯下本質上嘅錯誤。若是無意嘅話、當佢無知情有可原。若是刻意嘅話、此君旨不在紅家會、而係與整個龍族過唔去。眾所周知、紅家會嘅象徵係那個刻上鎚鐮交叉嘅紅底招牌而非龍族象徵紅底星星招牌。常無居然以黑代紅、口講反紅實反龍、都可謂其心可誅矣!不過又好難怪佢嘅、以常無今日乜都唔係嘅身世嚟講、如果唔做出能吸引影國佬眼球嘅舉動、人家連眼尾都唔會睄佢一吓嘅。

2017年10月4日星期三

勿與民為敵



橫蠻霸道理不當
公然棄義似豺狼
正義原來皆狗屁
成堆垃圾要清倉

雖然黃思鍥而不舍的死口咬着一站兩份不放、而昨日跪地妝亦親身在公仔箱前現身說法但就是喚不起街坊支持、都可謂小人枉作矣!其實一站兩份早已在歐洲實行、而且是相當成功的例子。然而、黃思政棍卻視之為毒瘤並加以抹黑。呢啲咪就係視街坊利益如屁嘅證據嚟囉!黃思為反對而反對、已經反到走火入魔、以致是非都不分了!由於黃思在不知不覺之間與民意背道而馳、所以佢哋嘅討厭指數不斷飆升、以致選民流失都不知到。相信呢方面嘅情況、將會在未來嘅選舉之中反映出嚟。隨着皮佬𡅏嘅衰落和傳統黃思嘅人才緊絀、使得其在反派之中嘅龍頭大哥位消失、取而代之將會是較激進嘅自撅派。因為只有咁樣才可以令到罪惡城更加罪惡吖嘛!

2017年10月2日星期一

殺者救也



禁打爛做冇詐型
欺人自欺夠虔誠
可惜臨尾輸一着
身不自主眼矎矎

一直被喻為、對黃黨造反頭領手下留情嘅紫荊分舵左護法長臂猿、提出嘅退隱伸請被擱置。原因係紅家會總舵下令、要佢先搞掂埋筆蘇州屎、然後至談退隱。正當長臂猿左騰右騰唔知點算好之際、唔知喺邊道鑽咗一條瞀里出嚟向刑堂篤阿猿背脊、話佢在入會儀式之中上少一枝香及扣少兩個頭違反會規、故要求刑堂依例褫奪其左護法身份及再踢佢出會。嗱、唔知到係咪有咁啱得咁橋、當瞀里篤完背脊兩日後、即係創幫紀念日那天、阿猿嘅師弟「黃黨頭目」人妖戴以「反對騰雞管治」為題、號召反民幫眾上街舉行「倒猿」大遊行、沿途高叫踢走長臂猿嘅口號。霎時之間、阿猿仿忽變成豬八戒照鏡、兩邊不是人。呢單嘢發展得畸形成咁、都可謂玩味十足咯!嗱、如果呢一招左右夾功能夠令到長臂猿冇得留底話、佢就真係要還神至係。但問題係、真係得嘅咩?