厚黑事件

面厚心黑透

神仙也難救

掗拃夾沙塵

惡到冇人有

身受宮能界黃紙扇嘅莫舐話、如果剛被聚義堂踢出局嘅六名疑似代表再次翻閹嘅話、無論在情在理、紫荊分舵都應該優先考慮讓佢哋捲土從來喎！佢仲話、反盟已經有咗共識架喇！喂喂、莫舐哥、嗰六壇嘢在入會宣誓儀式中玩嘢獨犯規章而被踢出局、基本係唔抵可憐嘅。家陣無論橫睇、抑或掂睇、嗰六兜㕲嘴都係自己攞嚟衰、一切皆與人無尤嘅。莫非閣下又想來多一趟罰即是不罰、不罰即是罰？如果咁都得、不如反盟晒佢就得啦、其他人唔使玩架喇！係嘛？！雖然冇乜人明解、究竟莫舐口中嘅所謂情理從何說起嘅、但係好多人見到莫舐想迫使新任分舵舵主鋪設紅地氈、好讓嗰六壇嘢重返聚議堂。咁做法、唔止係間接助長反派氣焰、對其他有志加人聚義堂嘅人士嚟講、亦係太過唔公道嘅。

嗱、開講都有講啦、沒有最離普、只有更離普吖嘛！眾所周知、聚義堂所有內會嘅正副坐館人選都是內部互選產生嘅。之但係、莫舐認為反盟人丁薄弱、一向都處於被動位置上、對佢哋唔公平。佢仲話、除非更改所有規則大家輪流來玩、咁樣先至算得上公平、公正喎！雖則莫舐一向以厚黑見稱、但今次講嘅嘢係錯唔晒嘅。事實上、反盟在公開擂台爭霸戰之中、無論係打贏抑或係打輸、成積跟亂制相差都不會太遠。但在宮能界這方面嚟睇、反盟直程係輸足一條街。試問點會有機會贏取得內務會議嘅坐館嚟做？之不過、如果反盟能夠獲得大多數街坊支持嘅話、必能在直選擂台將亂制打到七個一皮、到時就唔使驚青冇爭勝之力啦！係嘛？！但弊就弊在反盟近年來跟番邦越走越近、嚇走大批支持者都唔在講、仲連反盟個朵都被搞臭埋。莫講話贏、唔輸到趴街已經算叻架喇！講真、從前我也有買張飛去捧反盟參賽者嘅場、自從發覺反盟為反對而反對、反到連街坊嘅着數都可以拎去當鬥爭籌碼之後、我就索性連斗零都慳翻、唔再去睇打擂台了！