仲要唔要把尺？

有尺唔肯用

嚴規變空洞

大纜絞唔埋

世人遭戲弄

聽聞話、專門替香江小學造校服嘅裁縫佬棣發官講、佢向來都用尺去替顧客度身嘅、但近來發現把尺度出嚟嘅尺寸總係有人唔啱心水、所以捩手扔開把尺、改靠自己觀感去替一些特別嘅顧客度身、務求做到大家都啱心水為止。棣發官剛剛又用心去替風景因同學度身做校服。但怪就怪在、風景因套校服點樣睇都比上次籮半蔥同學所穿的那一套都來輕鬚舒適得多。據說、當初棣發官同樣係用個心去為籮半蔥度身、套校服同樣係輕鬆到痺、連民仔都好開之架！可惜健仔同學跳出來搗蛋兼向訓導主任阮作祥投訴、使得他出面要求棣發官用番把尺替𤓓三七重新度身再做一套標準校服至喎！

聽聞話、今次風景因之所以能夠穿上這一套輕鬚舒適嘅校服、主要係健仔不獨止冇走出嚟搞搞震、亦冇向訓導主任阮作祥施加壓力、當中仲有人反過來替風景因講好話、而民仔那一方見到架忌冷受益當然唔會反對。如果傳聞屬真確嘅話、唔知到棣發官呢個裁縫佬以後仲會唔會再拎起把尺去為顧客度身？老實講、人係感情動物、總會有心情好或心情唔好嘅時候、單靠觀感判斷絕不靠譜。萬一顧客在裁縫佬心情惡劣嘅時後要求度身、很可能會度到烏里單刀、加上順得哥情失嫂意、就會變得更加糟糕。咁搞法、學生套校服豈不是人人乜零乜秤、個個噏噏耷耷、肯定冇晒觀瞻可言。咁仲算得上係校服嚟咩？試問一聲、一所蜚聲國際嘅書齋、居然連一套校服都做得鬼五馬六嘅時候、那裡還有形象可言？難怪今日嘅大中小學雞硬係自把自為、當其他人不存在咁款啦！嗚呼哀哉！