由唱衰講起

詐傻扮懵起勢衝

立心亡我吹歪風

今天勢亂誰之過

三縱三容禍未窮

呢嗱、那邊廂大影細國（影國）公布、將會派遣新建造嘅航母與亞靚利堅合種國（靚國）和架國一起到呀洲來進行自由橫行、而這邊廂反盟立即配合、並派遣大撞幫嘅戇嬌楊、拳頭幫嘅慢版泉、白鴨幫嘅豬瘋許、自缺嘅豬仔迪等人隨即宣布齊齊跑到影國出席「消失中的罪城、京城以外的思覺」言討會。嗱、淨係聽個名就知到、係洋人搞嘅唱衰大小二圈活動嚟。聽聞話、有人以「一旦小圈失守、就會影響呀洲」以及「大圈打壓破壞小圈經濟發展」為題大肆抹黑龍國和罪城。在下聞得此消息嘅時候、真係唔知好嬲抑或好笑。洋人唱衰龍國和罪城、基本與民主自由係無關嘅、唯一目的就是要在呀洲撈取得更大利益。之但係、無論橫睇抑或掂睇、都睇唔見罪城班政棍有邊一忽唔係出賣街坊嘅。究竟點解影國要以咁高調嘅姿態來宣傳其所謂男海橫行自由呢？

不平等竹戰

你說我惡不是惡

得閒無事將懵搏

有條瞀里唔知埞

撩隻老虎打相撲

日前麻雀公會主席淵博強終於企出嚟、就全城爭議嘅不平等雀局表態。阿淵話、佢睇唔到那場雀局有不正常情況、同時亦指出、所謂公證人包庇一方、打壓另一方嘅講法、完全係毫無根據嘅指控嚟。淵博強講完後轉身便走、連記者繼續追問（睇唔到和毫無根據、係咪等同“有”而只係佢唔知到）都懶得回應。嗱、件事係咁嘅、某日黃惠乒員外為其三歲兒子擺壽宴、荔枝英、尋日滾、賣田李、么挺四人約定好到時開枱打麻雀嘅。殊不知尋日滾臨時甩底、使得枱牌陷入三缺一狀態。就在此時、不請自來嘅藍軍堯忽然走埋去挑機。於是就此成局、立即開打。在一開始嘅時候、阿堯威風八面、將么挺打個落花流水。可惜阿堯被勝利沖昏頭腦、並在洗錯牌疊打錯骰嘅情形下、給予對方使橫嘅藉口。於是就發生以下嘅事了！

厚黑事件

面厚心黑透

神仙也難救

掗拃夾沙塵

惡到冇人有

身受宮能界黃紙扇嘅莫舐話、如果剛被聚義堂踢出局嘅六名疑似代表再次翻閹嘅話、無論在情在理、紫荊分舵都應該優先考慮讓佢哋捲土從來喎！佢仲話、反盟已經有咗共識架喇！喂喂、莫舐哥、嗰六壇嘢在入會宣誓儀式中玩嘢獨犯規章而被踢出局、基本係唔抵可憐嘅。家陣無論橫睇、抑或掂睇、嗰六兜㕲嘴都係自己攞嚟衰、一切皆與人無尤嘅。莫非閣下又想來多一趟罰即是不罰、不罰即是罰？如果咁都得、不如反盟晒佢就得啦、其他人唔使玩架喇！係嘛？！雖然冇乜人明解、究竟莫舐口中嘅所謂情理從何說起嘅、但係好多人見到莫舐想迫使新任分舵舵主鋪設紅地氈、好讓嗰六壇嘢重返聚議堂。咁做法、唔止係間接助長反派氣焰、對其他有志加人聚義堂嘅人士嚟講、亦係太過唔公道嘅。

世事何曾是絕對

長期洗腦腦生根

自封前路惹身痕

放開胸懷廣視野

真情體驗勝聽𧥺

呢嗱、世上之事果然是無奇不有。如果我話你知、有個外人跑入你家中、並喊你少管你家中小輩嘅事。唔知你又點睇呢？話說、自從罪惡城大歸之後、有一群異於大多數嘅人物一直堅決拒絕承認自己嘅宗族身份、並且明撐兩制、暗催講獨。正當公堂依法將部份犯下刑事罪行嘅獨派人物判處監禁之際、呀靚利堅合種國（靚國）和大影細國（影國）利用其傳媒喉舌齊齊歪曲事實、大肆唱衰罪惡城六判爺施法不公。這還未算、嗰壇人稱“遷股罪人”嘅過氣洋督肥彭居然跑到本城來噏三噏四、並公開喝令西廠勿管城中事務。嘩、肥彭以為自己仲係督爺都未定喎！𠲖、點解那群經常指責朝廷干涉本城事務嘅棍、今次全都鴉雀無聲？呢班友嘅媚外之心、都可謂超然若揭咯！

大話東北亞

大話唔怕講

最怕口糠糠

詐懵兼扮傻

點止搏粒糖

繼北寒肥仔恩聲稱、要以核彈牽制奸島之後、喪普在出席世界議會指出、肥仔恩嗰壇“火箭人”罔顧世界安全玩核爆、仲話如果威協到花國及其盟友安全嘅話、必定會將北寒打個稀巴爛。但話口未完、肥仔恩馬上跟喪普玩晒冷、宣布“將會在太平洋上空進行氫彈試爆”作為回應。須知到、在太平洋上空試爆氫彈、除咗會對海洋生態構成大災難、而且對周邊國家同樣構成極大危險的。以目前形勢看來、若不是坐低講數、就係開打、根本上己經沒有其它路可走。因為在太平洋上空試爆跟直接向花國宣戰分別不大。在肥仔恩嘅角度睇嚟、其核力量雖然無能力摧毀花國、但有能力攬住其他人一齊死。呢啲大概就係核嘅力量和可怕嘅地方了！

仲要唔要把尺？

有尺唔肯用

嚴規變空洞

大纜絞唔埋

世人遭戲弄

聽聞話、專門替香江小學造校服嘅裁縫佬棣發官講、佢向來都用尺去替顧客度身嘅、但近來發現把尺度出嚟嘅尺寸總係有人唔啱心水、所以捩手扔開把尺、改靠自己觀感去替一些特別嘅顧客度身、務求做到大家都啱心水為止。棣發官剛剛又用心去替風景因同學度身做校服。但怪就怪在、風景因套校服點樣睇都比上次籮半蔥同學所穿的那一套都來輕鬚舒適得多。據說、當初棣發官同樣係用個心去為籮半蔥度身、套校服同樣係輕鬆到痺、連民仔都好開之架！可惜健仔同學跳出來搗蛋兼向訓導主任阮作祥投訴、使得他出面要求棣發官用番把尺替𤓓三七重新度身再做一套標準校服至喎！

牛笑雞的啟示

講講又講講

無非口糠糠

人人有得賴

個個覺得爽

講馬煙酒會副會長牛笑雞話、如果大教館無辦法清除壁布板上造反標語嘅話、唔排除縣府會出手干預、甚至連上大人都可能會介入、到時大門生嘅自主權就會被削弱喎！嘩、牛笑雞咁講法、聽起嚟都咪話火藥味唔夠濃烈。以佢嘅身份嚟講、絕對唔會係吹水、反而係傳遞出一種“上大人對大教館縱容門生在校園宣傳講獨已經失去耐性”嘅強烈訊息。但在下始終唔相信上大人會為啲咁嘅碎料親自出手、而係覺得縣府揸拂人必會受到壓力。如果係真嘅話、揸拂人就會班救兵來出手撳一撳班友仔架嘞。大家放長眼睇啦！

就怕㘉濕身

學生亂爆粗

校長當做騷

外表挺開放

內裡太糟糕

自從去年見識過靚男大學堂（靚大）學𡃁開嘅跳老舞派對之後、終於發現在下從前所接受過嘅教育係完全錯晒架！當年教頭對學𡃁管教非常嚴格、莫講話嚴禁跳老舞、即使在講話當中嘅字眼稍為粗魯都要被記過。反觀今日嘅學堂除咗可以跳老舞之外、掉埋人家隻姆犀布公仔都冇問題。更加過引就係、可以奉旨在㒼主牆上張貼恭賀他人家中掛白、以及掛上煽動他人造反嘅標語都得吖嘛！講到呢方面、在下最佩服嘅人就係靚大學堂館長靜覺汗喇！佢雖然公開表示反對講獨、卻堅持㒼主牆上出現講獨標語純屬討論、而且很樂意讓佢班學𡃁見識到教館內不同意見。嗱、淨館長呢種又夠薑、又敢做敢認嘅人、在全城大學堂館長之中絕無僅有。無論閣下是否認同淨館長嘅政治立場、都不能不佩服他幾分。因為真小人比偽君子旗幟鮮明得多吖嘛！

喪普與肥恩

喪普遇肥恩

稟神冇句真

仇家共老友

有着兩份分

照牌面睇、花大叔面對着潮仙文攻不得、武打不能、還要被肥仔恩將自己嘅大牙續隻剝下來、都可謂床板夾乜乜、痛得唔叫得咯！花大叔呢頭話、若然潮仙再試射導彈、他就會開打。然而、肥仔恩唔止將導彈射過架仔上空然後落到太平洋、還要試爆多一次氫彈、氣得花大叔拍枱拍凳、但就係唔打過去。嗱、事實證明、肥仔恩玩核武讓花大叔有藉口在高麗安裝「殺得」反導系統、氣得紅老大面紅面綠。另一方面花家利用釣魚島搞到紅家跟架仔無法和解。就係咁、那個由紅家、架仔、高麗合作搞嘅「東北亞經濟三角共同體」計劃散晒喇、而花大叔擔心嘅事亦就此消除、而架仔和高麗亦只能乖乖哋回到花大叔身邊繼續做一條狗。計起嚟、唯一獲得利益嘅人就只有花大叔一個。難怪陰謀論咬定肥仔恩跟花大叔係有台底交易架啦！

黃禍源於大學堂

黃禍不消除

社會更加頹

師爸無義氣

徒子亦冇雷

繼「祝賀阿邊個嘅兒子歸西」嘅黑心標則之後、日前某大學堂㒼主牆上又再出現一張「祝賀九一一死人冧樓」嘅省筆字黑心標語。當校方發現並要求學生會張之清除時、該會主席話標語並無違反㒼主牆使用規則而拒絕咁做。嗱、黃思學生會冇理由睇唔出那是一張黑心海布嚟。更有意思就係、今次的冷血標語是用省筆字寫成的。但係、學生會卻以沒有違反㒼主牆使用規則而拒絕撕毀、擺到明係無私顯見私嘅低B之作嚟啦！係嘛？奇怪嘅就係、校方居然容忍咁樣嘅一張黑心嘅標語繼續留在㒼主牆上供人觀賞。究竟這又顯示出些怎麼樣的意念來？

學子冇運行

一年跌一啲

衰咗冇人知

繼續跌不停

天才變白痴

江湖流傳、在亞洲名列前茅嘅罪惡城龍頭大教館（講大）唔止跌五六位去、在去年花家嘅世界排名榜上更加係一口氣狂跌四十幾個馬位、在另一家國際排行榜嘅最新排位顯示、跌執又再跨進一步。呢鋪都可謂低處未算低咯！須知到、一所大教館除咗功夫到家之外、聲譽更加係尤為重要。然而、講大卻主張講毒第一、功夫第二。就係咁、教頭講毒多過教援功夫心法、而學徒中嘅毒當然係越來越深矣！試問一所離經叛道嘅失敗教館又點可能名列前茅？由此可見、假如城中嘅大教館繼續受到講毒思維薰染嘅話、遲早淪為大毒館、即使華陀翻生都救唔番架喇！

聲大夾惡

使銅銀

夾大聲

呢班騎呢怪

注定要肅清

若要保護聲與名

先除館裡敗家精

開講都有話、大唔好時教壞細吖嘛！教頭界出咗吼天狗、痴孖根、病語石、陳皮璺、蜓妖、妖蜓、文卷陳、孽緣此等教棍、都可謂係教館大災難。再加上宗教界出埋倭軍陳和豬妖呢類神棍、信者得救已經變成信者冇得救咯！這麼樣一代傳一代、讓我們見識到、連宣誓莊嚴都可以大肆破壞、甚至在文之牆上貼文祝賀人家喪子嘅人物都可以為人師表嘅時候、佢哋嘅教學素質係點嘅、大概唔使問阿貴都猜得出幾分來架啦！係嘛？！

如此准教頭

呢條契弟真抵死

見人掛白佢恭喜

館長出來罵兩句

成拃黃思發老脾

嗱、開講都有話啦、見到發生不幸事件不表同情係唔緊要嘅、但千祈咪落井下石般的在人家傷口上撒鹽吖嘛！殊不知、准教頭大教館文之牆上卻出現多張寫着「恭喜阿邊個嘅兒子歸西」嘅海布。館長丈人良馬上企出來遣譴責貼布人冷血兼唔係人、卻反被黃思教棍鬧到頭暈眼花。與此同時、該館嘅門生會會長嚟料晴也跳出否認事件與該會有關、並說黑心海布已被門生會撕掉、如果館方藉着追究誰是兇手之勢而乘機打壓言論自由就係白色恐怖、後果將會係好嚴重嘅喎！有教頭質疑、係咪有人被壓迫到有冤無路訴、先至會以此泄憤至喎！以嚟料晴和黃思教頭嘅邏輯看來、就係只許黃思黑心、不准館長追究、而且黃思人馬在其它地方受咗委屈、係可以將憤怒發泄在其他人身上嘅。嗱、我哋嘅教頭和准教頭居然講呢啲、我就驚驚哋、唔知你又驚唔驚呢、吓？！

下一個戰場

攻人先攻腦

唔好等運到

教者既不仁

鋤誅皆正路

呢嗱、眾所周知要𧨾人落疊先要提供着數、絕冇話喊人免費賣命嘅、係嗎？之但係、凡事都有例外、有些事情只要能夠提早打穩基礎、往後就無往而不利。例如將一個人由小孩子從少就長期洗腦嘅話、到他長大之後就會堅定不移的堅持自己學得來的那套價值觀、而且係會以此去考慮問題。其他人休想改變他、甚至連親生爸媽都唔可以。呢招嘢好使好用、所以全世界無論是姓資的或是姓社的都爭相使用。誰用得到家、誰就是贏家。輸家永遠都是被有心人訓練出來並在前線打衝鋒嘅那一群年輕嘅政治盲流。

𡁻完唱

常聞𡁻完鬆

𡁻完稀有唱

瞀里發牙痕

當堂出異相

開講有話、𡁻完鬆冇問題、𡁻完彈冇風度、𡁻完唱冇人格吖嘛！誰知真係有人𡁻完唱架！話說、早前下環區蚊症部率領一個五天交流團到扶桑驚都作學術交流。整個行程只訪問咗一家教館、所花嘅時間僅僅是兩粒鐘、其餘時間都是四處吃喝玩樂。總消費是35萬両銀子、每人消費15800両銀子、平均每人每日消費3700両銀子、算起來仲貴過去歐洲、都可胃豪中之豪矣！雖然蚊症部狂益街坊、但係偏偏遇上一號𡁻完唱嘅人物、搞到件事通晒天都唔止、仲要累到蚊症部被人猛挖啲舊史出嚟唱吖嘛！咁你話嘞、呢壇瞀里係咪抵鬧？

由安家費講起

入冊唔安家

遲早實聽瓜

若有銀子挺

唔怕個底花

呢嗱、開講都有話、出嚟行嘅唔係為銀両、唔通為老感咩！係嗎？自從十六名社團手足被判入冊之後、出嚟行而又諗住唔使還嘅蠱惑仔紛紛跳船、游水上岸重新做人。大撞社見到勢色唔對、便派遣白葵扇伍愛貳與蚊連社坐館常無在黃思聯盟（黃盟）總壇、就設立安家費一事召開代表大會。經過一論商議之後各大社團終於達成共識、向受靶嘅兄弟提供每人每月一萬両白銀作為安家費、直至出冊為止。嗱、呢單嘢由大撞社攬上身去搞係啱架！鬼叫該社嘅雙花籐條涼茶杰在黃亂期間對班𡃁講、唔守戒並不等同破戒、結果累到十六條𡃁齊食祠堂（監倉）飯咩？如再不從速補鑊嘅話、以後搵鬼替佢哋賣命都得喇！

捉妖欠天師

妖邪作亂眾皆知

當家動手有遲疑

今日花妖來恫嚇

驅除孽障欠天師

呢嗱、勢想唔到不學無術三條𡃁（不學三𡃁）𤓓三七、兜捹匡、戇痴瘋三人被判坐監一事竟然演變成國際事件。花家和米旗家麾下多家傳媒聯手抹黑和抵毀本城六判堂、企圖以大石迮死蟹之勢推翻判決。花家閣會亦傳出可能會通過「罪城人權法和民主法」為反盟提供保護傘。嗱、花大叔嘅面皮厚成點、我唔知到。但我睇得出、今次嘅虛張聲勢志不在拯救不學三𡃁、而係要警告六判堂不得將一眾黃亂禍首判監至係。今次花大叔親自粉墨登場、足可見反盟打民意戰已經打到盡頭、沒得再打了！假如花大叔不放聰明些、還要以撤銷對本城特殊地位安排來威脅紫荊人嘅話、勢必會令更多街坊相信反盟配合花家打壓龍族復興、而不斷製造政治對抗為紅家會添煩添亂。嗱、咪又話我亂噏廿四、當下花家連自己家裡嘅種族動亂都未能搞妥、居然有閒情來管罪惡城嘅事。如果我話、花家跟反盟冇奸情嘅話、唔知到你又信唔信呢、吓？！

龍象之戰半場休息？

龍象呢趟打唔成

花叔架仔眼矎矎

紅家有喜不宜戰

阿迪家衰望太平

據報導顯示、踩過界嘅象兵已經在8月28日下午2時30分反回摩囉境內。事後有傳聞指、紅家會以2億両白銀換取象兵撤退。因此江湖上流傳、在垌塱事件之中、象族失面子得金、龍族失金得面子。嗱、大話講到口沫橫飛、就是拿不出證據來支持。到底紅家會有冇過水畀摩迪呢？如果冇、點解摩迪會咁順攤自動撤兵呢？依我睇、龍象雙方肯定有過秘斟嘅。注於送銀両畀惡迪則未必。事關以當時形勢而言、摩迪是道理全輸的。雙方在軍事上騷哥利嘅結果、似乎亦係龍比象更勝一籌。所謂唔怕貨比貨、最怕唔識貨吖嘛！紅家會連專門用來摧毀敵方雷達和反導系統嘅無人飛機都搬埋出嚟亮相、外行人唔識並唔出奇、但如果連內行人都唔識、咁就真係應死唔使病咯！當然、如果龍族空口喊阿星收皮亦唔係講咁易嘅。但箇中交易係啲乜嘢、外人難以猜透的。

現代版指鹿為馬

你說我差不是差

變身河童賴阿媽

滔天孽債無關我

話我誇時你亦誇

呢嗱、古有指鹿為馬、今有指糞為糖。罪惡城反派政客都可謂醜在世界之端矣！傷學三𡃁被控拖馬衝擊門常開東翼廣場罪成。當他們被判做義工和守行為之時、無人說他們是政治犯。之但係、當翻案堂判處三𡃁入獄時、就忽然變咗政治犯了！無論是當今或過氣嘅大撞公會會長、以及細撞公會會長都走出來、以法術角度解釋三𡃁並非政治犯之後、反派嘅政棍仍然一口咬定三𡃁係政治犯、而且利用佢哋嘅機器發動咗一次黃粉絲大遊街以示壯聲勢。咁搞法、豈不是指着一坺米異共話係朱古力嚟？既然係咁、不如請反派諸公每個人當眾嘗一口、好讓街坊大眾信服吖嘛！