2017年8月30日星期三

誰在轉移視線?



唔係口糠糠
口爽大隻講
無心撕破臉
有災用你擋

自從兩學三𡃁被判坐監之後、反盟那個「罰即是不罰」嘅如意算盤就此被砸碎。由期是尚未被判刑嘅黃亂搞手、一諗起坐花個躉就人皆心驚肉跳。再加上腍柿堅駕禍紅家會一事敗露之後、必會對嚟緊嘅議事堂補選擂台大賽構成不利影響。在一為功神、二為弟子之下、惟有請戒律大總挨義氣載上打壓異見分子嘅帽子、從而明批戒律院、暗斥翻案堂、企圖為反盟營造出一個受到政治迫害嘅型象出來見街坊。繼大撞幫頭領惡形亨以一條不成問題嘅問題(有冇為咗要釘死三𡃁、而否決檢控員不提翻案嘅決定?)來追殺戒律大總管之後、又輪到幫主戇嬌楊向戒律大總管使出同一道板斧。難怪終極堂過氣嘅頂級六判爺死火熊能也跳出來、償兩人各食一碗兜巴灼麵、以示回報兩人毫無道理兼亂噏廿四。

2017年8月28日星期一

玩誓惹的禍



政壇多大奸
弱雞咪來攀
一個不留神
實死冇翻生

無上堂終於否決玩誓情侶(扑嘢女和支那男)嘅終極翻案申請。換言之、佢哋已經到咗賠了夫人又折兵嘅地步。據支那男講、佢哋冇錢還、亦冇錢付堂費、已經準備好破產喎!在下並唔係幸災樂禍、更無心打落水狗、只係覺得件事根本上無必要搞到如斯田地的。假如當日佢哋兩人能夠老老實實進行宣誓嘅話、今日可能係風風光光的當尊貴。然而、佢哋卻選擇咗去做烈士、結果求仁得仁就此玩完。我唔知到佢哋有冇丁點兒後悔過、但我就沒有半點同情或惋惜嘅感覺。因為每個人都要為自己嘅行為負責、而且佢哋仲係年青、往後還有很長的日子要過、所以絕對輸得起。只要經過今次教訓後能夠學得穩重一點、對政壇醜惡多了解一點、對佢哋嚟講、未常不是件好事。問題只係、佢哋有冇做好足夠準備而矣!

2017年8月26日星期六

摩囉迪不及肥仔恩



潛龍飛躍勢沖天
老象不甘欲撲前
花人旨在稱雄霸
肥恩試核志剛堅

人人都誇贊阿星大佬摩囉迪是個精明阿頭、而潮仙大佬肥仔恩只是爛鬼一名。但按照最近嘅情況看來、摩囉迪以為自己支軍隊足以打敗街坊軍、更妄想以軍事力量配合花大叔壓倒紅家會。然而、另一邊廂潮仙嘅肥仔恩只係射咗一枚可以直達花家地頭嘅火箭、以及講咗一句“潮仙核彈只打花家、不打別家”之後、氣得花老大喪普機乎爆血管。更厲害就係、喪普被肥仔恩一嚇、就搞到所有部署都亂晒大龍吖嘛!嗱、摩囉迪死剩把口、而肥仔恩就實牙實齒試核過你睇。咁你話嘞、佢哋兩人係咪高低立見呢?政治本來就是一門莫測高深嘅博奕、其中嘅真真假假、並唔係我等普通人所能睇得通透嘅。之不過、今次確實係十個摩囉迪都比不上一個肥仔恩咯!

2017年8月25日星期五

冧井抵鬧


子踎監
父為榮
冧井爆響口
兜父勁詐型
世事難分真定假
諸君切勿表錯情

這邊廂、兜捹匡的父親兜老爹話、以佢個仔兜捹匡踎監為榮、仲吩咐捹匡洗乾淨啲個八月十五至好返出嚟。那邊廂、冧井唱反調、聲稱困在兒身、痛在娘心、登時氣得猶如「床板夾」嘅兜老爹連隔夜火都標埋出嚟。在屎可忍時、尿不可忍之下、兜老爹喊冧井咪過母愛泛濫、因為佢兩仔爺都骾唔落喎!所謂崩口人忌崩口碗、既然贏了陣、那又何必連牙較都要贏埋呢?事實上、人家兜氏父子從來冇諗過、出來圍威喂出吓風頭都搞到要做踎監咁大劑嘅、家陣仲要被人潤到有氣冇埞唞、你話唔嬲就瓦燒啦!係嗎?難怪連戇痴瘋嘅老爸都忍唔住、跳埋出來將冧井當作為出氣袋啦!依我睇、冧井都係少講兩句為妙咯!

2017年8月23日星期三

越搞越荒謬



發難又發狂
民主將滅亡
此間無大將
貓狗也稱王

日前妖蜓公開指責大撞公會話事人太隕石講話斷章取義、在評論傷學三𡃁𤓓三七、兜捹匡、戇痴瘋)被翻案堂加刑事件時、並氣講出制度暴力、只係將所有責任歸咎於年輕人。妖蜓理直氣壯的指出、成年人冇走上街頭、只係由年輕人走上最前線抗爭、要付責任嘅應該係嗰啲冇走上街頭參與黃亂嘅人喎!呢嗱、聽見嗎?妖蜓假借制度暴力之名、以一枝竹杆橫掃全城人。總言之、凡是沒有應佢嘅呼籲走上街頭支持黃亂嘅紫荊人都係借嘅。但係呢壇嘢口中嘅制度暴力只屬見仁見智、例如在下就係冇呢種感覺。在下只係想唔通、妖蜓究竟何所恃、居然膽敢向全城冇參加黃亂嘅街坊發爛渣?嗱、禮義廉嘅人在下見過唔少、但係禮義廉到像妖蜓咁嘅地步還是第一次。呢種人版都可謂世間極品嚟咯!

2017年8月21日星期一

揸正來做就冇衰



暴民泛濫勢難撈
就算神仙亦覺糟
荒唐事故天天有
道理唔通靠亂嘈

大撞幫頭領之一嘅惡形亨話、有份處理傷學三指(意思是:靠隻手指起家)𤓓三七、兜捹匡、戇痴瘋加刑案嘅六判爺神拳楊(翻案堂副堂主)與亂制派幫會問卷聯素有交往、亦曾應邀出席問記某成員嘅開心派對。雖然惡形亨解釋、並唔係話咁樣就一定有問題、但佢又喊六判最好就係檢點啲喎!惡形亨口風一轉、就焫到戒律大總管長臂猿身上去。佢大大聲喊戒律大總管長臂猿解釋、到底有冇否決過檢控員對傷學三指不提翻案嘅決定。看來、有人想借勢過六判爺和戒律大總管各人一棟、激發起那群本來對反盟漸漸心淡嘅黃粉絲去參加昨天嘅「周日反加刑」大遊行都未定喇!昨天遊行場面有如大球場散波咁墟冚、已經算係犯盟近年嘅一次佳續嚟架喇!照咁睇、惡形亨真係有番幾度散手嘅喎!

2017年8月19日星期六

必打的一仗



龍象不咬弦
互相把兵屯
老蕃來點火
你打佢安全

大笨象踩入龍族地頭垌塱超過兩個月仍在賴死唔肯走、而花家就不停呼籲龍族和象族雙方坐下來談。表面上是花家勸喻龍象以和為貴、但實質上是對龍族壞有惡毒之心。試問一聲、倒過來是花家被外族人踩過界、而紅家又不停呼籲雙方都坐下來談嘅話、花大叔又會唔會答應?現在是大笨象踩過界兼撩交打、若果龍族在此時坐下同佢隻象傾、即等同示弱。咁你話嘞、花大叔係咪其心可誅?依我睇、當下是別人來犯我、而非我去犯別人、故此越係怕事、越係多事、還是在適當時候實牙實齒打隻大笨象一鑊甘嘅才對。只有咁做才能收到敲山震虎之效。否則阿豬阿狗都跑到來找麻煩嘅話、到時莫講話新思之路走不成、更弊家伙就係連個勢都輸埋畀人吖嘛!

2017年8月18日星期五

誰在打壓誰?



不罰仍須罰
何必眼凸凸
老蕃幫倒忙
挨轟兼氣窒

繼日前、翻案堂判署反收地而衝擊垃圾會嘅13人組入冊8 - 13個月之後、昨日翻案堂判署三名參與衝擊門常開(反盟口中的民煮講場)嘅戰中開路三先鋒(戇痴瘋、兜捹康、𤓓三七)分別入冊6個月、7個月、以及8個月。嗱、所謂針唔拮到內唔知痛嘅。當日佢哋造成嘅衝擊對街坊構成重大損失而毫無知覺、今天被掟入祠堂“包括他們爸媽在內”才知到乜哋叫做痛。在下並唔係黑心望人踎監、而係覺得每個人都必須要為自己嘅行為負責。否則、我哋嘅社會就無秩序可言矣!三名被告(戇、兜、𤓓)在進入翻案堂之前、在大門外揚言永不言悔、並聲稱已經造好做監躉嘅心理準備。所以街坊們亦冇必要為他們惋惜、因為這條路是他們自己揀的。

2017年8月16日星期三

反盟賴嘢



阿堅做事大荒唐
屈人累己更不當
反盟抽水齊賴嘢
被人笑到面都黃

在腍柿堅被捕之前、白鴨幫與大撞幫聯手向保安大隊長比加超施壓、要跟他展開有關紅偵組踩過界做嘢嘅討論。其實係人都睇得出、討論是假的、想趁勢推倒一站兩份才是真的。因為這工程一旦被𢵌冧、反盟就有一件大功勞握在手中、而背後主子就會論功行償、到時就唔使驚制水、亦唔使怕被主人遺棄。之但係、有冇必要搵個人自編、自導、自演一齙“紅偵打乜嘴”嘅爛戲出來老屈紅家、咁就見仁見智咯。你睇、當腍柿堅事件公開的第一刻鐘、就有街坊表示質疑、甚至有人提出多處疑點來證明事有蹊蹺。在天眼協助下、謊言終於被識破。至於腍柿堅是自作業、抑或是無辜、那就要待巡捕房來證明、而白鴨和大撞兩幫人嘅囂張氣焰、就像看更李、鐵頭可、剁人李等抽水梟雄一樣、一下子全部消失晒喇!

2017年8月14日星期一

揸拂堂鬧鬼



放常無
益雀人
姑息皮佬𡅏
放過戰中群
今日公平離晒譜
它朝君體更加痕

在黃亂期間、紅家會喉舌蠻求社大家標題踢爆、罪惡城揸拂堂三大總管和十三部長裡面有黃亂內鬼、在適當時將會點出他們的名字來。嗱、這指控實在非常嚴重。須知到、三大總管當中最少有一人是黃亂內鬼、絕對是一件唔講得笑嘅事。講到十三部長裡面究竟有幾多隻內鬼、外邊人根本上係不得而知。難怪江湖上一直流傳揸拂堂內米家冤魂不散啦!今日嘅揸拂堂已經重新執過位、但內裡是否仍然隱藏着些甚麼鬼怪、仍然是不為外人道的。當大眾目睹黃亂主腦及其高層黨羽依然逍遙法外、難免會惹來諸多不利於揸拂堂嘅揣測。再加上六判爺判有公職在身而私底下收受金錢利益嘅常無冇罪、而戒律院院長長臂猿又聲稱不會翻案、以及啥工蛀冊所對於是否搣甩潑屎男沙包超嘅啥工資格議而不決、使得坊間越來越多人相信揸拂堂內確實非常之猛鬼。

2017年8月12日星期六

賴住先?



睇見就牙煙
文雀定老千
難瞞天上眼
惟有賴住先

某日白鴨幫幫眾腍柿堅聲稱、無端端被人夾咗上車、又無端端被人用釘書機在大臂打釘。據腍柿堅講、在幾日前已經收到電話警告、喊佢唔好去見流料波嘅遣孀流料霞、否則就會好大件事。後來腍柿堅將此事告知大撞師李翰簡。但李翰簡說那可能是一場胡鬧劇、無須要報警喎!結果在兩日後、腍柿堅就出事了!當他醒過來之後、發現自己被人安置在西宮灣曬太陽、但他並無立即報警、反而先召開記招、然後再斯斯然去醫院求醫。據腍柿堅講、擄走佢嘅人以北話問佢是否乜乜教嘅教徒、又提到流料霞、臨走前仲聲那是上頭嘅事、警察都冇佢哋乎嘅喎!因此腍柿堅認為佢自已係被強力部門嘅人虐待。嗱、呢單嘢扯到咁衡、今次大概有大條理由畀反盟來𢵌冧「一站兩查」喇啩!

2017年8月11日星期五

戇痴瘋準備好未?



蓋掩打龍通
惟有棄痴瘋
屍底傻仔墊
換得救主公

呢嗱、為着確保皮佬𡅏不會被「收水門」啲水㘉濕身、常無終放獲放生、亦因此而搞到通街火藥味。如果戒律院此時仲唔嗱嗱聲做番齙好戲出來見街坊、恐怕難掩眾嘴。經過各方妥協之下、戒律院嘅長臂猿院長惟有將那套早預備好嘅「鐵案能翻」戲寶擺上台、更加罕有的話到明要掟戇痴瘋等人入冊。睇嚟、戇痴瘋嘅真正價值終於能派上用場了!終觀戇痴瘋、𤓓三七、兜捹匡三個人之中、無論在文采和武德兩方面、戇痴瘋都是最佳人冊人選。假如戇痴瘋在祠塘踎足六個月或以上、佢以後都唔使再發尊貴夢。無疑、呢類咁具娛樂性嘅戲劇是有助於舒緩街坊大眾對六判堂、戒律院嘅不滿、亦可以洗脫米家餘孽與黃思勾結嘅嫌疑。既然係咁、惟有請戇痴瘋挨吓義氣、入冊踎多幾個月好了!

2017年8月9日星期三

最雞拍檔


殺雞原來是救雞
聞者齊丟路姆犀
法壇之上無真相
戒律黃思發圍

嗱、自從上次慈祥六判爺在公堂上稱贊戰中三名小頭目為公義而戰、然後高高舉起、輕輕放下、好讓佢哋受罪等如不受罰之後、其中嘅戇痴瘋登時唔習慣被人拉。日前戇痴瘋人稟六判堂、要求向總捕頭蘆葦草索取四萬五千両白銀(二萬兩係壓驚費、二萬兩係名譽費、五千兩係已支出費用)作為贈償。據戇痴瘋解釋、捕快在「頭七」當日並非拘捕他、但卻給他戴上孖葉、故有權以受害人身份索取賠償。但辯方卻指戇痴瘋搞錯對象、要攞賠償應該去找戒律院大總管長臂猿才對。嗱、我唔知戇痴瘋有冇被人老點、但佢就話會考慮嘅。

2017年8月7日星期一

撤資的啟示




既然翹口又㔆手
話你唔聽我便走
莫道東家無義氣
此刻一去勿翻頭

日前在大牌檔遇見多年失散咗嘅同學仔阿巨、得知他將會被公司調職去歐洲。據說、阿巨嘅顧主力牆大老闆陸續出售其手上與紅記合作嘅資產、甚至連麾下嘅常窒地產都易名為常劏實業。據阿巨講、近年大圈資金(大部份都是紅記資金)不斷湧入本城地產市場、力牆大老闆雖則財雄勢大、亦感難以招架。因此、他把手頭上那此與紅記合作嘅資產賣得就賣、把投資眼光轉向西方去。據統計數字顯示、今年上半年城中大小地皮機乎全都被紅資投得。阿巨直言、力牆大老闆委實敵不過他們、雖然他出售與紅記合作嘅資產而遭指責、但在商言商、唔講利益、唔通講心咩!總之鬧就隨便鬧、力牆大老闆就是繼續淡出紫荊城矣!

2017年8月5日星期六

新三國演義



花佬打橫行
摩囉趁亂煩
紅家雖有氣
要打冇艱難

當年花家大佬煲薯一口氣將伊郎、二拉黑、北寒列為三大邪惡軸心、還誣陷二拉黑大佬殺得武家中擁有核武、化武、以及超級大炮、並組成一支番邦聯軍炸到人家冚包散、死傷數十萬計、最後連殺得武都弄瓜埋。事後那些武器遍尋不獲、花佬便講一聲情報出錯便關人隱事。加上後來嘅聚利罅大佬卡達飛亦同一命運、伊郎和北寒仔皆醒悟到若不想死於非命、就必須要擁有核武才行。由此可見禍是花奇佬闖出來的。如今喪普無能力將件事埋口、便委過於紅家會冇實牙實齒餓死北寒仔、便借勢對紅家會發動貿易制裁。紅家會知到、如果對北寒大佬肥仔恩落重手、喪普必定會一個兜篤跟肥仔恩揸扒、到時自己就變成豬八怪照鏡、裡外不是人。但如果喪普滿以為紅家怕被制裁嘅話、那就計錯數了!在下相信喪普一旦發動制裁、蒙受捐失更大嘅一方唔一定係紅家會。

2017年8月4日星期五

六判無藍色



既然兩個口
有理懶動手
勝負已分明
新瓶載舊酒

當日西門墨(前花奇幫二五仔領班、當今皮佬𡅏大秘)將一百萬両銀分開四份、三份存入丐幫戶口、而另外一份就存入常無私人戶口。如果像江潮傳聞所指“是皮佬𡅏要求常無暫時代收、然後聽其指示再作安排”嘅話、常無呢個代收人稱號免強站得住腳。但別忘記常無是一名公人、私底下收受大筆銀両已經違反公人守則、加上他刻意隱瞞此事數月之久、直到清天衙門殺到埋身才將銀両存人丐幫戶口、已涉嫌構成公人行為不當之罪。講起嚟、當年詩人許就真係蠢夾笨、假如佢曉得話自己係“袋住先”咪乜事都冇囉!使乜搞到踎監、連上訴都衰埋?難怪有人質疑、大家都係收受銀両啫、點解詩人許同埋有關金主都要入冊、而常無及其金主就乜事都冇呢?由此可見、雖然兩名賴咗嘢嘅主角同屬「公人」階級、但常無背後嘅小白臉顧主、比起詩人許嘅老黃臉後台老闆靠譜得多了!

2017年8月2日星期三

常無勝利眾甩身



黃思又再顯神威
公平道理也趴低
台前幕後皆好戲
先餵沙糖後餵泥

「呸、我仲以為叮走玩誓六人組、即表示六判堂重光架啦、點知今次又係烏燈黑火。」
「有乜嘢令到你咁㷫、講出嚟分享一吓啦!」
「六判爺判丐幫幫主常無「收金不報」罪名不成立。理由係冇證據證明常無私受捐獻喎!
「唔係啩!常無已經承認、將皮佬𡅏畀佢嗰筆錢存咗入自己個私人戶口架啦!咁都砌唔入?」