寬己嚴人

雖無過犯面可憎

呢班瞀里確低能

張人醜事遮己過

無恥核突更撩𠹌

白鴨幫幫主胡扯喂日前在垃圾堂提出、揸拂堂香主狼鷹表現不合格、故在餘下任期內不得拿薪水。拳頭幫長老童智泉認為應該削減香主近身開支、因嗰班人冇協助香主與反盟搞好關係喎！呢嗱、早前胡扯喂提出以「撕法公正」去換取香主向黃亂黨羽頒發一道「免罰令」而被全城鬧爆之後唔淨止冇引咎下台、現在還要指責香主辦事不力、都可謂厚顏到連佢阿媽都冇眼睇咯！嗱、呢啲咪就係反盟中人寬己嚴人嘅鐵證嚟囉！講到童智泉就更加無聊、試問佢憑啥去判斷香主近身嘅工作表現呢？呢班友鬧出咁多低能笑話來、唔通垃圾會真係冇其它正經事可以去做嘅咩？

大話民調

民調作大夾囉唆

騙盡無知笨小哥

諸君咪話無所以

若信一成亦是傻

呢嗱、開講都有話、民調家家搞、答案各不同吖嘛！雖然是同一個問題、若是題目字眼具有引導性嘅話、答案就會則埋一邊。罪惡城大教館久不久就會公布一次由民調得來的十大垃圾尊貴排名榜結果。若論到呢類結果可信性有多高、則見仁見智。例如今次嘅十大排名（填充神、豬八萬、近身桃、葉柳、正盲巫、烈女狀、焫雞雲、螻小蟻、常無）就已經夠晒玩味矣！聽講話剛剛被擠出十大嘅就係儸三七。嗱、如果民調係反映大教館門生意見嘅話、在下則無話可說。如果係反映普羅街坊意見嘅話、那就應該要諗吓、點解連儸三七呢類對街坊“七竅通六竅”嘅人物亦曾經登上十大喇！

還我自主？

本來無拖欠

群醜亂喧染

沒借喊還錢

純粹鬧腌臢

昨日㒼陣遊街時、見到帶頭橫額上寫着「還我自主」四個大字、真係唔知好嬲定好笑。須知到、米旗統治本城百年、從來冇蟻民自主呢回事。然而、在大歸後就不斷有人向紅家會討回自主權。咁搞法、分明係阿茂整餅、冇嗰樣搞嗰樣。老實講、在「大影細國」嘅制度裡面、殖民地蟻民是不配享有自主權的。本城主權和治權係紅家會從米旗人手中拿回來的、根本上不曾欠不紫荊人甚麼。事實上、紅家會已經在「歸本法」授予紫荊人某程度上嘅自主權、可說是從冇到有。紫荊人可以要求獲得更大自主權、但要求並不等如討債。由其是那群“只有佢哋欠社會、而社會並無欠佢哋”嘅廢青所謂嘅「還我自主」、直程係無中生有。坦白講、佢哋嘅所作所為十足那些被寵壞咗嘅細路哥一樣、向家長索求不遂就攤在地上發爛渣死𦧲。可惜吖、呢群弱雞係注定係失敗嘅。吓、點解？咪就係佢哋唔承認阿家係家長、人家咪唔遷就佢哋囉！

好醜佢做埋

衰完又玩過

向來不認錯

唔怕累街坊

最忌缺人和

江湖傳聞顯示、㒼陣明天舉行「反對小圈擂台」大遊行、已經表態會參加嘅幫派計有：丐幫、拳頭幫、齋公、眾痴、而以垃圾尊貴身份參加者亦有：豬八萬、螻小蟻、小家樽等、盲巫淨、搏揸旗、雙瞧紅等人、但曾經積極參予小圈擂台「造馬」嘅大撞和白鴨兩大幫會均鴉雀無聲。由於㒼陣打起嘅係「反對小圈擂台」旗號、反映出反盟要以兩面手法去蒙敝街坊、即係「正反」兩個角色都被佢哋撈埋啦！呢種「神係佢、鬼又係佢」嘅兩面手法在世界政治舞台上是很普遍的、而箇中高手當然係世界霸主花大叔喇！正如喪普對付紅家會一樣、辰時指責紅家會操控人銀匯率、到咗卯時又轉口話係誤會嚟。總言之、花大叔唔鍾意嘅時候紅家會做乜都是錯的、當他高興嘅時候就一切皆不是問題。喜歡嘆花奇蔘茶嘅反盟、當然係有樣學樣、但弊就弊在斤兩唔夠之嘛！

沙包出冊

沙包出冊確堂皇

一眾花𡃁立兩旁

牢房小住添身價

水鬼妄想變城隍

被判入冊迫屋三十五日嘅舍工曾細牛（人稱沙包哥）今早出冊、佢班𡃁於大清早便在迫屋大門外兩旁列隊等候。沙包哥一步出迫屋祠堂時見到老記就馬上chok起個小生命苦look來、而且話當佢一入倉、就有人引領他坐上一張椅子上、有人在他肩膊上彼上黃色大毛巾、有人在他頭頂上戴上一個用黃色紙摺成嘅疑似后冠、有人遞給一枚太陽花當作為權杖、簡直當佢係「黃后」咁加冕喎！喂喂沙包哥、唔使咁㷫嘅喎、班倉友都只係同你玩吓、而且比起大教館班生番剝人兜褲蠟滴小和尚、又或是拎自己支私家棒出來㩧新生個頭、閣下已經幸運得多啦！知冇？

自曝其醜（二）

疑犯幫疑犯

當然冚包散

家醜爆出門

群奸眼坦坦

呢嗱、李瀚簡狀師替黃黨同志當辯護狀師、係同舟共濟嘅事嚟。點不知殺出一個甚麼陳掹旗嘅狀師、公開踢爆李瀚簡是涉案中人、仲指佢替黃亂疑犯辯護有利益衝突喎！經過陳掹旗咁樣一鬧、藍黨網民便食住上喊法政師出來解釋一下、點解咁都得。喂喂喂、各位街坊、稍安無燥。其實李瀚簡狀師只係為義氣而去幫班同志架咋！試問咁又干卿底事？在黃亂前夕、又係反盟班重心人物呼籲擁躉到舂區「飲」嘅、所以李瀚簡幫助班賴咗嘢嘅黃黨同志、亦係義不容辭嘅事嚟嘅。明冇？

自曝其醜

政壇多妖怪

甩底拒還債

無事稱英雄

走佬佢最快

反盟班友都可謂醜陋到冇人有、甚至連生佢哋出嚟阿媽都唔肯認佢哋咯！吓、點解？之唔係佢哋嘅醜陋之心路人皆見囉！件事係咁嘅、剛剛白鴨幫嘅胡扯喂提議、喊新阿頭出面運用特權赦免七景所犯嘅罪囉！可惜係人都睇得出、佢哋絕對唔會咁好死替七景求情嘅。基本上連阿茂都知到、嗰班友係想藉赦免七景而帶挈埋黃亂班搞手免受牢獄之苦。當時大撞幫嘅戇Q羊都有份附和、仲話呢啲係揸拂當局願意大和解嘅誠意嚟𠻹。之但係、被滿腔熱血嘅烈女妝當頭棒喝、不得以法治去換取政治妥協嘅。由此看來、反盟總算出咗一個像烈女妝咁樣嘅女中豪傑。但可惜吖、呢種咁有承擔嘅人、在當今政壇上委實太過稀有喇！否則罪惡城政壇上就唔會有咁多垃圾啦！

恐怖嚇機

行凶公司叫亂恰

此名聽落確心噏

顧客貼錢遭人𢱕

董事屈人恃大粒

近日花奇聯合行凶公司的一宗乙南龍裔花籍男士（乙花男）在嚇機上被欺凌事件越鬧越大、連花奇一哥特喪普都以「恐怖」二字來形容此事。目前已經有擅於打索償官司嘅頂級狀師自薦替乙花男索償。聽講話、索償額係以億計算、仲話唔贏唔收錢、贏咗兩份分。據行凶公司老總講、由於嚇機機位超賣須抽簽決定誰來讓出機位、而乙花男就是中簽者之一、但佢好鬥逞強拒絕合作、所以被機上警察押出機倉、其面部損傷亦係當事人自己弄成的。點不知當其他乘客將錄影片段擺上網絡之後、人們發現事情真相與行凶公司老總所講嘅話完全不符合、於是群起指責。翌日該公司股價暴跌八億花元、第三日跌破十億、使得該公司老總再走出來公開道歉、而且向全機乘客退回票價、希望能夠止咳。但似乎改不了人們對該公司嘅觀感矣！

低能惹的禍

嘩眾搏取寵

搏懵變面懵

焚香倒轉插

賤到冇人同

日前巡捕房飛鴿傳書告知蟲柴井、他將會被控以“在垃圾堂上倒轉神主牌和倒插香燭”兩罪。點不知、蟲柴井話唔接受預約拘捕、今是就被人鎖返去落案喎！佢仲話、呢彈嘢在垃圾堂發生、所以巡捕房應該先通知垃圾堂嘅。呢嗱、我唔知到究竟垃圾堂能不能成為蟲柴井違法嘅避風塘、但卻知到佢倒轉神主牌和倒插香枝確實神憎鬼厭。因為神主牌乃是先祖嘅象徵、而香枝乃敬奉神靈之物、所以蟲柴井嘅做法就是撩鬼攞命、死亦怨不得人。開講有話、寧犯天條、莫犯眾憎、假如蟲柴井唔鍾意拜神咪唔好拜囉！為乜要去侮辱先祖、兼同族人過唔去啫？蟲柴井今次攞先祖個神主牌出嚟侮辱、咁就當然係人神共憤架喇！基本上、佢有權選擇唔認係龍之後代、但冇權去侮辱龍之一族吖嘛！所以嘛、推出午門者、捨佢其誰？

知面不知心

聽言觀行費須時

真情假象那得知

當日托抬今賴賬

組班無力靠權宜

江湖上流傳、選戰期間反盟對打得井嘅攻擊聲強力弱、原來係受到幕後限制的。據說擺𠾍佬上枱完全係掩眼法、而那位過氣判頭更加係淪為走在獅子前頭嘅一個大頭佛。咁即係話、打得井確實係眾望所歸嘅人選。之但係、有一群奉名替她抬轎嘅人、今日卻與她保持最少三尺距離、甚至可以話係格格不相入。有人預料、打得井即使完成組班、但由於高手難求、所以未來五年並不好過。在下亦隱隱感覺到、當她上任城督之後就會出現綁手綁腳嘅情形。雖則話、無論是大老闆或是大土紳都好、絕唔會揀一個包拗頸嘅人出來倒自己嘅米。但今次抬舉打得井是不是其人本來意願就好難講。點講都好啦、打得井就是被這群人捧上台架喇！

最佳接班人選

你說佢差不是差

人人獲減佢得加

天生注定傻兼腎

穿上草鞋便棄家

有人話、戇痴瘋經常頻頻撲撲、唔係跑到米家在事頭港面前唱衰金紫荊、就係跑到花大叔面前唱臭大圈、再唔係就跑到寶島向菜英子高唱向日葵、簡直係金牌唱家班嚟喎！呢嗱、依我睇、戇痴瘋做二五仔做到青出於藍、絕非池中物嚟嘅。如果佢命夠長嘅話、肯定係漢奸界嘅明日之星嚟。睇怕連本城嘅金牌漢（看更李、司機陳、皮佬𡅏、陳四姑）都唔係佢嗰皮。雖則話、漢奸四老嘅名氣夠大又夠響、可惜代表作欠奉。之但係、戇痴瘋在黃亂一役之中卻是一鳴驚人、並在花家主辦嘅世界50猛人榜上名列第10、連一國元首、科學家、文學家、企業家等40人都要跟佢尾聞其屁。即使本城嘅力牆號大老闆、以及煩細缸大教王等人亦只能與他一起共享世界十傑嘅稱號。咁你話嘞、漢奸界之中那一個有戇痴瘋咁駕勢？

大校的變態傳統

狂生惡行又一單

剝人兜褲以蠟彈

高級教育唔多妥

栽培爛鬼養生番

罪惡城內嘅大教館玩新生、搞到被玩者尊嚴盡毀時有所聞。然而、呢個咁變態嘅傳統卻是一代傳一代、而且大有越來越不知所謂之勢。剛剛有報導指出、紫荊大教館某學生向媒體透露、在學生會選舉代表期間、發現有參選者曾經遭廿人強脫褲子、並在其下體滴蠟、以致其心靈和尊嚴皆受損而退出競選。勢難想象、在今時今日嘅文明社會裡面、作為高級學府嘅紫荊大教館居然會容許學生從事這種獸行。難道這叫作「未當大任之前、必須踐其尊嚴、踏其心寧」乎？咁就難怪當今大學生被冠以大惡生之名啦！

護照奇談

有條瞀里發噏風

反宗反到冇人同

唯恨祖先生壞相

踩黃托白屁不通

俗語都有話、拗頸冇大餅吖嘛！之但係紫荊城裡面偏偏有班人專門拗頸、而且仲要攞自己嘅身份出嚟教飛𠻹。據籍貫部公布、申領米旗（海外）護照嘅紫荊人由前年嘅2.6萬多人增加到去年3.7萬多人、增幅高達44%。有報導指出、𡃁男大教館（𡃁大）某書生會代表聲稱、當佢攞住個米旗（海外）護照前往番盟旅遊、關卡見到米旗護照連問都唔使問就立即讓他通過、但當他利用紫荊特區護照過關時卻被關員左問右問、搞咗一大輪才讓他過關。因此他認為米旗（海外）護照比紫荊特區護照更好用喎！呢嗱、根據在下的一位導遊朋在講、攜帶紫荊特區護照出外洲旅遊是非常方便、即使在番盟也是暢通無阻的。