鬼打佢咯

你雖慷慨我腌臢

豈能容讓你打尖

雖觸眾怒唔多怕

送上門來順手閹

呢嗱、咪以為貼錢替人家興建大樓、包裝修、兼送大床就必會受歡迎呀！原來係有人唔獨止唔領情、而且仲要興師問罪𠻹架！早前之嘛、荒謬縣跑牛會出資三萬萬多兩白銀在西狗區興建一所古宮展覽館、而中央政府亦答應送出一批罕有嘅歷史文物作為壓館展品。呢趟無須動用公家大賬房一分一毫、就獲得一家世界級嘅展覽館、係何等威水和着數嘅事？殊不知、負責呢個項目嘅大總管原來係冇依照程序做好公眾諮詢、而被反字堆食住上指控縣政府違反規則、並跑到公堂上告其一狀。點不知被人鬧爆之後大總管才曉得補鑊、話要進行公開諮詢。咁你話死唔死？

狀告縣政府的那位阿哥在鏡頭前再三鞠躬、並咽着嗓子講、佢所做嘅事係與政治無關、而係為咗捍衛現有制度。姑勿論係捍衛現有制度也好、抑或係借勢打擊睺實縣長個位嘅大總管也好、總之大總管也許與戰中大狀棍一樣、認為「不守規則並不等同不尊重規則」都未定架！雖則愛字堆指責反字堆企圖借題發揮、但事實上大總管又確實係未經諮詢先拍板、以及賣甩招標而私底下決定發錢商誰屬。在下實在想極都唔明、何解有種人做咗幾十年官、亦見盡唔少政治風浪、理應明知到先斬後奏嘅年代已成歷史架啦、居然照踹隻腳落去個氹度。正如博友話齋、如果由呢種人來當阿頭嘅話、睇怕荒謬城想有運行都幾難。講起嚟、前朝精英似乎有一個「好似唔知到自己做緊乜嘢」嘅共通點。已遞辭職信準備參選嘅大賬房、將本縣一向奉行嘅「行企主導」講成係反字堆一廂情願嘅「三拳分立」制度。過氣大判官更加係離譜到把戰中描繪成係好玩之事、仲話如果佢後生番幾十年亦會參加、否則就out嘅喎！大總管無𤶸整笪𤶸、係都要駕空現有制度兼畀位反字堆入之餘、亦令中央尷尬。呢班友在唔係激死老竇搵山拜、就係丟盡老祖宗嘅假。試問中央又點能夠信任呢班荒謬成咁嘅人？現在只剩下一名已報名參選嘅過氣保安大隊長尚未獻醜、相信唔使幾耐亦會鬼拍後尾枕架喇！大家不妨走着瞧吧！