沉底鱷

撐財神假作惺惺

掏古井忽然旺丁

一張刀變兩頭利

出假手邊撳邊扲

世事往往都係真易假時假易真、太過相信表面就很容易被人𧥺咗都唔知嘅。江湖上陰謀論流傳、有群人設咗個天仙局出來準備食大茶飯。他們在表面上擺一尊財奴像上台當神咁拜、但暗地裡另外開鑿一口古井、企圖擺設一個水生金嘅風水陣。此陣一旦成功、唔止係陰陽二宅有價、劏棺兩房持續興旺、甚至連釘屋僭建都可以變成有即是冇。此乃大團結之象、難怪咁多人爭住去掏古井啦！最唔好彩嘅係、阿柳在被人撬牆腳之餘、仲要被人奚落一番。還有嘅就係、惜日居廟堂之高、而今日處江湖之遠嘅壺官雖然胸懷大志、亦只能被視為戲台上嘅白鼻哥、但後面嘅推動力絕不可小覤。但呢啲全都係假像、因為台戲尚未正式開鑼吖嘛！

據講喺舊年、五家、十三會、十八寨（三十六堂）曾經考慮過白鴨幫和大藏幫（鴨藏聯）嘅推薦捧財奴上位。之但係、由於阿頭忽然喊退出唔玩、而換上古井披甲出戰、登時令到三十六堂大失預算。連日來、由於紅方喉舌不斷造勢、以致人人皆認定古井是真命天子。之不過、妙就妙在人氣差勁嘅阿頭無懼幫倒忙之嫌、在此時忽然跳出來贊揚古井膊頭夠力。更令人𢲷頭就係、曾經被古井“呢位號稱好打得之人”打到有氣冇埞唞斗嘅十八寨寨主、居然公開稱贊古井處理釘屋嘅工作做得好。究竟佢哋班友嘅葫蘆裡面裝嘅乜嘢藥、就真係要佢哋自己至知。若說當中無「景轟」嘅話、相信連鬼信都會信。仲有呀、明明係捧財奴嘅鴨藏聯、近日忽然轉話題指「目前冇掏古井嘅理由」喎！我就想唔通其話中嘅含義嘞、唔知你又想得到冇？因此在下只能用「大熱不穩」四個字、去形容財奴當前嘅狀況。從當前形勢睇嚟、鴨藏聯根本上冇能力令到泛㒼統一口徑。即係話、財奴嘅勝算不大矣！至今藍黃兩陣均在靜靜窺探局勢變化、言行都顯得相當謹慎、大家都似乎在等。照咁睇嚟、大主角尚未出場喎！