攞警贈㷫

焫你不㷫佢便㷫

呢回又要玩鋪勁

紅旗高掛演蕃操

睇落有人唔生性

俗語請得好、所謂一件污、兩件穢吖嘛！繼大總管在處理「西狗顧公展館」項目嘅手法惹爭議之後、咱家巡捕房又跑去前事頭婆屋企、搲咗幾個米旗軍教官返來捕快訓練堂教授米旗儀仗隊步操。坊間廣泛質疑、既然本城已經回歸天朝廿載、區旗和區徽都已經更換、點解仲要學米旗儀仗步操、是否有人尚未能放下昔日殖民嘅傳統？之但係、本土獅龍會班手足就顯現非常雀躍、仲有人話要找個機人帶同「獅龍旗」前去跟咱家嘅儀仗隊來一趟大匯操喎！

其實本縣巡捕學習米家儀仗隊步操、基本上係完全講唔通。因為本縣儀仗隊是效忠紅旗而非米旗。身為荒謬縣巡捕房儀仗隊以米旗人儀式向紅旗進行敬禮嘅話、簡直係不知所謂。在這情況下、隊員心態亦難以平衡。若然在某些大日子裡面、荒謬縣巡捕房儀仗隊奉命跟紅軍進行聯合大匯操演嘅話、咱家這支巡捕房隊伍就會變成別豎一格、分分鐘會令看官誤會是米旗也派來一支米籍龍裔儀仗隊參與大匯演、到時就真係贈“㷫”了！

從今次事件可以見得到、縣城雖然已經回歸而民間人心未回歸都唔在講、更可悲就係連公人隊伍嘅人心都未能回歸吖嘛！人所共見歷任縣長不止管不好民生、甚致連衙門內務事亦管得一塌糊塗。難怪今次中央為縣長人選開出嘅條件之中、竟然包括「必須有管治能力」這一條。呢嗱、這類連小學雞都認知嘅基本條件也要特別提出來講、可能會令外人見笑、但係本地人就真係被人擳都笑唔出囉！