2017年12月30日星期六

寶島軍方痴人說夢




外行充內行
越鬧越荒唐
嘴巴雖然硬
難禁內心慌

早前寶島軍方向花家要求購賣F35型隱形戰機抵禦紅家嘅J20隱形戰機、但遭到拒絕。向來不會賣一手武器給寶島嘅花大叔認為、只須要協寶島將現役F16型戰鬥機升級就可以了!這個回應對於剛剛答應出巨資購買花家退役軍戒嘅菜英子來說、當然是非常失望。但在無計可思嘅形況下、也只能強顏嚥下這口氣。之但係、問題就來了!

2017年12月29日星期五

痴瘋係得嘅



天生我才真係𠵿
執輸行頭賴你𠾍
素以硬膠作招來
有人願買你吹咩

黃亂小頭目戇痴瘋獲准擔保出冊辦理上訴手續其間動作多多。呢頭拼命唱衰大牢待遇、嗰頭又為取得參選垃圾尊貴權利而搞撕法覆核、最近又被傳出利用視象系統向獅子城傳播講獨訊息、累到網台台主違反當地「不得在未經批准之前與外國政治團體或個人公開論政」嘅法例而面臨牢獄之災。罪惡城部份媒體揶揄戇痴瘋是人皆喊打嘅過街老鼠嚟。

2017年12月28日星期四

樂此不疲



舊橋再翻新
神鬼亦照𧥺
大話靠人緣
有着兩份分

有報導指出被驅出境嘅假難民居然可以玩上訴。咁搞法、分明係用罪城人嘅銀兩來掟穿罪城人嘅頭。究竟邊啲契弟咁抵死、做埋啲累街坊嘅事呢?嗱、唔使問阿貴都估得到係狀棍嚟啦!有唔少狀棍認咗花大叔做契哥、以致摱朝廷車邊嘅投家有生意都唔敢去益佢哋。於是乎、班狀棍又想去打假難民主意。須知到狀棍幫假難民出頭、大賬房每年都要花上十幾億両銀來應酬佢哋。聽聞話、其中有間狀館獨佔一半難民生意額。如今又要玩埋上訴、納稅人肯定又要再當冤大頭。但白講、就算疊水如花大叔、恐怕都拿不出咁多錢來應酬班契細佬。如果話、十幾億両銀裡面抽一成出來作為鬥爭費、條數都幾禁計。不過咁、若無公家大開法援之門、亦唔會吸引到咁多人踴躍到來替難民出頭搞上訴啦!係嘛?!

2017年12月27日星期三

街坊的無奈



賣草唔賣花
𠿬蒸生
見者頭擰擰
聞者掉喇叭

噚日、過氣車房部部長冰涼張話、樓價飆升唔關大圈人嘅事、係啱架!事關罪惡城樓價自八十年代中期便開始飆升。滿以為九七後就會回穩、殊不知原來情況剛剛相反、並在零三年沙士過後更加係一發不可收拾。雖然人們政見不同而且時有執拗、在炒樓方面卻是同聲同氣的。時至今日、本城樓價已經高據世界三甲之列。之但係、有人似乎食極都唔飽、再加上「地從何來」配合之下、連街坊嘅穀種都快要被嗰班友挖清至係。當下縣太爺願意將邊疆土地鬆綁、以換取大戶從手指罅漏多少地出嚟作為蓋搭平價竇之用、呢啲就係叫作妥協嘞。可惜消息並無透露有關詳情、而不得置評而矣!

2017年12月26日星期二

掠到盡



有水唔掠被天收
區區碎銀也不留
莫怪此人不義氣
到時佢走我揸兜

呢嗱、常聽到人講、只要土地供應充足、樓價就會平順下來。之但係、罪惡城嘅現象係公家越推地、樓價越高升。這些都是近幾十年來屢見不爽的事。說穿了、無非是整個罪城民生都被幾個大家族壟斷所致。也許你會不認同呢種講法。但我可以話過你知、無論是生意人或是打工仔無一不是依附着這幾個大家族求存的。當你開鋪做生意、首先當然要有足夠資金、若不夠就要靠信貸、然後就是要有鋪位、水、電、以及貨源、而這一切都是由幾個大家族旗下機構提供的。如此類推、你就會發現原來自己也逃不出被壟斷嘅框框。之但係、這個現象並非罪惡城獨有、而係全世界都一樣。因此、當大財閥成為國家元首或地區最高領導人嘅造王者之後、一切就可以跟隨一己意願去辨。因為當權者必須給造王者回報、世界就開始落在大財閥手上。即係話、地球上所有紛爭都是由他們的利益衝突而起的、最典形例子就是花大叔打嘅波輸灣石油之戰。

2017年12月25日星期一

誰寢食難安?



大財在你手
何必喊咁口
小講風涼話
勿惹眾生憂

日前揸拂堂大賬房掌櫃矛波在飛時卜講、見到罪惡城樓價租金高企令他寢食難安。嗱、矛波手握大賬房鎖匙、銀兩由佢支配、而且當下庫房水浸、而佢本人亦係靠疊磚頭起家嘅、真係講出嚟都冇人信。身為財神爺、見到乜乜霸權食到滿肚肥膏、連著襪都彎身不來、理應做番啲嘢出嚟好好咁去平衡一吓至係。嗱、咪同我講覓地艱難。人所共知地是有的、只係被一小撮人囤起來。如果揸拂堂能夠向他們力陳利害、在商言商之下冇理由不作出妥協嘅。上屆狼家班成員盛贊住(違法蓋搭)劏房好、仲講埋一大堆涼薄嘅廢話、以致人皆插之。今屆揸拂團應以此為鑒。當下親紅喉舌機乎日日都稱贊揸拂人林亞井專注民生。之但係、街坊淨係見到有人替佢塗脂抹粉、實際上係見唔到有那一個民生項目獲得顯著改善嘅。

2017年12月23日星期六

新冷戰時代



不怕橫嘭嘭
總要自身硬
練成金鐘罩
無懼人發難

早前袋鼠家某網站向龍裔選民呼籲勿投票給豉油黨候選人、因為該黨是個反龍族嘅組織嚟。就係咁、便焫㷫咗身為豉油黨人嘅袋鼠家大佬嗎𠹭吞寶(下稱吞寶)指責紅家政治滲入他的家族、並效法太陽伯伯說袋鼠人民站起來了!這一齣鬧劇看係兒戲、但其實係花家要全面打擊紅家前嘅序幕戰嚟。江湖盛傳、自從花家情報部門向吞寶報料、指紅家用銀兩收其家人並進行政治滲透之後、吞寶嚴格限制家族成員跟紅家交往。豉油黨閣員指那些跟紅家稍有交情的政敵都是被收買的。即使是在野工黨首領跟龍族企業家一起吃飯之後、都要被問長問短問企圖、使得袋鼠政界人皆噤若寒蟬不敢張聲。當下雪喱、木吶薯、默魚砵等大教館皆出現反龍族標語、甚至有龍族留學生被侮辱和毆打。紅家駐袋鼠家總代理已經提醒留學生小心周維環境、有須要時馬上連絡他們。搞成咁,難怪有人擔心已被壓下去的排龍風氣又再死灰復燃了!

2017年12月22日星期五

莫明其妙


怎想也不明
難於謂太平
欲知真景象
惟有望天清

縣太爺口口聲聲話現在不是時候將罪城安全法(城安法)列入議程、必須等到係人都明白立此法係為國家安全、同時亦為大家好之後才係時候喎!之不過、佢又話會盡快着手去搞立唱歌法喎!因為唱歌法可以使年輕人更加愛國。嗱、在下對於縣太爺講嘅話完全聽唔明、唔知你又明唔?首先、除咗反派之外、並唔係人人都抗拒城安法嘅、縣太爺嘅講話似乎有一枝竹篙打盡一船人之嫌。其次就係、唔見得反派認為唱歌法不是洪水猛獸。更令人𢲷就係、縣太爺將勒住普選知縣來比喻勒住設立城安法。因為普選知縣越被拖延對小圈子特權分子更有利、而城安法越被拖延對國家安全越無保障、但對收受外國獻金而辦事嘅政黨就非常有利了!

2017年12月21日星期四

誰干預誰內政?



惡人先告狀
暗箭最難擋
慎防家裡賊
咪個口糠糠

勾洲議會踩過界指責大圈干涉罪惡城內政、仲話擔心城中亂黨嘅安全。嗱、姑勿論大圈是否干預罪城內政、但勾洲議會今次就係紮紮實實咁干預大圈內政。基本上、罪惡城是大圈範圍內其中一塊土地、即使當中有矛盾亦只屬大圈家裡事、跟圈外人連個屁嘅關係都沒有。勾洲議會憑啥對大圈呼呼喝喝?但一查之下、真相便大白於天下。原來本城亂黨勾結老番搞事。這群家火挾偽民主自重、妄想撇開大圈而主宰罪惡城。須知到、一般街坊都是為口奔馳嘅打工仔一族、那裡有時間去跟亂黨鬼運?換句話講、假如亂黨嘅衝勁用在為街坊爭取快啲上樓嘅話、一定有大把人支持。之但係、爭取那些對普羅大眾無邊無際、而且仲係損人利鬼嘅事情就梗係冇乜人睺啦!

2017年12月20日星期三

阿頭吹雞


唔怕計錯數
最緊要識撈
暫時將馬勒
日後再操刀

今次議事堂成功修改遊戲規則、證明街坊對黃鬥士嘆慢版嘅態度已經忍無可忍。黃營一心想利用在議事堂外瞓街來吸引擁躉到場支持、圖以群眾厭力迫使藍營讓路、若然不果就趁勢轉化為二戰。殊不知、到場嘅人居然係記者多過支持者、結果又當眾衰多一回。路邊社報導、幕後操盤人已經意識到黃營此仗必敗無疑、再拖落去勢必連老本都蝕埋。於是急急棄長痛而取短痛、索性輸一仗而保大局。當黃鬥士再度進場時便故技重施、齊齊犯規博被逐離場、以此當作為打敗仗嘅遮醜布。嗱、講到呢度、相信大家都可能感覺得到黃鬥士是身不由己的、如何布局是由幕後操盤人來決定。吓、究竟是誰跟誰在幕後較量?依我睇、還是留一些空間讓閣下想想吧!

2017年12月19日星期二

拉布以外



老嫩分成兩大派
現實理想夾唔埋
政客擅長攻心計
討了便宜更賣乖

經過連番擾攘之後「修改遊戲規則」議案終於獲得通過。注於往後發展係點、就要睇過至知喇!不過咁、今次除咗議事堂場內打得火般熱、場外亦不遑多讓。雙方都有擁躉在場外打氣和支持。但係在反拉布行列之中大多數都是中年和上了年紀嘅人士、甚少見到有青少年參加。有街坊揶揄、大多數精壯嘅青少年都被黃營招攬咗、只係留一班年弱將殘兵畀藍營使至喎!

2017年12月18日星期一

別視作等閒



若信佢忽悠
注定要倒流
珍珠冇咁真
造反我行頭

日前六判堂判處三名「翳國木吶黨」黨員入冊二年四個月至三年十個月不等。六判爺指三名被告製造炸彈是非常危際嘅事、沒有減刑空間。嗱、人拉咗、案已判、究意件事又係咪就此完結呢?回想當日、反盟大狀京茶杰和李看間都實牙實齒話講獨係偽命題嚟。佢哋仲話罪惡城冇講獨𠻹。難怪師爸教落、總之將政治人物嘅講話倒轉過來理解就包冇撞板架啦!大眾都有自共睹、戰中之後講獨幫會如雨後春筍般的開到通街都係、現在連炸彈都造埋出嚟。如果咁仲話係偽命題嚟、唔知你又信唔信?有啲嘢不開始尤自可、一旦開始咗第一次、以後就手尾長矣!

2017年12月16日星期六

廿年磨劍



信鏡唔信命
練出真硬淨
廿年磨一劍
博來眾掌聲

昨天你砸散我在南聯設置嘅總辦事處、我忍了!你在南海撞毀我部戰鬥機、連機師都撞死埋、我忍了!在阿扁玩島獨把戲時你關掉天眼致我於盲、然後派遣航母到台海耀武揚威、通通我都忍了!經過廿年不斷忍讓、磨練和奮鬥、如今南海局勢大定、填島造陸速度震驚世界。在西沙搞對峙嘅安南終於落荒而逃。賓家轉軚、南海仲裁成廢紙。架仔非法賣起釣島、反而促成紅家在該區展開常態化巡邏。紅家戰船和戰機經常環繞扶桑島任意航行、使得架仔密密抗議、都可謂世界輪流轉咯!當日得意智只係講咗一句 “歐元比花元更適合用作石油結賬” 就被花家就引爆男師奶夫分列之戰、使得歐洲經濟機乎崩盤、甚至歐盟亦機乎解體。從此就冇人敢再提取代花元嘅事。之但係、今日紅家就要以石油、人元、黃金掛釣(人元可以在滬市黃金交易所兌換黃金)打破只有花元才可作石油交易嘅神話、使得花大叔行唔安、坐唔樂、連覺都瞓唔着。花大叔很清楚、假若全世界爭相儲備人元嘅話、花元霸權便完蛋了!

2017年12月15日星期五

死人水都想抽



喫完又再喫
還要口擘擘
死人照糟質
人皆責賤格

繼早前豬八萬在議事堂開會期間引用花大叔嘅說話、屈紅家在南海對南亞仔威迫利誘、企圖霸佔整個南海之後、日前他又師爸上身、趁着南京大屠殺80周年紀念企圖將南京大屠殺擺上台。此君一出聲便嚇得議事堂內人人心驚、個個膽震。但凡知到豬八萬跟島獨和倭寇兩大集團嘅曖昧關係者、無不擔心佢會引用架仔嘅講話去歪南京大屠殺曲歷史。坐館爺大口梁當然不會答應。點不知機佬泉亦跳出來加人抽水戰圈之中。嗱、政棍果然係無良知可講嘅、幸好坐館爺大口梁總算有人性、一口拒
絕豬八萬和機佬泉嘅提議、否則卅多萬死者都要被老屈架喇!

2017年12月14日星期四

反派能全勝嗎?



㕲嘴靠大聲
發難夾驚青
當髧發蹄騰
人蠢實聽釘

嗱、補選距今雖然尚有三個多月時間、黃藍兩大陣營已經開始部署和拉客。如果黃盟真的能夠全勝尤自可、否則就真係應正嗰句「自作業不可活」了!老實講、如果唔係黃思六條冷死蠢嘅話、基本上係唔應該會有今次嘅鋪選、更加冇可能讓藍思有機可承到來掙凳仔坐。之但係、眾痴那群小學雞仲係唔識死、居然要去撐嗰個累街坊嘅鹽蟲妖。坦白講啦、投資喺呢條友身上、簡直同揼錢落海冇分別嘅、㜺得益咗藍盟加咋。然而黃盟那邊確實係人才凋零、而且有老鬼唔知自己已經衰到貼地、仍然死都唔肯將機會讓畀班後輩。黃思內部爭吵不停、至今依然未講掂數派誰出選、試問咁拗頸法要拖到幾時?在下實在睇唔出、究竟黃思點去打呢一場仗。

2017年12月13日星期三

亂得有道理



何以亂糟糟
因欠殺人刀
雖則權勢大
實際冇心撈

這邊廂、有三名迫爆區暴動(迫暴)暴徒棄保潛逃。那邊廂、六判爺又再次批准另一名暴徒離境嘅申請。街坊不禁質疑、六判爺憑啥認定暴徒不會有去冇回?假如所有暴徒都走清光、迫暴案豈不是不審自結?難怪有人話、六判爺跟其同門「即將劈炮嘅戒律院大總管」一樣、博唔使做啦!喂、究竟罪惡城納稅人嘅血汗錢所供養嘅係啲乜嘢人嚟架?點解硬係任憑那些禍城殃眾嘅黃禍頭領逍遙法外、仲任由迫暴暴徒遠走它方架?仲有、何解我哋嘅縣太爺居然會堅離地到、連有案件拉布、以及再三走犯都唔做番啲嘢出嚟補鑊?究竟係唔知點做、撥或係唔想去做呢、吓?!

2017年12月12日星期二

我係黃思



在江湖身不由己
政壇上惡毒卑鄙
想當初高朋滿座
事至此再會無期

各位街坊我叫做黃思、我並唔係一個人而係一個整體。當我是仍係飯民時、即使拖一百幾十萬人上街亦是祥和有序兼大獲好評。當我被改名為黃思之後就跟獨思鬼混、並弄得滿臉猙獰兼神憎鬼厭。在獨思成為旺暴疑犯之後就爆發高級獨思走佬潮、而留下來低級獨思若不是投靠米字旗、就是勾結倭寇、或是跟台島皇民後代合謀將本城作為反紅基地。現在獨思走佬嘅走佬、失踪嘅失踪、留低隻鑊由黃思來孭、使得我哋在垃圾會內拉布拖、在會外𠼱地夾瞓街、博取街坊激烈支持。可惜城中街坊已經不耐煩、跟藍思一起指責我等黃思阻住個地球轉。但係我哋必須提醒街坊、假如遊戲規則一旦被修改之後、廿乜條、乜乜教育、乜改等項目就會落實、到時黃思再幫唔到你哋。現在我哋一班黃思尊貴決定發大單嘢來搞、索性趁今次反修改遊戲規則引發二戰。如果成功嘅話、那就替花家立大功架喇!你會唔會來支持吓咁呢?

2017年12月11日星期一

肥仔恩的自白



我講嘅話你唔聽
惟有霎時嚇一驚
搞你唔掂我冇偈
惟有攬住一鋪清

我係北寒現任大佬金睛恩、人人都稱我為肥仔恩。自從我爺爺金日繩當老大時就開始受花大叔嘅死氣。當我老爸金睛日做大佬時除咗受花大叔死氣之外、過要聞紅老大嘅屁。所以到咗為呢一代決不再受氣兼聞屁。我要學東方紅伯伯一樣、搞壇大核彈出來篤眼篤鼻。今日呢個世界已經係皂白不分、那群牆頭草把惡棍捧到天上去、將善良如我的人踩落十八層地獄。所以我必須發奮自強、非要把這個不公義嘅世界扭轉過來、為所有像我一樣受着惡棍欺壓嘅人們討回公道、並創建出一條生路來。

2017年12月9日星期六

白鴿雲飛擒大咬



勿笑我黐纏
思君夜難眠
熱情難自禁
風騷賣不完

姣婆遇着姿粉客一拍即合就見得多、白鴿雲飛擒大咬嚇怕靚俊哥你又見過未?話說、日前黃營為着阻撓藍營在垃圾會硬鎖新遊戲規則而玩嘢。其間靚俊哥拿部手機出來、准備透過飛時卜直播現場實況。殊不知白鴿雲話靚俊哥影人唔影佢、便呷起乾醋來。她一面用心口頂住靚俊哥、另一面將一張紙皮擋着他雙眼、搞到靚俊哥無法拍攝。靚俊哥雖然左閃右避、但白鴿卻個心口就係唔放過佢。靚俊哥被白鴿雲弄痛了臉、並喊她走開。但白鴿雲懶風騷咁話、我鍾意呀、呢度係你嘅咩?靚俊哥實在消受唔起白鴿雲滿身騷氣、於是喊她勿再死冤。點不知白鴿雲眯起雙白鴿眼話靚俊哥性騷擾佢喎!難怪有人話白鴿雲黃色上腦、一見到靚俊哥就失晒控啦!

2017年12月8日星期五

阿爺出招



我忍讓時你扮蟹
搞到機乎硬晒軚
反擊絕對不含糊
呢趟看誰出手快

01年世貿組織邀請紅家加入時、雙方簽訂一份協議書、闡明15年後(即161112日)紅家自動擁有自由貿易地位。嗱、在原則上而言、當紅家擁有這地位之後、所有家族都不得繼續以本家法則去解決與紅家嘅貿易糾紛、而必須依照世貿規則進行、到時紅家就可以跟所有會員家族在公平條件之下競爭。之但係、當紅家依足規舉做滿15年之後花家反口了、架仔反口了、連歐盟都反口了!即係話、以花家為首的七大工業家族都反口了!他們之所以反口、就是要紅家繼續做羊牯。紅家當然不能接受、於是向世貿控告那些反口覆舌嘅家族。正當歐盟知到再係咁搞落去勢必信用破產、並在態度上有所鬆動之際、花家又再發聲不承認紅家擁有自由貿易地位、藉此迫歐盟站在同一陣線之上。嗱、這就是花家和歐盟嘅價值觀了!

2017年12月7日星期四

報警啦



老定夾自然
他死佢宣傳
天災人打救
作業快玩完

日前身痕黨大佬葉柳話、該黨顧問理條褲被靚剪號大掌櫃煙雨窗恐嚇、並叫佢轉告葉柳立即封嘴、否則會對該黨黨員不利。嗱、在下唔知到實情係點嘅、但聽起來就戥身痕黨黨員嘅安全擔心。雖然對方並冇指明究竟「不利」是甚麼、但確實有恐嚇成份。因此、身為大佬嘅葉柳係有責任確保佢班𡃁安全、立即去報警、而唔係拿班𡃁條命仔出來博宣傳嘅。仲有呀、人家靚剪號分分鐘都可以反過來執葉柳一劑、指控佢公開誣衊、並以名譽受損而要求賠嘗、到時就真係累己累人咯!嗱、對於曾經當過保安隊大隊長嘅葉柳嚟講、係唔應該犯這種低級錯誤嘅、係嘛?!

2017年12月6日星期三

罵人須有理



咪亂發脾氣
罵人須有理
人皆有眼睇
看誰衰收尾

有藍營人士不斷鬧爆戒律長為未找數先走人。意思係、指責戒律長留低一坺蘇州屎就劈炮唔撈、乃屬不負責任所為。嗱嗱嗱、在下必須聲明立場、我並唔係偏幫任何人嘅。請問一聲、何謂蘇州屎?基本上沒有任何一個戒律長能夠在離職前把所有工作都做完、除非世界可以暫時停頓下來等候則例外。罵人者曾經係議事堂長老、難道人們認為他在任期間未曾完成所有工作指標就應該挨轟嗎?嗱、賴屎賴尿人皆有之、罵人亦必須罵得有道理才對。戒律長留低嘅並唔係蘇州屎而係遺憾。

2017年12月5日星期二

誰之過?


你說我錯不是錯
清除瘀毒冇囉唆
盼望官家能體亮
紓難化恨咪蹉跎

剛剛在報章看見一則標題寫着「乞丐獵人」字樣的報導。內容是一名中年男子在中灣區驅趕乞丐。無論是男、是女、抑或老病傷殘嘅乞幫一律不放過。期間雖然有不值驅乞男行為的路人對他指指點點、他卻好少理、並對記者講絕不會心軟的。據驅乞男說、丐幫中人多最偽裝出來騙錢的、所以他非將他們趕走不可。嗱、驅乞男滿以為這樣做是幫城出力、而更多人卻認為他是鐵石心腸兼無聊之輩。究竟驅乞男是對是錯已經不重要。重要嘅係、點解城中會出現像驅乞男這麼樣的人。

2017年12月4日星期一

勿輕信人言


唔係要靠嚇
人有不同格
勿信片面詞
有局應當拆

近來在互聯網絡經常出現一些刻意誤導事件、使得一眾網民對被指控嘅人士喪插之外、還令到當事人蒙受精神上和經濟上嘅損失。繼早前一對男女刻意在一碟炸雞造手腳、然後透過飛時卜老屈食肆掠水之後、今日又有報導指出、有人在自己未搞清楚之前、就硬着指某商店店員收錢唔找錢、並在飛時卜上指責對方博大霧呃錢。就係咁、本來是誤會一宗、又或是某人想找些事來博出名、卻演變成一場又一場網上屈人事件。幸好、本港流行安裝閉路電眼、並將一切都紀錄下來,否則隻死貓就食硬都得咯!

2017年12月2日星期六

大恐與細恐



喪普份人黐孖根
硬把肥恩當仇人
既是同行心互扣
兩恐宜作一家親

呢嗱、喪普剛剛放話要用核武砸散肥恩嘅老巢北寒之後、使得花軍軍頭跳出來澄清、是不會接受非法核攻擊命令。由此看來、花國國內對喪普唔多放心大有人在。喪普為保顏面、便改口話要將北寒列入恐怖組織名單之內。嗱、如果我冇記錯嘅話、每當肥恩受到喪普恐嚇、北寒就會試導彈或試爆核彈以作回應。話口未完、肥仔恩剛剛又成功試射兩枚能夠涵蓋花國大部份地區嘅導彈。有地質學家發現沉睡中的長白山火山受到核試刺激漸漸甦醒過來、並且有大爆發之虞。如果肥仔恩癲起上來再玩一次地下核試、分分害得東亞地區死人兼冧樓嘅。若他在太平洋上空試爆、海陸生態環境都難免於難。其實喪普與肥恩呢兩壇嘢無論在性格、視野、行為等各方面都是同一個阿媽生出來一樣、何不結拜為兄弟?點都好過狗咬狗骨兼累街坊吖嘛!

2017年12月1日星期五

不是勾結



不是勾結是同流
蒙混手法十分牛
街坊看得兩頭擰
誰能打救實甚憂

近年來罪惡城被指為世界難挨之地、甚至有聲音指縣府所做嘅扶貧工作是越扶越貧。嗱、縱觀全球就會發現、地球上每個角落都機乎一樣係咁艱難。當下世界各地都係只有一小撮人賺到盤滿砵滿、而大部份人嘅經濟狀況卻出現行路打倒蹆現象。曾經有經濟學專家講過、今日世界上的80%財富集中在一成人(超級富豪)的口袋裡。剩下來嘅20%財富又被另外一成人(中產階層)佔據一半。剩下來的10%財富便由其餘八成人去攤分。到底這顯示出怎麼樣的概念?依我睇、就係乜乜勾結食水太深嘅結果嚟。

2017年11月30日星期四

你走佢都未走



你踢我走我不走
判罰無厘兼漏口
污水泛濫人之過
想見清泉勿逗留

昨晚在榕樹頭講壇聽柳呼風講古、佢話欲想罪惡城獲得安寧、首先要將那些非我族類嘅六判清除、然後再委派有國家觀念、能站在國家同一水平線上思考問題、維護國家主權和人民利益、以及履行對國家責任嘅人來當六判。嗱、聽起來、抑大俠講得極有道理。但問題係、由誰來擔起推手之職?一般而言、當然是縣太爺了。嗱、本城縣太爺雖然是由朝廷任命、真正抬舉他的人卻係一小撮擁有特權嘅小圈子人物。因此很難判斷縣太爺心裡面嘅效中對象是朝廷、抑或係那個造就他的小圈子。按照罪惡城嘅情況看來、縣太爺故然要效忠朝廷、但亦不得不以小圈子利益為先。在這情況下、踢走黃六判是奢望、倒不如自己走好過咯!

2017年11月29日星期三

咁都唔使坐監



你造反時我眼坦
成盤生意冚包散
今日爾能當好運
惟獨是我被玩殘

當日涼茶杰對黃衛兵講“不守戒並不等同破戒”原來唔止係啱嘅、而且仲係其道不孤𠻹。昨日六判爺判決四名犯天條嘅黃衛兵守行為一年、另罰每人一萬両銀了事。據六判講、當中有人只係睇唔過眼捕快對黃衛兵「開拖」才在當天加人對抗、唔算得上係挑戰法律、亦唔算得上係骨幹角色嚟喎!嗱、唔知咁講法、算唔算得上係「猢狸鬧交」呢、吓?!雖然罰款一萬両銀唔算太少、但阻遏作用就冇乜囉!聽聞話、合格黃衛兵是獲得金錢上援助的。無論點睇、黃亂在社會上造成嘅災害都唔係小嘢、我老友阿黃盤生意就係死喺佢哋手上。如果黃衛兵不是遇上菩薩爺打救嘅話、恐怕難逃摱鐵枝嘅滋味。嗱、好戲陸續有來、大家就等着瞧吧!

2017年11月27日星期一

戒律長失職?


失職不失職
平衡以利益
先呃而後騙
能者食夾扐

紫荊分陀有消息傳出、戒律院院長淵博強風濕腳發作、並打響退堂鼓、聲稱往後不再過問江湖事。之但係、棺材蓋尚未𢫏埋、坊間已經有定論。部份街坊喉舌直斥淵博強唔淨止係食嘢唔做嘢、做嘢打爛嘢、而且仲留低一大坺蘇州屎畀下家嘆。甚至有聲音認為紅老大應該將淵博強扎棍、以儆效尤。之但係、城中四家十三會就唔係咁認為。由其是力牆號大老闆禮減除都不知幾咁欣賞老淵嘅表現。無它、一切都離唔開利與害嘅關係、以致人們感受不同而產生不同聲調而矣!注於紅家會是否會向淵博強問罪、依我睇唔會。理由係、紅家會咁做嘅話、以後就冇人肯去為戒律院辦事了!在投鼠忌器之下、總舵亦只能退而求其次、讓老淵去做其能力可以做嘅事。所以一般認為、淵博強當日派人追殺亂黨三條𡃁、就是以此作為換取總舵讓他退隱嘅條件之一。

2017年11月25日星期六

東風蓋過西風



東風蓋西風
越蓋越成功
世界輪流轉
誓拒假大空

俗語有講、唔聲唔聲嚇你一驚。近年來龍傳人默默耕耘之下、新高科技項目不停的湧現出來見街坊。其中以超導、空間站、全電動力技術、量子應用、高鐵、核材料、新型核子技術等方面發展訊速、更重要就係龍傳人擁有自己嘅研發能力、所以引起世界關注和提出合作。之但係、今時今日嘅大國已非當年嘅吳下阿蒙、所以對於關鍵性技術和國家寶貴資源是絕不會拿出來賤賣的。由於研發耐燃金屬獲得突破、在研發循環航空發動機方面同樣有所突破、所以花奇大帝放聲氣試探合作嘅可能性、而架仔喉舌毒賣新聞呼籲大國勿失去與花奇合作嘅大好殊榮。須知到、誰能先成功掌握到循環發動機製造技術、誰就是發展第六代新型戰機嘅第一人。可惜吖、萬歲爺只係醒咗個檸檬畀花奇大帝嘆。

2017年11月24日星期五

合作愉快



玩完拉布再玩閃
前人種果後入撿
今日勢成頂硬上
它朝失敗有誰憐

呢嗱、常聽聞人講議事堂陰陽怪氣、原來係冇錯架!自復會以來唔係拉布、就係流會。嗱、話口未完又流會了!即係話、納稅人嘅銀兩又白花了!一直以來、藍營指黃營玩拉布、而黃營指藍營玩失踪、今次卻是黃藍兩營互閃而造成流會的。黃營自爆、他們會繼續玩嘢直到明年三月補選結果出嚟為止。換言之、在未來四個月裡面、議事堂將會一事無成。照咁睇、如果黃營在補選失敗嘅話、有可能要繼續玩嘢直至議事堂換屆為止?難道他們不怕街坊反面嘅咩?

2017年11月23日星期四

廿三兜死因報告


人在江湖冇得揀
命中注定兩相殘
若然得知其底蘊
勿再跟人去造反

世界上從來沒有一個國家嘅人民會阻止訂立國家安全法的、但罪惡城偏偏就是唯一異常之地。雖然神州法律之中有國家安全法、但未能涵蓋罪惡城。正是這個原因、城中政治鬥爭鬧個不休。這不獨只威脅國家安全、而且對本城治安亦構成嚴重威脅。對平常百姓而言、絕對是不願見到的。究竟係朝廷軟弱、抑或係縣府無能、又或者根本上係有人唔想立此法呢?答案顯而易見係後者。如果我係政客嘅話、我都會反對設安全法。世上嘅國家安全法都一樣、係禁止政黨收受外國獻金的。護城安全人人有責嘅情況下、訂立安全法是急不容緩的。既然係咁、點解罪惡城大歸咁耐依然未能立法呢?若要搞清楚這個問題、必須先弄清楚當年安全法點解會在臨門一腳之前跪低。

2017年11月22日星期三

令人生厭



盡而得其反
當然會撞板
食過冇翻頭
何必繼續玩

反盟為反一站兩份都可謂無所不用其極、繼拉布之後又將人稱「長島告狀王」玩核堅擺上台。但今次玩核堅並唔係玩核而係篤背。佢跑到廉公衙門篤罪惡城知縣冧井背脊、指控佢鬼祟與講冬知府馬㷫水簽訂合同、向省府割地讓權去換取其家人在大圈生意上嘅便利。其實冧知縣早就拷鑼打鼓、驚死冇人知佢會去簽合同咁嘅款、基本上並不存在甚麼鬼祟簽約嘅問題。況且、大圈已經率先打開一站兩份之門、所以今次輪到罪惡城履行義務亦算公平。反盟硬係要將所有事情都歸於政治化、簡直係走火入魔不可理喻。仲有呀、嘢可以亂食、話不可亂講、指控並唔係兒戲。除非玩核桌堅能提出證來支持其指控、否則分分鐘犯上誣告之罪。假如斷正就難免牢獄之災。試問咁又何苦?

2017年11月20日星期一

講獨點解咁猛料?


講獨非講獨
存心來設局
勝在有人抬
避早一鑊孰

雖則話、講獨是由大教館萌芽然後再由學徒帶入社會。但必須要注意嘅就係、何解當社會上正在響起一遍喊打講獨之聲嘅時候、揸拂當局依然麻木不仁、大教館連碰也不敢去碰、垃圾尊貴一面說不支持講獨、而另一面又大放厥詞為講獨開脫。相信講到這裡、大家都會質疑、究竟這個悶葫蘆裡面載嘅係乜嘢藥、講獨嘅底氣又是從何而來?嗱、江湖上最新消息顯示、其中三個講獨組織「半文錢、香梗㒼族、青年奀症」已經跟架仔「仇龍組」頭目神谷終斃商量結盟、將在明年打正旗號做「看更」𠻹喇!難怪班街坊都話、罪惡城果係如假包換嘅講獨庇護所嚟啦!

2017年11月18日星期六

花國優先



優人之優不是優
被人超過倍添愁
今日構成聽日錯
搞你唔搞聽揸兜

自從喪普坐咗上去花國一哥個位之後、便一直打起花國優先旗號與各國周旋。聚眼睇、花國優先是集中在工商和政治各方面利益的。但依近日所見、花國嘅如意算盤打得不太響了!在某個晚上、花國衛星偵測到大國向夜空發射一枚陸基反彈導導彈嘅全部過程。其間出現一度劃破長空嘅紅光、然後就發生了爆炸。有數據顯示、當時發射的是一枚技術含量非常之高嘅中段反導導彈、並成功將一板高速飛行之中嘅導彈攔截和摧毀。由於反導技術與反衛星技術是相同的、所以引起花大叔不安、並在翌日便馬上在公開場合向大國發難、並指控大國違反和平使用太空原則、以及要求大國立即停止一切有關試驗。

2017年11月17日星期五

自尋死路


唔怕搏大堆
最弊唔知衰
行前打後蹆
注定進坑渠

記得上次垃圾擂台大決賽、守門神一方面話要阻擋獨派進場、而另一方面又瞓捩頸任由多名獨派人士入閘兼成功取得議席。當時在下完全唔明白、點解守門神做嘢咁流口水嘅。之但係、當獨派五人連同反盟一人被驅逐出垃圾堂之時、在下登時恍然大悟、那是請君入甕之局。嗱、從表面上睇、反盟這屆打擂台成績(加埋獨派六名入選者)比往屆多添一席。實質上、反盟一共失去五席才對。雖然亂制派嘅總成績亦失去一席、但今次嘅重賽一共有六個空缺、如果能取得其三嘅話、呢屆垃圾堂就係亂制嘅天下。之但係、江湖上流傳、反盟有能力全部奪回去。但我就唔係咁睇好喇!

2017年11月15日星期三

明剃眼眉



爾欲趕盡兼殺絕
吾當自身硬如鐵
今日執刀剃眼眉
它朝另行打個纈

呢嗱、你有你喊打講獨、佢有佢繼續宣傳。今次嘅兩大獨派主角就係:「香梗㒼族」和「香梗食量」、佢哋派發嘅傳單上闡明「保衛爛民、唯有講獨」和「重回整鬼、香梗毒蠟」等字句。獨派除咗向20家書齋派傳單之外、還公開呼籲講府勿妨礙學術自由。也許有街坊會問、早前萬歲爺才下令、必須要抓緊罪惡城管治權、絕不容許一寸土地脫離主體。但今次獨派居然明目張膽咁宣傳講獨、到底想點?嗱、咁就真係考起喇!照眼前所見、係有人要在老虎頭上釘蝨乸、甚至要將自己地位提升至能與萬歲爺睇齊、但底氣從何而來、就真係天曉得。之但係、今次講府只管雞仔、不殺麻鷹、是有目共睹矣!

2017年11月13日星期一

壟斷洗腦?


誰比誰獨裁
使得眾痴呆
逢人稱自決
信者冇將來

白鴿仔痴瘋許前幾日在垃圾會指出、大圈洗腦部長踩入城硬銷洗腦教育是違反一圈兩制原則。呢嗱、呢啲咪就係放縱嘅結果嚟囉!一直以來、本城洗腦教育都是被黃思壟斷、而五界縣首都視而不見、以致大圈價值觀無立足之地。之但係、大影細國遺留下來嘅洋鬼子價值觀得到推崇。難道有人會愚蠢到相信大圈搞個一圈兩制出來、就係擋自己嘅前路呼?區區反盟又憑啥來到抵擋得住大圈要在本城推廣龍的文化和價值觀?講穿咗、無非係內外勾結嘅結果嚟。坦白講、任何人都有權唔鍾意大圈、甚至與大圈割蓆都冇所謂、但冇人有權去阻擋其他人去認識龍的文化和價值觀的。無奈、罪惡城就是這麼樣的一個強者龜縮、弱雞放肆嘅畸形社會嚟。

2017年11月11日星期六

針未拮到肉



你說我黃不是黃
死過翻生有何妨
當下全民得自決
何解兩眼淚汪汪

昨晚在榕樹頭聽三叔公講、巴比倫人現在是否獲得民主佢唔知到、但生活質素比任何時候都更差卻是事實。三叔公話、他年青時(七十年代)曾在巴比倫工作、當時巴比倫是相當富裕的。國民平均入息雖然跟香港差不多、但在福利方面就有天淵之別。巴比倫人終生享用免費醫療服務。男丁獲得國家分配一所兩層高花園洋房、而夫婦亦每人各得一部得國名牌房車。免費教育是一條龍式、由幼稚園至博士生、並包括書簿和校服等費用全部由公家負責。之但係、當花大叔及其盟友打散巴比倫之後、巴比倫人的擁有嘅一切都成為炮影。剩下來的只有一個窮字和一個亂字。

2017年11月10日星期五

監倉英雄



唔怕你笨拙
最忌叻唔切
自以比天高
掹長打得纈

有人話當下參與政治運動嘅大學生多數都是假大空、但在下聽過就算。因為凡是政見對立嘅人、通常都會把對手唱衰的。但係近年種種跡象、使得在下對本城政治前途越來越感覺悲觀。由其是垃圾尊貴所謂嘅三無一要(無須講道理、無須講規則、無須理反對、要堅持到底)嘅拉布攻略。其次就是戰中先鋒之一嘅兜捹康雙腳剛踏出監獄大門之後就跟痴瘋一樣吹水唔抹嘴、吹牛吹到天上去。

2017年11月8日星期三

兄弟幫又發功了


本來一比一
橫討又惡乞
𢲡手唔成勢
注定聽執骨

當戰中一開始在下就講過、書呆子不帶眼識人必衰收尾。無奈書呆子睬我都傻、反而去效法兄弟幫那群蠱惑仔玩起激進來、結果弄得神憎鬼厭都唔止、仲連個樣都搞衰埋。現在人家兄弟幫總教頭阿癲打完上半場、收埋條尾數嘆世界去也、留底丐幫長老阿乞帶兵打埋下半場。嗱、下半場嘅賽事尚未正式開始、就先有兩人被罰停賽。賽事開始不久、又另有四人被罰出場。連麻木不仁嗰個都感覺得到、呢個陣式與戰中首晚兄弟幫幫兄弟嘅情況有異曲同工之妙。如果明白當中奧妙、就會明白到點解大種乞兒明明斷到正、明明應該去做監躉、但偏偏可以逃出法網、仲連手尾都唔使跟喇!

2017年11月6日星期一

預咗冇還?



明搶暗盜有𣖕
公平正直冇屍骸
今日江湖真異相
人格賤賣謂之乖

呢嗱、罪惡城果然夠晒罪惡、明明染到周身屎嘅人、都可以被那塊高懸在公堂之上嘅明鏡照得乾乾淨淨、並且在患上暗病嘅證人不被傳召上堂作供之下、被告人就唔清唔楚咁甩咗身喇!聽聞話、由於陪煮團兩次不能煮出結果來之後就被解散、而件案亦就此作罷。再加上戒律堂宣布不作進一步追殺、那名身有屎嘅人物以後可以安枕無憂矣!早前大種乞兒隱瞞丐幫私吞乞金被放生之後、今次嘆盡海陸空、欲住高層樓嘅啱爵爺亦在光天化日之下、唔清唔楚咁就逍遙法外、仲係無後顧之憂嗰隻。所以話啫「出得嚟行、預咗冇還」先至係啱嘅。

2017年11月4日星期六

在殺得面前跪低?



先殺而後姦
背後喊一餐
形勢比人強
兩銀換迅間

江湖上流傳、大圈跟高麗就「殺得系統」講數方面有了新的轉機。據知情人士透露、大圈似乎已經願意接受高麗提出嘅“三不、一限”作為相方緊張局勢緩和條件。所謂三不就是:一、殺得不加入花家反導系統;二、不將花家、高麗、架仔三方合作發展為軍事同盟;三、不追加殺得系統。一限就是:高麗嘅殺得系統不損害大圈戰略安全利益。嗱、在下覺得有點奇怪、既然殺得係由花佬全權操控、而高麗仔根本上不能接近、那些所謂承諾究竟憑乜嘢去保證能夠落實?

2017年11月3日星期五

風光背後



瞓石冧張蓆
無須到處糴
公名無我份
富貴在咫尺

有報導顯示、官府在某行人隧道貼上一張以五種中外文字寫上不准在那裡露宿嘅告示而遭網民罵無良、方知到原來有外籍人士加人本城露宿者行列。可能係在下孤陋寡聞都未定、除了本地人之外、真係冇留意過還有外國人在街道上露宿的。然而、官府張貼嘅告示又確係以五種中外文字寫成的、內心不免起了一陣疑雲。不過我想起行經某遂道時、也曾見到過那麼樣的一張告示、而當時在遂道裡面還擠滿外傭、他們都是以膠布鋪在地上而坐。當中有人在傾偈、有人從事販賣小食和用品等活動、但並沒有發現有人露宿。現在回想起當時情況(在告示下面坐着一大群佔據半邊遂道嘅外傭)時、真係唔知好嬲定好笑。

2017年11月1日星期三

究竟想點?


通訊不通訊
五年逢一潤
大食冇翻頭
當然去到盡

呢嗱、上次大台在紅老大入城翌日抽起講錯電台製作嘅“頭條身痕”節目、而重播紅老大入城片段就闖禍了!事隔四個月之後、電波局裁定大台違反指示、並向該台發出強力詐型信一封。信中顯示該局收到四百幾封投訴大台臨時抽起講錯電台“頭條身痕”嘅信件、並指大台應該可以作出較好安排才對。嗱、在下並唔係話電波局詐大台嘅型有乜嘢唔啱、更加唔係話為大台抽起“頭條身痕”冇錯、只係覺得電波局有啲大細超咁啫!

2017年10月30日星期一

姿勢 實際 怎樣計


八十五萬未封頂
此話分明係攞景
口講口賠唔實際
街垃睇到眼矎矎

昨日三叔公於我知、佢聽到龍頭坐館冧姐講“派八十萬個餅仔已經夠晒數嘅意思、並不等同封頂”真係好開心、仲話佢個仔有機會分番個餅仔來食。坦白講、我就唔係咁樂觀。因為冧姐所謂嘅八十萬個餅仔、係加入現行已經被派出去嘅七十六萬個一起計算出來。即係話、未來只會派發四萬個新鮮餅仔應付街坊須求。因此坊間主流意見認為、冧姐由唔識用車票入閘搭火車開始、以至點樣去分餅仔都同樣係咁無知。須然冧姐冇講明、但聰明嘅街坊早就睇得出佢係恐怕公家餅仔太充裕會不利於私營餅仔市場。換句話講、只要窮鬼繼續做“劏民”嘅話、就可以保證餅仔價格繼續企硬。到時餅仔商賺到盤滿砵滿之餘、公家大帳房亦繼續豬籠入水、合晒乜乜勾結邏輯。嗱、阿媽教落、得人恩果千年記、做人切不可忘本嘅。所謂飲水思源、如果由你來當坐館爺、你又能夠點做?

2017年10月28日星期六

以象遏龍?


花星攜手遏大圈
出完口術又出千
口水講乾荷包立
一次蹉跎退十年

近月來、花大叔不斷向摩囉迪拋媚眼、企圖𧨾佢落水去跟紅家搞對抗。嗱、喪普能否如願目前尚未知曉、但自從“動朗踩過界”一役、阿星就被紅家晒出來嘅“架生”嚇到腳軟、使得摩囉迪一直耿恥於懷。因此他花上大筆銀両去購買花家武器、並等待機會再與紅老大一比高低。嗱、咪話我潑冷水、如果能夠用銀両買得尖端武器嘅話、阿星早就成為世界上一流打架強手、而唔係好似現在咁、剩得把聲。反觀、雖然紅家會長期受到西方集團科技封鎖、但在努力創新之下、已經緊隨花餓之後在世界武售市場攀登上第三位。試問仍然依賴購買它家武器嘅阿星焉能相比?由此可見、花大叔是明知阿星不濟都要拖攏他、分明係別有居心的。

2017年10月27日星期五

臥底



臥底又名無間道
總之係冇好人做
不成功者便成仁
半身踩入黃泉路

臥底電影和電視劇經常都有得睇、但在現實環境之中你又見過真正嘅臥底未?昨晚在榕樹頭聽三叔公講咗一個有關於臥底嘅真人事蹟。據說、阿力嘅同門師弟洪尚志是一名品學兼優嘅大學生。當尚志畢業之後便成功投考警務督察。可惜他在學堂受訓期間嚴重違紀而被格扯。被逐出學堂嘅尚志情緒非常之低落、終日沉醉於酒色而且染上毒癖。從此尚志便離開咗爸獨個兒在外面亂闖、睡嘅地方唔係橋底就是巷仔、用嘅錢都是偷偷搶搶得來。如是者過咗一年多、尚志在拜咗一個叫肥乜嘅拆家為大佬、從此就當上跳灰。有一次阿力途經秋園街時跟尚志碰過正着。阿力二話不說、便一手將尚志拉人茶餐嘆茶兼聚舊。當阿力坐低之後、劈頭第一句就問尚志點解搞到咁樣衰。尚志亦毫不隱瞞將他的經歷如實相告。尚志在臨走前還向阿力借咗一百元。嗰餐茶飲得阿力十分唔開心、因為他見到尚志淪落到那個地步而感到非常心噏。

2017年10月25日星期三

監躉本色



此子猶如一堆糞
監牢裡面搞搞震
若然由他擔幡子
死人眼凸眾生昏

戇痴瘋話、後生仔面對權威將會有更多機會踎監。嗱、人踎監戇痴瘋又踎監、人家踎完監通常走夾唔唞、而呢壇嘢卻顯現得踎監踎到成個人“揩晒”咁款覺。唔通真係如戇嬌揚話齋、坐監後嘅人生真係活得咁光彩?難怪陳實滾大煮教都話、戇痴瘋躉型入格、唔做監躉就太浪費咯!之但係、佢話後生仔面對權威就有更多機會踎監、並唔係人人適用嘅。試問、呢個世界上面對權威嘅後生仔何其多、何以偏偏係罪惡城嘅後生仔先至會有更多機會踎監呢?如果話戇痴瘋信口雌黃、對佢似乎有啲唔公道。原因係、只有罪惡城嘅後生仔自幼被教頭將那套“逢宗必反”程色扤滿腦袋、而這群人長大後自然成為一股不聽爸媽、只聽教頭吓政治盲流。在未來日子裡面、黃思教頭將會不斷推出反社會運動、年輕嘅政治盲流無須擔心往後嘅日子活得唔夠光彩了!

2017年10月23日星期一

暗戰



你有金鐘罩
我現透骨爪
招來又招往
那懼惡相交

呢嗱、過咗氣嘅細圈坐館阿狼退出武林之後、粒聲唔出便跑到大圈旗下嘅水陸財路司任職無薪高層、使得應屆坐館冧姐被班爛民窒到面都黃埋。殊不知、就在此時過氣大算盤阿𠾍亦被發現、在未經申報之下在孖葉台開咪做無薪主持。冧姐見狀便喝令佢必須立即申報、不得破壞細圈嘅規舉喎!點不知有人居然借白鴿仔聽灼林把口來做傳聲筒、指着冧姐個鼻哥狂罵佢處理阿狼和阿𠾍兩單畸屎係雙重標準、並說阿𠾍做義工無須申報𠻹。嗱、真係唔知就被佢嚇死、知到就笑死咯!其實收唔收錢並不是問題、問題係申報人份工嘅性質對細圈機密外泄風險有幾高吖嘛!嗱、阿𠾍份工係在廣播台開着個咪口噏噏、以佢嘅前身份來說、講大一句都會天下大亂。你認為佢使唔使申報呢?聽灼林曾經在青天衙門當過差都盲巫成咁、確係灼得佢少咯!

2017年10月21日星期六

扮盲巫


真盲定假盲
志在帶頭掁
若能通任督
理當有運行

曾經有國際調查報告指出、全球最多盲巫嘅地方台島排名第二。吓、唔信?嗱、唔緊要嘅、不如就讓我們看看以下事件先、然後才想一想便有答案架喇!

台島前老二妖獸蓮早前聲稱、紅家會老大在蒙鼓誅日窩基地閱兵乃係對台島文攻武嚇喎!嗱、全世界都認為嗰趟閱兵所晒出嚟嘅武器係針對阿星嘅、基本上與台島沾不上任何關係。若以當時的那批武器而判定係針對台島嘅話、只能證明妖獸蓮是一個毫無軍事常識嘅外行人。橫睇、掂睇、當日在誅日窩量相嘅武器、大部份着重於火箭軍、空軍、電戰部隊、以及各種裝甲部隊和陸軍運兵車、分明是打陸戰嘅準備嚟。然而、攻打台島應該是一場先奪制空權、再以海軍進攻嘅一場戰役、應該以火箭軍、空軍、海軍、空降兵、以及海軍陸戰隊為主的。由此證明、妖獸蓮嘅講話若非盲噏、就係呃人。

2017年10月20日星期五

又要等埋發叔?


人輸陣也輸
神仙冇力醫
反盟唔知埞
恨悔已經遲

尋日、垃圾會又出現流會、即係話納稅人嘅銀両又白花了!件事係咁嘅、由於反盟認為亂制趁住六名反派被“搣甩”就提出修訂議事規則議案是乘人之危所為、所以又使出拖延戰術。期間兩幫人輪流玩失踪和喊點人頭、結果玩出個流會來。嗱、反盟就話到明要等埋發叔架喇!即係話、佢哋要將匹布拉到明年三月補選結果出嚟為止。反盟認為、目前嘅人手係不足以構成反對喎!嗱、亂制今次必定會趁勢爭取修例嘅、反盟想話事就爭氣啲、在嚟緊選戰打敗亂制至係吖嘛!現在發爛渣唔止冇用、仲搞到自己更加乞人憎。因為佢哋嘅小學雞邏輯就係、目前垃圾會通過任何一個議案都可以被視作為不公平、不公正、以及乘人之危。咁搞法、只能被街坊視為霸道和野蠻架咋!知冇?

2017年10月18日星期三

茅廁點燈


以為呃得靚
錯到唔知埞
大眾喊糟糕
終於成詬病

日前、白鴿涂指責揸拂人押後鬆辣招而先提一站兩份、係先政治而後民生。嗱、依我睇、白鴿涂今次被鬼拍後尾枕都未定咯!眾所周知、鬆辣招擺明係益炒家、對民生影響是好是壞已有前車可鑒。然而、一站兩份係一個每日都影響着數以萬計過關人群嘅項目嚟。如果要比較嘅話、鬆辣招跟一站兩份可以用前者蚊髀、而後者牛髀來形容。相信我咁講、唔會有太多人反對嘅、係嘛?!由此可見、罪惡城政棍若非私心太重、就係好反成性、已經去到咗無藥可救嘅地步。實在很難想像出、佢哋連呃飯食嘅伎倆都低劣得咁誇張嘅。正如白姐姐話齋、信佢一成都雙目失明啦!係嘛?!