恆禎玩完

搏出位古靈精怪

被搊根議席輸埋

大嘴巴神憎鬼厭

再玩火遲早聽拉

呢嗱、由於支那恆和扑嘢禎嘅幼稚行為弄到自摸詐餬、結果連議席都輸埋。扑嘢禎一氣之下、指大法師受到大人壓力才會作出如此判決。另一邊嘅支那恆就話、要同當局捻到底。點知一查之下、所謂捻到底、原來係飛鴿傳書給前事頭婆、要求米旗佬出手反擊喎！咁你話嘞、呢兩條友係咪懵到上心口呢？這大概叫作至死不誤矣！恆禎兩人冇運行本來係佢哋嘅事、但累起整個反派就確係唔應該。在高級法術院對恆禎嘅判決未出街之前、棍壇兩大陣營早就睺實佢哋嘅遺缺。城中泛㒼和亂制兩大陣營早就暗中開始部署、務求兩席齊得。如果一個唔好彩被亂制冷手執埋這兩個「熱煎堆」嘅話、等同廢去反派嘅武功、到時垃圾會就會變成亂制一檔獨大。如果搞成咁、就真係冇眼睇咯！

自從高級法術院嘅判決出街之後、誰人將會參與補選大賽立即成為熱話。城中各大小幫派已經開始為心儀中人向城中各家大戶投石問路、希望獲得大老闆垂青和資助。根據榕樹頭大主教眨眼陳所講、大狀幫心儀嘅對象、係前學雞思潮嘅發言人泥鯭洛。該幫為報答泥鯭洛當日寧棄學雞都要替鱷魚喬競選站台之義、所以今次將會力撐他出戰。上次輸到攤攤腰嘅㒼協會會長二馬基本想捲土重來、可惜人氣大弱、即使參賽亦屬陪跑。咕哩幫坐館李工頭上次敗陣後至今腳仍是軟、但他的拍檔受難何就很想出來拼過明白。顛九教頭忙碌民上次跟奀症嘅扑嘢禎打了一輪肉搏戰之後、整個人依然陷於虛脫狀態之中、已經無餘力再戰。奀童㒼大佬飯殼威上次踩中自己友嘅西瓜皮而躀低、搞到連個私家錢甖都打爛埋、今次要睇睇老相好巫姑姑背後嘅大水喉肯唔肯放水才作打算。看來、在利字當前嘅時候、反派表現得像散沙一盤。相反、人家亂制派雖然同樣有勾心鬥角嘅情況、但在相互協調方面明顯係做得比較穩妥。之但係、有跡象顯示、城中嘅五家八會並不想見到立垃圾會變成亂制天堂。這大概是泛㒼嘅唯一希望矣！