2016年8月29日星期一

禁鬼禁馬咩



二十三題冇得傾
國人教育門前清
改革不成添業障
戰中種下不了情

呢嗱、大概唔使問阿貴、各位街坊都知到上面四句嘢係講緊乜架嘞。冇錯、係講緊紫府在大歸之後嘅不濟現象。究竟點解會搞成咁嘅呢?答案就係、有人越玩越過界嘅結果嚟囉!也許你會話、並唔係所有街坊都係玩嘢一族。對的、實情的確只係部份人嘅愛好、而呢啲都係要同阿爺拗手瓜嘅人。湊巧地、這群玩家當中有些人是掌控着本城嘅重要樞紐、恐怕連阿爺暫時都只能扮眼唔見。相反地、如果呢班人要玩紫府揸拂人、咁就話都冇咁易。回顧當年、老古董唔係被人玩到殘晒之後才躀低嘅咩?

紫府揸拂人居然還未看清楚當前形勢、滿以為獲得一群家長嘅支持、就大大聲話要在教館推行禁獨。殊不知城中最老牌子的精英大教館、就馬上跳出來打揸拂人的臉。大館長雖然公開向大門生呼籲須要遵守法律、勿在教館搞暴力對抗、更不要搞講獨、但大門生會卻公開唱反調、聲稱大教館並非講獨禁地。這已經很清楚地告知大家、大教館是由誰來話事的。一所世界知名嘅精英大教館居然淪落到、任由大門生在未得到當事人同意之前、就在壁布板上張貼「要騎長老會頂爺的馬過海」嘅通告而不聞不問、確係今時唔同住日咯!相信大家只要稍為睇清楚一點就會發現、原來大教館係紫府嘅縮影、所有法則和規則都是因人而發揮效用的。究竟係管唔掂、抑或係唔管掂、咁就真係天曉得咯!莫講話、今日嘅大教館館長只係一名外勞、就算係由本地薑來做這份工、亦唔見得會有甚麼不同。因為大教館嘅主要神經中樞早已被一股龐大嘅幕後勢力操控着、稍有風吹草動各個樞紐便發揮互相牽引作用、大館長就會變成河蟹。試問一隻被人綁手綁腳嘅河蟹、又可以發揮出甚麼樣的作用來呢?


18 則留言:

  1. 來來去去都係為了那五斗貴米…
    如果人工奀,工作又隨時冇,咁又點會咁得閒同紫府玩,而紫府中人都係同一樣嘅心態,你話啦?冇計㗎!

    回覆刪除
    回覆
    1. 人工偏低是世界性趨勢、原因係世上商家都一樣要賺到盡吖嘛!

      刪除
  2. 我以為打機捉精靈浪費年青人時間,原來講唔講毒仲浪費年青人時間!

    回覆刪除
    回覆
    1. 打壞部機要花錢再買一部、但玩到個社會殘晒、一個仙都唔使賠、唔玩就笨啦!係嘛?!

      刪除
  3. 好友★。゚☾秋意到☁*¨*☆晚晚甜夢安唾♦・゚✬

    回覆刪除
  4. 域兄晚上好,
    而家呢個時勢想扭轉大門生嘅想法簡直係難過台灣回歸,所以當年老毛要知青上山下鄉的確有頂級智慧,

    軟硬都唔得
    剩低一個吉
    畀人咁糟質
    認真柯不甩

    回覆刪除
    回覆
    1. 華娃兄你好、
      老毛嘅橋在花大叔手上發揚光大喇!

      本來無所失
      獨愛把人拮
      呢頭玩忌趷
      嗰頭食忽得


      刪除
  5. 港毒原本係一小撮人嘩眾取寵嘅話題,同吹水無分別,但梁特將佢擴大,又拉埋吳黑檢落水,究竟想利用呢件事轉移乜野視線呢?大家不妨喺呢方面諗諗 !

    回覆刪除
    回覆
    1. 紫荊城已成鬥士世界、陰招陽招齊出、想太平都幾難咯!

      刪除
  6. 俾人喺年青人的教育做左手腳,咁反抗嘅勢力就會不斷成長,講毒雖然不能成事,但是破壞社會,一拍兩散,就會係好難避免嘅現實。

    回覆刪除
    回覆
    1. 講獨雖然大隻廣、但呢個議題好使好用、正反雙方都唔會放過嘅。依我睇、現在麻麻煩煩總好過積積埋埋才一次過大爆炸。因為大爆炸隨時會爆散兩制。

      刪除
  7. 域Sir,班友明知港獨完全冇可能,還去攪只想撈些油水,學生哥入世未深,未知人心險惡,精人出囗,蠢人出手,睇佔中幾位攪手功成身退分毛不損,可惜還不認清事實。

    回覆刪除
    回覆
    1. Wai兄、其實道理好簡單、一切皆在花大叔掌控之中就是。

      刪除
  8. 從來啲嘢都係物極必反,你越多動作,又搞洗腦國教又搞一帶一露,令到好多香港人越來越多不滿,跟住就會有一班蛇蟲鼠蟻走出嚟從中作梗抽油水!其實講到尾,我都唔明上面急D乜?正所謂一隻手掌係拍唔響嘅!以前香港人點會同你講政治?佢哋淨係會同你講炒樓炒股咋嘛!

    回覆刪除
    回覆
    1. 揸拂人太明自何謂物極必反、才會以鬥士嘅手段跟反對派周旋、以圖削弱其競爭力、從而加深其「勁憎」力。可惜佢同時亡記咗自己作做嘅亦會引發起街垃對佢嘅「勁憎」力囉!

      刪除