2016年8月1日星期一

選戰風雲 之 爆陰毒



山人一出招
群鬼盡折腰
你既無厘頭
我亂掟飛鏢

呢嗱、所謂你有張良計、我有過牆梯吖嘛!你有你揸拂人下令設置障礙、阻擋廢能青年進場參加金紫荊公開擂台大賽。我有我「搣飛佬」隨心所欲放人或擋人、懶得管你規舉不規舉。廢能青年敲大裁判嘅門、並要求特事特辦立即廢除障礙、好讓他們能夠參加比賽。但大裁判偏偏好似食咗十擔豬油咁款、仲話此要求並無迫切性嘅喎!就係咁、便留下它朝推翻賽果嘅伏筆喇!

喂喂、我聽極都唔明、究竟你講緊嘅係乜加科嚟架!唓、咁都唔知?家陣講緊嘅、之唔係垃圾會擂台大賽主辦單位要求參加者簽署「確認輸」單畸屎囉!原來呢單嘢係冇乜準則嘅。之不過、呢個四年舉辦一次嘅打擂台、係好有吸引力架!但凡勝出者、可以取得一紙四年長嘅合同、每月可獲大賬房發放(薪金連津貼)廿多萬両紫銀。滿約後還可以領取一筆很可觀嘅額外酬金架!江湖流傳、有啲人好好運架!例如有幾位垃圾街坊周不時誤打誤撞購得一手靚盤、一轉手就好似缸瓦船入水咁、賺到盤滿砵滿架喇!所以話啫、有啲咁筍嘅嘢等着自己去攞、莫講話離經叛道啦、就算賣埋親生阿媽落河、睇怕都大把人𠼱應。

話時話、萬一在大局落定之後、大裁判忽然心血來潮判決「確認輸」係廢紙一張嘅話、那豈不是等同間接裁定公開擂台大賽是在不公平情況下進行?咁搞法、呢個賽果仲算唔算數?如果唔算數嘅話、就要推翻重來架喇!嘩、呢鋪豈不是仲大鑊過搞公投?但諗深一層、其實都唔係咁大件事、只要應屆揸拂人肯犧牲小我、企出嚟孭起隻鑊、並自動滾落台以謝天下、個火頭就會自動熄滅。到時只須多花一筆銀両、擇日重賽就可以啦!𠲖、點解呢單嘢焫下、焫下、又會焫到揸拂人身上去嘅呢、吓?!


10 則留言:

  1. 押後裁決的決定,這必定是打牆頭草主意,看到時那邊有數就裁那邊贏!

    回覆刪除
    回覆
    1. 呢單嘢睇落有點陰陽怪氣、真係要睇過至知係乜事。

      刪除
  2. 好友★。゚☾八號風球喇喂☁¨*☆甜夢安睡♦・゚✬

    回覆刪除
  3. 大裁判講得啱,依家CASE已經唔少,你班契弟重成日搵法院過簥,一句無廹性就 可以KO晒班友仔!到咗宣判日,又可以話法庭無司法管核權,總之,想過法院一筒,邊有咁容易!

    回覆刪除
    回覆
    1. 對呀、大裁判話到明、就算即判都會有其他人上訴、不如慢慢來囉!

      刪除