拉圾會曲終人散

阿爺力撐係施威

長毛贈送路姆西

通天教主茶杯掟

飯民阿建不堪提

呢嗱、唔知真定假、垃圾會嘅“車掗民”掙六成大哥獲得嘅宮廷消息特別多。日前佢只係講咗一句“阿爺唔再欽點”之後、亂制政棍忽然泛㒼上身、在本屆垃圾會最後一次會議期間炮口對準施威、人人狂轟、個個猛炸、嗰副罵相比起泛㒼政棍來得更加兇悍。喂喂、人家六成大哥話到明、個消息只係聽返來、唔知堅定流架！何況、仲可能係佢老人家飲大兩杯諗番起啲舊事、才有感而“噏”都未定嘅。然而、亂制就驚死行頭執輸、反起雙眼便將施威罵到狗血淋頭。勢想唔到、日今政棍搏出名、原來係非罵施威不可嘅。難怪連三叔公都話、施威乃係眾“罵”所歸咯！

講開又講、泛㒼資深政棍在過去四年內專注鬥垮鬥臭施威而不務正業、基本上係犯咗策略上嘅錯誤。雖然係咁、但對他們的前途卻無關宏旨、因為呢班人決定咗唔再留低。呢班政棍最錯嘅嘅地方、就係利用班後生仔不成、反而造就咗一群天殺剋星出來狙擊泛㒼吖嘛！但係嗰班政棍卻猶如床板夾着子孫桔、縱然有痛叫不得。江湖上流傳、當泛㒼政棍發覺跟施威糾纏而搞臭咗自已個朵、便知到冧莊無望、就更加對佢恨之入骨、並把一切都豁出去、力求攬住施威一齊執包袱為止。另一邊廂嘅亂制政棍亦有人懵成成、誤把流言當聖旨、滿以為施威失寵就將佢拳打腳踼、甚至天真到以為咁就可以贏取得更多擁躉支持。但佢哋似乎望記咗、雖然泛㒼擁躉視施威如生蟲枴杖、但亂制擁躉卻普遍視他如扶手棍、否則施威亦唔會有四十點上下嘅支持律啦！坦白講、做人太過於急功近利、打狗又唔先睇一睇主人面、通常都係唔襟撈居多。亂制敵友不分簡直係笑死泛㒼、氣死自己班擁躉。依我睇、呢班政棍今次直程係犯下政治態度不堅定嘅錯誤。如無估錯、呢班友仔都係失分多過得分咯！