2016年6月20日星期一

人性比政治更污穢



正治無道義
難知非與是
大話有支持
人多梗有痴

打鑼灣書鋪蒸發五人組嘅三皮李、二口波、太平張、吹雞林已先後獲釋、只有文釆桂一人尚被扣查、但有人急不及待在江湖上吹雞爆大鑊。回來不久嘅吹雞指出、三皮李曾經同佢講過、係被紅特(紅家特工組)由陸路經過關卡押往中土、並指三皮李曾經將一份反紅名單交給紅特。嘩、吹雞林咁講嘢、除咗踢爆關卡放水之外、還要指控三皮李係二五仔。唔怪得保安隊副統領比加超飛撲出來話要搵吹雞林澄清、仲揗晒雞到將「天朝人民共和國」講成「天朝民國」啦!三皮李被屈係出賣反紅義士嘅二五仔當然唔順氣、於是企出來反指吹雞林無中生有。吹雞林知衰、惟有改口話、佢只係憑自己嘅感覺講嘢架咋!吓、咁咪即係斷估?!吹雞林仲話為確保不被追踪、已經把紅特交給他的聯絡手機毀滅咗。照咁睇、即係連唯一物證都冇埋。咁你話嘞、呢單嘢係咪口同鼻拗呢、吓?

呢嗱、似乎有人斷定文采桂十年前駕車撞死人單嘢一定甩唔到身、便索性有咁大發到咁大、企圖集合各方勢力向紅家施壓釋放人。喂喂、各位街坊、你哋應該知到紅家向來唔受呢套架、係嘛?況且文采桂被控嘅係型事罪、靠政治手段相迫只係嘥聲壞氣。若要救文采桂、只有在判案後申請保外就醫一途架咋!不過政客就唔理咁多、一於利用此事作為選舉工程項目之一、睇怕文采桂呢趟都係凶多吉少咯!難為吹雞林仲好意思反問記者、說甚麼連佢都敢發聲、點解記者唔得?喂、吹雞哥、又係你話嘅、紅特入城綁架嘅喎!閣下背後有照就梗係冇有怕啦!就算陪着你嘔嘅鐵頭保你唔住、仲有花佬收留吖嘛!不過紅家今次放虎歸山、會唔會係引蛇出洞尚未可知。其他人同呢單嘢無啦無𠹌、又無着數可言、除非係傻嘅、否則點都唔會𢲡屎上身咁戇居嘅。仲有呀、萬一紅特受過今次教訓之後、便學花特一樣“事後不認賬”嘅話、到時就真係發生咗乜事都唔知咯!


13 則留言:

  1. 照情況嚟睇,可能又係一齣無間道?

    回覆刪除
    回覆
    1. 呢單嘢本來係紅家內訌嘅事、現在卻因蒸發令而化大而矣!

      刪除
  2. 除非係傻嘅、否則點都會事後不認賬!

    回覆刪除
  3. 佢哋知道自己做緊乜嘅,我係小市民,是永遠不知道真正的原因姐!

    回覆刪除
  4. 口講口賠,尤其呢口單咁政治敏感嘅燙手山芋添!邊度會有人承認呀?

    回覆刪除
    回覆
    1. 聽聞話、當有人企出嚟認頭嘅時候、就是𢲷爛塊面之時。

      刪除
  5. 最近有D紫荊人問,在紫荊城做嘅事,天朝冇權話佢犯法,所以過左關出左境都要紫府保護喎!
    呢班人不防又試下在紫荊城犯下花大叔嘅法,再走去花家行下街,睇下會點。

    回覆刪除
    回覆
    1. 呢個世界已經變成係講實力而非講理的了!

      刪除
  6. 回覆
    1. 最精彩還是這首詩:「正治無道義,難知非與是。大話有支持,人多梗有痴。」
      哈哈! 想不笑都幾難。

      刪除
    2. 今日社會已經變得混賬不堪矣!

      刪除