2016年6月27日星期一

廢青的春秋大夢



此子原來是廢青
開壇請法欠虔誠
自知無才偏騖遠
神前訪客靜嚶嚶

在江湖上混飯食嘅人都知到、做人最緊要就係懂得跟紅頂白、先至會贏吖嘛!試問點會有人專爬逆水咁戇居架?呢嗱、別處有冇呢種人在下唔知到、但本城就真係出現咗一批明明見到人家隻船穿咗個大咕窿、仲係硬着要去搭沉船嘅人。係邊個?之唔咪就係剛剛以入英講獨憐㒼(英獨㒼)名譽開設新壇嘅消遣聰囉!呢位仁兄都唔知係想攞景抑或係贈慶、居然趁着英佬擺脫歐佬、而且蘇佬和愛佬正在喊同佢分身家之際、貿然喊紫荊城脫宗入英。唉、依家英佬成個自身難保嘅泥菩薩咁款、呢位老兄偏偏要喺呢個時候高唱脫宗入英、認真冇解嘅。喂喂、消遣聰、你自己消遣自已係你嘅事、千祈咪累街坊至好呀!

跟據消遣聰嘅講法、入英只係權宜之計、講獨才是最終目的。但問題係、既要入英又何來講獨、若要講獨又焉能入英?除非英佬係白痴嘅、否則點會答應做別人嘅踏腳石?由此可見、世界上真係有種人天真到連異想天開、都當作為是應份的。坦白講、連咁冇邏輯嘅話都噏得出口、搵阿茂去信佢都得啦!憑啲咁嘅“哥利”就學人出來行、肯定撞板多過食飯都得咯!難怪有人話、有種人還以為在戰中之後、紫荊城仍然是個老襯集中之地、呢度嘅人唔止荷包疏爽、而且仲好容易𧦠嘅。呢種人相信、只要夠膽掛個“反”字上心口、話自己參選垃圾尊貴、就會有人願意把辛苦賺來嘅銀両奉獻畀佢哋。其實、報紙日日都有賣、講府係唔會發牌畀講獨組織嘅。咁即係話、呢類幫會係非法組織嚟啦!試問一個非法嘅幫會又焉能派代表出去參選呀、老哥?!所以嘛、人不可亂信、錢更加不可亂捐呀!做冤大頭倒無所謂、但搬起石頭砸自己雙腿就唔好啦!係嘛?!




18 則留言:

  1. 佢搬起石頭砸自己雙腿,我地都無計架,何況佢只係口嗡嗡姐!

    回覆刪除
    回覆
    1. 據說有好多人托住講獨個招牌到處𧦠錢喎!

      刪除
  2. 回覆
    1. 對對對、最緊要就係抽「現水」吖嘛!

      刪除
  3. 紫荊城都仲係有唔少好易呃嘅傻仔,不過而家要呃傻仔嘅人又多左好多,唔夠分啫。
    呃得到上位,好好肉架。大家齊來分豬肉,就要各顯神通喇。

    回覆刪除
    回覆
    1. 今次正如大妖蜓話齋“騙”地開花咯!

      刪除
  4. 英國佬嫌北歐窮國拖累,所以脫歐,香港又唔係特別有錢,英國佬點會咁蠢,又再次捉隻老鼠入米缸?

    回覆刪除
    回覆
    1. 對呀、其實嗰啲人係夾硬擺英佬上台、皆在𧦠錢囉!

      刪除
  5. 英國精明得很,早就把紫荊回歸前的護照改為BNO,即是海外公民,是沒有居英權的。
    可憐現在的紫荊人,還在發春秋大夢,妄想投靠英國! 人家早已不當你是自己人。

    回覆刪除
    回覆
    1. 在全盛時期、英佬殖民地遍布全球、如果人人都獲「居英拳」嘅話、大英帝國早就變成合眾國了!如果係咁嘅話、恐怕連英女皇都冇埞企啦!

      刪除
  6. 域Sir,依家英國佬正式泥菩薩過江,自身難保啦,有朝一日蘇格蘭北愛真係獨立,大不列顛變爲小不列顛。
    條友心中一定知道自己都係9 up,只係嘩眾取寵抽下水博出名,希望他朝名成利就。

    回覆刪除
    回覆
    1. Wai 兄、英國公投顯現出輸打贏要嘅情況、輸咗嘅人𠼱地話唔算、仲要由頭來過。咁你話嘞、幾咁兒戲?

      刪除