法治何在？

屎落池塘亂星斗

尿淋壁上惹拳頭

今日勢成燒壞瓦

紫城往後聽揸兜

日前判官老爺判細牛尿潑捕快罪成、判刑踎花廳五周、並准以現金擔保出外等候上訴。雖然細牛步出刑部衙門時對着公仔箱聲稱、雖然對裁決失望、但尊重紫城法律。然而佢班擁躉卻在刑堂上辱罵判官老爺係狗、還高叫司法不公、天下無理。嘩、呢班友究竟係邊個阿媽生出嚟架？喂喂、阿哥、阿姐、法庭並唔係政治鬥獸埸、而係一個莊嚴嘅司法場所、豈容你班嘩鬼胡言亂語辱罵法官？呢嗱、怪就怪在、連檢控官都曉得運路行以免遭殃、而法庭居然無人理會、任由班嘩鬼噓完之後揚長而去。咁搞法、仲成世界嘅、法治何在呀？

審訊期間、細牛辯稱、由於他見到捕快使用過份暴力對付示威者、以致一時火遮眼、才會向捕快施肥。呢壇嘢為求脫罪、居然連咁荒謬嘅理由都講得出口、確係笑死街坊。嗱、假如那幾名涉嫌毆打他嘅捕快有樣學樣、亦以“見到細牛向妨暴隊施肥而火遮眼、才會誤將他當作沙包”作為辯解、而又獲得輕判嘅話、你估細牛條氣又順唔順呢？所以話啫、有好多嘢真係調唔翻轉頭嘅。因為人係自私吖嘛！由此可見、當日某人向街霸呼籲“無須理會禁制令、並鼓吹他們繼續封街鎖路、只要事後親身前住巡捕房自首和接受法律制裁、咁就唔算不尊重法律”完全係呃人嘅屁話。可惜嘅就係、這類屁話竟然如毒品一樣、年輕人一旦沾上之後就會不能自拔。且看今日被政棍洗腦嘅年輕一代、居然狂莽到視法律為政治鬥爭工具、順者稱、逆者揈、連法官都插。勢難想像得到、這類文革遺留下來嘅“造反無罪、革命有理”極左思維、竟然會在紫荊城遍地開花。究竟是誰之過呢、吓？！