問個屁責

食嘢唔做嘢

膊頭又歪斜

向來衣食足

好過問人借

蚊型倉大火一燒就是四日多、而且造成消防員傷亡、確實令人遺憾。此事令在下諗起、當年褒呔拉頭纜讓所有工廈改作為不排污工業用途而催生出蚊型倉。但原來在更改變用途之時、並無立例規定安裝防火灑水系統。就係咁就過咗六個年頭、而無人過問是否安全。須然法律冇規定舊工廈必須安裝灑水系統、但亦無規定不得安裝噃！因此衙門應該在收到開倉申請時、要求對方依足防火安全規格才對。人所共知蚊型倉係一個密集貯物嘅地方、裡面存放物品乜都有嘅、防火系統一定不可缺少架啦！然而、衙門不修例、但照牌發。若責不在官、唔通又係百性嘅錯？

廢青的春秋大夢

此子原來是廢青

開壇請法欠虔誠

自知無才偏騖遠

神前訪客靜嚶嚶

在江湖上混飯食嘅人都知到、做人最緊要就係懂得跟紅頂白、先至會贏吖嘛！試問點會有人專爬逆水咁戇居架？呢嗱、別處有冇呢種人在下唔知到、但本城就真係出現咗一批明明見到人家隻船穿咗個大咕窿、仲係硬着要去搭沉船嘅人。係邊個？之唔咪就係剛剛以入英講獨憐㒼（英獨㒼）名譽開設新壇嘅消遣聰囉！呢位仁兄都唔知係想攞景抑或係贈慶、居然趁着英佬擺脫歐佬、而且蘇佬和愛佬正在喊同佢分身家之際、貿然喊紫荊城脫宗入英。唉、依家英佬成個自身難保嘅泥菩薩咁款、呢位老兄偏偏要喺呢個時候高唱脫宗入英、認真冇解嘅。喂喂、消遣聰、你自己消遣自已係你嘅事、千祈咪累街坊至好呀！

紫荊城是潮州魚蛋？

潮州打魚蛋

唔打點會盞

昨日受恭維

今天變爛橙

想當年、成蟲說了一句天朝人是須要有人管之後、就被城中街坊（包括在下）插到佢眼到花埋。之但係、到咗今時今日回頭一望、驚覺成蟲原來是一個非常之有遠見的人。因為本城近年的亂像已經證明人的確是須要有人管、而且必須要認真的去管、否則那句所謂「不守法律並不等如不尊重法律」嘅屁話繼續發揚光大就不得了。有見及此、德叔在洗塵宴上指出、人雖大也絕不能大於法、並喝令拉審部門必須依法辦事不得怠慢。就是經德叔這麼樣一喝、那宗轟動全城的尊貴涉嫌私吞獻金事件裡面、其中一名涉嫌人物常無便被擺上法堂。姑勿論當事人是何許人物、但有法就應依法去處理、事件擔誤得太久、唔止人損毀高懸明鏡個指牌、更無法掩得住社會上悠悠眾口的。

癡癡呆呆坐埋一枱

痴者亦是呆

來者坐一枱

大家跟住反

唯爾望天開

呢嗱、所謂嘢可以亂食、話不可亂講吖嘛！自從吹雞林指貪口爽老屈三皮李是被人由陸路通過關卡押返神州、仲𢵌佢將一份反紅名單交給紅家特工組之後、件事就鬧得一發不可收拾。雖然全世界都見到吹雞林承認、所講嘅話都係斷估嘅、但偏有人刻意將之發大。但問題係、假如有確實證據證明紅特跨境辦案、而神州那邊硬是不作回應、紫荊人又當如何？遊行抗議、奴火街頭、抑或索性大反紅呢？別亡記、紫府眾官失職賠罪而不擔罪、紫荊人都無可奈何。那麼、神州方面唔回應有關指控、紫荊人又能怎麼樣？只要當事人三皮李一日不肯作證、件案永遠都是懸案一宗。然而、唯一受益人就係那些欲借此事作為大翻身籌碼嘅政治人物而矣！

人性比政治更污穢

正治無道義

難知非與是

大話有支持

人多梗有痴

打鑼灣書鋪蒸發五人組嘅三皮李、二口波、太平張、吹雞林已先後獲釋、只有文釆桂一人尚被扣查、但有人急不及待在江湖上吹雞爆大鑊。回來不久嘅吹雞林指出、三皮李曾經同佢講過、係被紅特（紅家特工組）由陸路經過關卡押往中土、並指三皮李曾經將一份反紅名單交給紅特。嘩、吹雞林咁講嘢、除咗踢爆關卡放水之外、還要指控三皮李係二五仔。唔怪得保安隊副統領比加超飛撲出來話要搵吹雞林澄清、仲揗晒雞到將「天朝人民共和國」講成「天朝民國」啦！三皮李被屈係出賣反紅義士嘅二五仔當然唔順氣、於是企出來反指吹雞林無中生有。吹雞林知衰、惟有改口話、佢只係憑自己嘅感覺講嘢架咋！吓、咁咪即係斷估？！吹雞林仲話為確保不被追踪、已經把紅特交給他的聯絡手機毀滅咗。照咁睇、即係連唯一物證都冇埋。咁你話嘞、呢單嘢係咪口同鼻拗呢、吓？

寶島何去何從？

此威當是非常威

時晨未到廢天規

與日擠眉親近美

大官唔做去擔泥

最近花佬慘議院軍萎會議員脈海奀跑到寶島、喊菜英子將軍費調升至國民生顏總額百份之三水平、加幅約百份之六十。呢嗱、寶島軍費開支要由花佬來定已經令人稱奇。但更奇怪嘅就係、軍事長見到菜英子在化連空軍基地大聲講、永不容忍別國軍機在己頭上飛來飛去、滿以為一姐要在保衛領土主權方面企硬、就快手快腳把四萬枚炮彈送往大平島去。殊不知消息一傳出花佬就唔高興、嚇得菜英子馬上派涉外部長出來解畫、並指軍事長語無倫次才會令人誤解、並改稱炮彈其實是送去東沙的。目前花佬正在向菜英子施壓、迫她交出「藍海十一段線」嘅所有原始檔案、由花佬去研究怎樣才能令阿爺聲稱嘅「藍海九段線」失去法理依據、然後再由他將藍海劃分畀佢班馬仔。聽聞話、菜英子趁在6.24出訪爸喇媽嘅機會、前去見花佬商量此事喎！

搞退保不如建公屋

一生挨貴租

退休吊沙煲

活命靠綜緩

有糟政府糟

呢嗱、對於基層嘅燶境無殼人民來說、最冇引嘅就係排隊輪候上公屋。雖則講府話希望能做到輪候三年便可上樓、但實際上最少都要五年或更久一些。好嘞、五年過去了、輪到自己了、但薪金卻超過限額了、所以好夢成空了！咁、冇法嘞、想買樓又冇本事、惟有繼續租屋住啦！就係咁、這一生除非中六合彩、否則永遠都要做租奴。到咗一把年紀嘅時候、摸摸自己個荷包才發覺雖然挨足一世、但原來想搵多個銀出來刮沙都冇。更弊家伙嘅就係、自己所拱嘅公績金原來亦只係得雞碎咁多、如果用來交租尚可頂幾年。但當銀両花光之後又點算好呢？哦、有了、那就是去申請綜緩。到時莫講話有飯開、分分鐘仲有屋住。所以話啫、無須要迫政府搞甚麼退休保障嘅。因為冇保障就是最佳保障吖嘛！

痴人夢未醒

痴心妄想做英人

結果搞到冇靈魂

咪話親家無義氣

不同血脈未為親

近日英佬那邊有一名當地龍裔女子向本城持有（英佬括弧海外護照）人士呼籲、從速登記成為投票決定英佬是否“脫勾”嘅選民。點知佢話口未完、英佬發言人馬上飛撲出來推倒其言論。英佬話、只有在彼邦土生仔才有資格投票、身在英佬圈外圍、而無在彼邦長期居住假英佬一律冇資格參與。不過又真係有唔少假英佬以為自己係真英佬、否則都唔會跑到英佬那邊要求重啟“男驚條約”啦！係嘛？！由於英佬在平時表現得很關心城中嘅假英佬、由其是當佢哋跟阿爺扎馬嘅時候為甚、才令到一班懵仔高舉支過氣英佬旗認親認威、但原來在英佬心目中、呢班友仔乜都唔係、呢鋪都可謂面懵矣！

跑馬仔前奏曲

無分奸或忠

志在爆陰功

壇前先起誓

預約打龍通

今年垃圾會大選尚未開始、就有人偷步揭開明年三月講督跑馬仔嘅序幕。首生彈出來嘅人、就係穿着紅褲子舉家移民風葉國、然後返來食回頭草嘅𠲜六成。阿𠲜披露當年豬狼鬥期間某些鮮為人知嘅黑幕、暗示某人仗勢斯負佢。紅門棄卒大四口亦指講府擅長爆陰毒、暗指某人嘅人格差劣。豬公子亦趁勢兜個圈指某人將他任職大總管時所建立嘅功績據為己用。找錢華則借用國隊對講隊嘅一場足球賽為題、話自己企硬支持講隊、暗批某人冇膽企喺講人嘅一邊。當然、還有皮笑肉不笑嘅、葉柳、小四口、猜啦賓、飯婦人、夢啤啤、撈家尖等人都唔會放過炒某人冷飯嘅機會。由此可見某人須獲天時之助、但地利與人和皆弱。

捉光晚會的啟示

抬槓傻仔腦未開

荒謬廢噏智若呆

前面有堆燒壞瓦

笑面黑心迎客來

本無前一哥陽台旺質疑、點解紫荊人一定要嗌國嗌民、並指責支離會利用“齊講精神、嗌國嗌民”呢個口號去荼毒本地意識。陽台旺強調、支離會夾硬將“嗌國嗌民”與“八狗六死”綑縛在一起、完全違背本地毒蠟精神。呢嗱、所謂唔怕生壞命、最怕改錯名、真係一啲都冇錯嘅。淨係聽到“本地無知前稍”呢個會嘅朵、就知到裡面容納嘅係乜嘢貨色嚟啦！其實你有你搞本地毒蠟、人有人搞捉光晚會、理應互不相干至係吖嘛！試問又關你本無前嘅屁事咩？依我睇、陽台旺之所以指責支離會荼毒本地意識、大概係要趁住呢單嘢爆紅之際大抽其水而矣！

毒水啟示錄

一人孭鑊兩人抬

三五成群亦當災

惟有全盤皆落鑊

關人隱事確天才

毒水案一查數月、結果終於公布了！據調查報告顯示、無論兩廳（房車廳、發錢廳）、兩部（蝸居部、水龍部）、四家乘辦商、及其他所有持份者都犯錯。換言之、係人都錯就是。大總管收到報告後便馬上召開記招、並帶同有關廳部長齊齊見街坊和輪流公開道嫌。之不過、道嫌終歸道嫌、道嫌並不等同須要負責喎！據大總管所講、佢橫睇、掂睇、抑或棟篤企咁睇、都睇唔到有邊個廳部長須要為毒水事件負上個人責任。哦、原來講來講去都係要話畀街坊聽、佢哋錯、但佢哋不負責喎！相信呢種咁荒謬絕倫嘅講法、大概係只此一家、別無它號咯！

法治何在？

屎落池塘亂星斗

尿淋壁上惹拳頭

今日勢成燒壞瓦

紫城往後聽揸兜

日前判官老爺判細牛尿潑捕快罪成、判刑踎花廳五周、並准以現金擔保出外等候上訴。雖然細牛步出刑部衙門時對着公仔箱聲稱、雖然對裁決失望、但尊重紫城法律。然而佢班擁躉卻在刑堂上辱罵判官老爺係狗、還高叫司法不公、天下無理。嘩、呢班友究竟係邊個阿媽生出嚟架？喂喂、阿哥、阿姐、法庭並唔係政治鬥獸埸、而係一個莊嚴嘅司法場所、豈容你班嘩鬼胡言亂語辱罵法官？呢嗱、怪就怪在、連檢控官都曉得運路行以免遭殃、而法庭居然無人理會、任由班嘩鬼噓完之後揚長而去。咁搞法、仲成世界嘅、法治何在呀？