阿爺唔敢開拖？

你有顧忌佢無拘

拆你招牌實冇衰

瘋癲理念身痕格

幼稚無知夾戇居

日前我與友人在某大教館瓊天餐廳嘆茶時、無意中聽到隔籬枱幾個年輕人講緊阿爺是非。其中有人話、坊間流轉嘅所謂“中央對付講獨要刀有刀、要劍有劍”嘅講法純屬嚇鬼、理由就係阿爺絕不敢冒外資撤離、以及泡沫經濟爆破之險、而出動街坊軍對付講獨嘅喎！呢嗱、唔知各位街坊對於以上嘅言論點睇、但我就覺得如果我係佢哋嘅父母就寧願生嚿叉燒好過生佢哋咯！因為呢班友仔根本上連阿爺是何許樣人都未知、就貿然去撩交打、分明係買板唔知埞。難道佢哋唔知到在南天門八狗六死一役之後、紅家曾經受到蕃邦集體制裁。之但係、在廿六年後嘅今日紅家已經變成地球上第二大經濟體系、而那些曾經參與制裁嘅蕃邦卻紛紛要求阿爺在經濟上支援佢哋。

八狗六死事件已經清清楚楚話咗畀我哋知、呢個世界上只有永遠利益、而無永遠敵人、所謂制裁其實亦只不過是一場戲。否則、紅家又點可以發跡起來？所以話啫、除非講獨人馬有本事一舉將紅家打沉兼取而代之、否則就無謂以卵擊石嘞。難道仲嫌上次戰中累得班街坊唔夠慘咩？講起戰中就火到嚟埋。起初、妖蜓話明只係坐定定、罵不還口、打不還手、任拉、任鎖、然後收皮嘅！點知當件事一開始就反口復舌、搞到紫荊城雞毛鴨血、做生意嘅店鋪蝕喊救命、其他街坊亦受拖累唔少。戰中最可惡之處就係令到大好家庭為條絲帶拗到反晒面、搞到父母子女、親戚、朋友、同事、鄰里皆反目成仇。親情和友情變得如此脆弱已經悲到璺架啦、點知還有人為條絲帶跟同事鬧不和、結果連仕途都賠埋出去。戰中為人們帶來的並唔係戰中三縮公所講嘅甚麼希望、而係一場瘟疫、咁你話係咪豈有此理？現在有班人居然認定阿爺挨打都唔敢開拖、而妄想利用紫荊城作為獨立起點、執劑「玩骨牌效應」畀阿爺嘆。佢哋竟然懵到連紅家嘅宗旨係“槍杆子下出政權”都唔知、就盲舂舂學人搞搞震、咪即係撩鬼攞命囉！喂喂喂、有死你班友仔死就好喇、千祈咪連累班街坊陪葬至好呀！